GENESI 48 - BIVHILI KHETHWA Mafhungo Madifha

Jakopo a tshi shudufhadza Efraimi na Manase, vhana vha Josefa

¹ Ngavhuya Josefa a ḓa a vhudzwa ha pfi, “Khotsi avho vha a lwala.” A dzhia vhana vhawe vhavhili vha vhatuka a ṱuwa navho a ya ha khotsi awe.

² Musi Jakopo a tshi vhudzwa upfi, “Ṅwana wavho Josefa khoyo o ḓa u vha vhona,” Israele a vusa nungo dzawe, a vuwa vhulaloni a dzula.

³ Jakopo a vhudza Josefa a ri, “Mudzimu Ramaanḓaoṱhe o ḓa kha nṋe ngei Lusi shangoni ḽa Kanana, a ntshudufhadza,

⁴ a mmbudza a ri, ‘Ndi ḓo ita uri u bebe vhana, ni ande. Kha iwe hu ḓo bva tshakha nnzhi; shango heḽi ndi ḓo ḽi ṋea vhaḓuhulu vhau ḽa vha ḽavho lini na lini.’

⁵ “Zwino vhana vhau vhavhili vha vhatuka vhe wa vha bebelwa shangoni ḽa Egipita nṋe ndi sa athu ḓa ha iwe fhano Egipita, vha ḓo vhaliwa sa vhanga; Efraimi na Manase vha ḓo vha vhana vhanga u ḓi nga Rubeni na Simioni.

⁶ Hone vhana vhe wa vha navho wo no vha na avho, vha ḓo vhaliwa sa vhau; shango ḽine vha ḓo ḽi wana ḽi ḓo vhidzwa nga madzina a vhakomana vhavho Efraimi na Manase.

⁷ “Musi ndi nḓilani ndi tshi khou vhuya Phadani, nda felwa nga mme au Rahele. Ho vha hu shangoni ḽa Kanana, ri nḓilani ri tshi vho sendela Efratha, vha swiṱwa tsini ha nḓila i no ya Efratha – ndi amba Betlehema.”

⁸ Huno Israele a tshi vhona vhana vha Josefa vhavhili vha vhatuka, a vhudzisa a ri, “Avha ndi vhonnyi?”

⁹ Josefa a fhindula khotsi awe a ri, “Ndi vhana vhanga vha vhatuka vhe Mudzimu a mpha vhone ndi fhano.” Jakopo a ri, “Vha ḓise ha nṋe ndi vha shudufhadze.”

¹⁰ Maṱo a Israele o vha a si tsha vhona nga u hula, a si tsha vhona zwavhuḓi. Josefa a ita uri vha sendele tsini hawe, Jakopo a vha khisa, a vha kuvhatedza.

¹¹ Ndi hone Israele a tshi vhudza Josefa a ri, “Ndo vha ndi songo humbula uri ndi ḓo dovha nda u vhona, hone Mudzimu o ita uri ndi vhone na vhana vhau.”

¹² Josefa a vha sudzulusa tsini ha zwirumbi zwa khotsi awe, a gwadama ṱhoho ya kwama fhasi.

¹³ Josefa a vha fara nga tshanḓa vhuvhili havho, Efraimi a mu fara nga tshanḓa tshauḽa uri a vhe thungo ya tshamonde tsha Israele, Manase a mu fara nga tshanḓa tshawe tshamonde uri a vhe thungo ya tshauḽa tsha Israele, a vha ḓisa tsini hawe.

¹⁴ Huno Israele a onyolosa tshanḓa tshawe tshauḽa a tshi vhea kha ṱhoho ya Efraimi, ene muṱuku, tshamonde a tshi vhea kha ṱhoho ya Manase, a fhambanya zwanḓa zwawe – Manase o vha e mukomana.

¹⁵ Ndi hone a tshi shudufhadza Josefa a ri, “Ngavhe Mudzimu we a shumelwa nga vhokhotsi anga Abrahamu na Isaka a tshi shudufhadza vhatukana havha! Mudzimu we a ḓi vha mulisa wanga tshee nda bebwa u swika ṋamusi ngavhe a tshi vha shudufhadza!

¹⁶ Ngavhe muruṅwa we a nndamukisa khomboni dzoṱhe a tshi vha shudufhadza! Ngavhe vha tshi vhidzwa nga dzina ḽanga na nga madzina a vhokhotsi anga Abrahamu na Isaka. Ngavhe vha tshi anda fhano fhasi vha tou vha mavhuthu!”

¹⁷ Josefa a vhona uri khotsi awe vha khou vhea tshanḓa tshavho tshauḽa ṱhohoni ya Efraimi, zwa mu dina. A dzhia tshanḓa tsha khotsi awe a linga u tshi sudzulusa ṱhohoni ya Efraimi uri a tshi vhee ṱhohoni ya Manase.

¹⁸ Josefa a hanedza khotsi awe a ri, “Vha songo ita nga u ralo, baba! Mukomana ndi hoyu: kha vha vhee tshanḓa tshavho tshauḽa ṱhohoni yawe.”

¹⁹ Hone khotsi awe vha hana vha ri, “Ndi a zwi ḓivha ṅwananga, ndi a zwi ḓivha. Na ene u ḓo beba lushaka; na ene u ḓo vha muhulwane. Nangwe zwo ralo murathu wawe u ḓo mu fhira, vhawe vhaḓuhulu vha ḓo vha magogo a dzitshakha.”

²⁰ Musi wonoyo a mbo ḓi vha shudufhadza a ri, “Ngavhe Vhaisraele vha tshi shudufhadzana nga madzina aṋu, vha ri, ‘Ngavhe Mudzimu a tshi u ita unga Efraimi na Manase!’ ” Ngauralo Jakopo o rangisa Efraimi phanḓa ha Manase.

²¹ Ndi hone Israele a tshi vhudza Josefa a ri, “Zwino ndi tsini na u fa, hone Mudzimu u ḓo vha na inwi, u ḓo ni vhuedzedza shangoni ḽa vhokhotsi aṋu.

²² A vha nṋe, ndi u ṋea Shikheme, shango ḽi no fhira ḽa vhakomana vhau, ḽiḽa ḽe nda ḽi dzhiela Vhaamori nga pfumo ḽanga na vhura hanga.”