GENESI 50 - BIVHILI KHETHWA Mafhungo Madifha

¹ Zwa ri u itea, Josefa a ḓiposa nṱha ha khotsi awe, miṱodzi yawe ya tou tevhuwa, a vha khisa.

² Ndi hone Josefa a tshi vhudza vhalanda vhawe vha dziṅanga uri vha ḓodze tshitumbu tsha khotsi awe mishonga, tshi si sine. Dziṅanga dza ḓodza tshitumbu tsha Israele mishonga uri tshi si sine,

³ vha fhedza maḓuvha a 40 vha tshi khou ita uyo mushumo, ngauri zwi ita maḓuvha a 40 u ḓodza tshitumbu mishonga uri tshi si sine. Vhaegipita vha mu lila maḓuvha a 70.

⁴ Musi tshifhinga tsha u mu lila tsho no fhela, Josefa a vhudza vha muṱa wa Farao a ri, “Arali ni tshi ntakalela, swikisani mafhungo haya ha Farao, ni ri,

⁵ ‘Khotsi anga vho nnyanisa vha ri: Ndi ḓo ṱuwa ndi tshi fa; ndi na tshalo tshe nda ḓibwela tshone shangoni ḽa Kanana, u ntswiṱe henefho. Zwino-ha, ndi khou humbela thendelo uri ndi gonye henengei ndi yo swiṱa khotsi anga, ndi ḓo konou vhuya.’ ”

⁶ Farao a fhindula a ri, “Iyani ni yo swiṱa khotsi aṋu ni tshi tevhedza muano we vha ni anisa.”

⁷ Josefa a yo swiṱa khotsi awe, vhashumi vhoṱhe vha Farao vhaḓivhalea vha pfamo vha ṱuwa nae, na vhahulwane vhoṱhe vha shango ḽa Egipita,

⁸ na muṱa wa Josefa na vhakomana vhawe na muṱa wa khotsi awe. A ho ngo sala muthu shangoni ḽa Gosheni, ho tou sala vhana vhavho fhedzi, vha sala na masambi avho a nngu na kholomo dzavho.

⁹ Vha fhelekedzwa nga dzigariki na vhanameli vha dzibere. Ḽo vha ḽi gogo ḽihulu.

¹⁰ Musi vha tshi swika luvhanḓeni lwa u fhulela lwa Atadi vhubvaḓuvha ha Jorodani, vha vusa tshililo tshihulu, zwa ita maḓuvha, Josefa a lila khotsi awe maḓuvha maṱanu na mavhili.

¹¹ Musi Vhakanana, vhadzulapo vha shango ḽeneḽo vha tshi vhona hu tshi itwa tshililo itsho luvhanḓeni lwa u fhulela lwa Atadi, vha ri, “Hetsho ndi tshililo tsha Egipita.” Ndi zwe vha ri fhethu afho hu pfi Abele Mitsiraimi (Tshililo tsha Vhaegipita).

¹² Vhana vha Jakopo vha mu itela zwe a vha laya uri vha mu itele,

¹³ vha mu hwala vha mu isa shangoni ḽa Kanana, vha mu swiṱa bakoni tsimuni ya Makhaphela, tsini ha Mamuri, tsimuni ye Abrahamu a i renga kha Efroni wa Muhithi uri i vhe fhethu ha zwalo zwawe.

¹⁴ Musi vho no swiṱa Jakopo, Josefa a humela Egipita, ene na vhakomana vhawe, khathihi na vhoṱhe vhe vha ḓa nae vha tshi ḓa u swiṱa khotsi awe.

Josefa a tshi rudza vhakomana vhawe mbilu

¹⁵ Vhakomana vha Josefa vha tshi vhona uri khotsi avho vho no fa vha ri, “Zwino arali Josefa a ri u a ri lifhedza vhuvhi hoṱhe he ra vhu ita hu ḓo itea mini?”

¹⁶ Ndi hone vha tshi ruma muḓinḓa a ya ha Josefa a swikisa mafhungo a no ri, “Khotsi avho vha sa athu fa vho ri laya vha ri,

¹⁷ ‘Ni vhudze Josefa ni ri: Yawee, hangwelani vhakomana vhaṋu vhutshinyi na vhuvhi havho na zwoṱhe zwe vha ni ita. Zwino-ha, ri a vha humbela, nga vha ri hangwele vhutshinyi riṋe vhalanda vha Mudzimu wa khotsi avho.’ ” Josefa a tshi pfa mafhungo e vha a swikisa khae a lila.

¹⁸ Ha ḓa vhakomana vhawe vhone vhaṋe vha ḓa vha gwadama phanḓa hawe, vha ri, “Ro ḓa ha vhone, ri phuli dzavho.”

¹⁹ Hone Josefa a vha fhindula a ri, “Ni songo ofha tshithu; nṋe ndi nga ḓivhea vhuimoni ha Mudzimu naa?

²⁰ Vhunwa he na nndukela hone, Mudzimu o vhu shandula ha vha zwivhuya nga he a dzudzanya, uri a khunyeledze zwine zwa khou itea zwino, ha tshidzwa vhathu vhanzhi.

²¹ Zwenezwo ni songo ofha tshithu; a vha nṋe ndi ḓo ni londola na vhana vhaṋu.” Ngauralo a vha rudza mbilu a amba navho nga vhulenda.

Lufu lwa Josefa

²² Huno Josefa a dzula Egipita na muṱa wa khotsi awe. Josefa o tshila miṅwaha ya 110.

²³ O vhona vhaḓuhulu vha Efraimi, na vhana vha Makhiri, ṅwana wa Manase, vho ri u bebwa a vha takula marumbini awe ha vha u vha ita vhana vhawe.

²⁴ Josefa a vhudza vhakomana vhawe a ri, “Ndi ḓo ṱuwa ndi tshi fa. Hone vhukuma Mudzimu u ḓo ni elelwa a ni itela vhuthu, a ni bvisa shangoni heḽino, a ni isa shangoni ḽe a fulufhedzisa Abrahamu na Isaka na Jakopo nga muano.”

²⁵ Josefa a tou anisa vhana vha Israele a ri, “Musi Mudzimu a tshi ni elelwa a ni ita nga vhuthu, vhukuma ni hwale marambo anga ni ṱuwe nao.”

²⁶ Josefa a fa e na miṅwaha ya 110. Vho mu ḓodza mishonga uri tshitumbu tshawe tshi si sine, vha mu ladza bogisini ḽawe ḽa mufu henefho Egipita.