GENESI 45 - BIVHILI KHETHWA Mafhungo Madifha

Josefa a tshi ḓidzumbululela vhakomana vhawe

¹ Zwenezwo Josefa a pfa a si tsha kona u konḓelela hezwi e na vhoṱhe vhe vha vha vha tshi mu shumela, a takusa ipfi a ri, “Noṱhe nṱutsheleni!” Josefa a tshi sala a tshi ḓidzumbululela vhakomana vhawe, vhaṅwe vhathu vhoṱhe vho vha vho no bva.

² Hone a lila a tou ṱavha mukosi lwe na Vhaegipita vha zwi pfa, mafhungo ayo a vhuya a swika pfamoni ya Farao.

³ Josefa a vhudza vhakomana vhawe a ri, “Ndi nṋe Josefa! Vhukumakuma khotsi anga vha kha ḓi tshila naa?” Vhakomana vhawe vha si kone u mu fhindula; vho vha vho hanganea vha tshi mu vhona.

⁴ Ndi hone Josefa a tshi vhudza vhakomana vhawe a ri, “Sendelani tsini hanga.” Musi vho no sendela tsini hawe a ri, “Ndi nṋe murathu waṋu Josefa we na mu rengisa a iswa Egipita.

⁵ Hone zwino ni songo ṱungufhala, ni songo ḽa mbilu nge na nthengisa, ndi Mudzimu we a nthuma nda ni ranga phanḓa uri ni tshidzwe.

⁶ Uno u tou vha ṅwaha wa vhuvhili tshee nḓala ya wa shangoni; hu kha ḓi ḓo fhela miṅwaha miṱanu hu sa limiwi, hu sa kaṋiwi.

⁷ Mudzimu o nthuma nda ni ranga phanḓa uri lushaka lwa haṋu lu si fe tshoṱhe shangoni, ni tshile, hu vhe na vhanzhi vha tshidzwaho.

⁸ Zwenezwo a si inwi no nnḓisaho fhano, ndi Mudzimu, o nnyita khotsi a Farao, ndi langa zwoṱhe zwa muṱa wawe, ndi vhusa shango ḽoṱhe ḽa Egipita.

⁹ “Ṱavhanyani ni humele ha khotsi anga, ni vha vhudze ni ri, ‘Ṅwana wavho Josefa u ri: Mudzimu o nnyita muvhusi wa shango ḽoṱhe ḽa Egipita. Kha vha ḓe ngeno ha nṋe, vha songo tsha lenga.

¹⁰ Vha ḓo dzula shangoni ḽa Gosheni hune vha ḓo vha tsini hanga, vhone na vhana vhavho na vhaḓuhulu vhavho na maṱambi a nngu dzavho na kholomo dzavho na thundu yavho yoṱhe.

¹¹ Ndi ḓo vha londola vhe henefho, ngauri hu kha ḓi ḓa miṅwe miṅwaha miṱanu ya nḓala; nṋe a thi funi vha tshi fa nga nḓala, vhone na muṱa wavho na zwoṱhe zwine vha vha nazwo.’ Ni vha vhudze nga u ralo.

¹² “Ni khou zwi vhona nga aṋu maṱo, na murathu wanga Benyamini u khou zwi vhona uri ndi wanga mulomo u no khou amba na inwi.

¹³ Vhudzani khotsi anga uri ndo huliswa hani fhano Egipita, ni vha vhudze na zwoṱhe zwe na zwi vhona. Ṱavhanyani ni yo dzhia khotsi anga ni vha ḓise fhano.”

¹⁴ Ndi hone a tshi kuvhatedza murathu wawe Benyamini a lila; na Benyamini a mu kuvhatedza-vho a tshi khou lila.

¹⁵ A kuvhatedza vhakomana vhawe vhoṱhe a tshi khou lila; ndi hone vhakomana vhawe vha tshi konou amba nae.

Farao a tshi ri Jakopo a pfulutshele Egipita

¹⁶ Mafhungo a uri vhakomana vha Josefa vho ḓa a swika pfamoni ya Farao. Farao a ri u zwi pfa a takala, na magota awe vha takala.

¹⁷ Farao a vhudza Josefa a ri, “Vhudzani vhakomana vhaṋu ni ri, ‘Itani hezwi: Hwesani donngi dzaṋu mihwalo, ni humele shangoni ḽa Kanana,

¹⁸ ni dzhie khotsi aṋu na miṱa yaṋu ni ḓe navho fhano ha nṋe. Ndi ḓo ni ṋea shango fhano Egipita ḽi fhiraho oṱhe; ni ḓo ḓiphiṋa nga mapfura a shango.’

¹⁹ Na inwi ndi khou ni ruma; vha vhudzeni ni ri, ‘Itani hezwi: Dzhiani dzigoloi dzi no bva shangoni ḽa Egipita, ni ḓo namedza vhana vhaṋu na vhasadzi vhaṋu. Dzhiani khotsi aṋu ni vhuye navho.

²⁰ Thundu yaṋu ni songo i londa, ni ḓo wana zwivhuya zwi no fhira zwoṱhe fhano Egipita.’ ”

Vhana vha Jakopo vha tshi humela Kanana

²¹ Vhana vha Israele vha ita zwe vha vhudzwa. Josefa a vha ṋea dzigoloi sa zwe Farao a amba, a vha ṋea na mbuvha ya u ḽa nḓilani.

²² Muṅwe na muṅwe a mu ṋea zwiambaro zwiswa, Benyamini a mu ṋea maḓana mararu a mangwende a siliva na zwiambaro zwiṱanu zwiswa.

²³ Khotsi awe a vha rumela fumi ḽa donngi dzo hwala zwibveledzwa zwavhuḓivhuḓi zwa Egipita, na donngi dza fumi dza tsadzi dzo hwala mavhele na vhurotho na mbuvha ine khotsi awe vha ḓo ḽa nḓilani.

²⁴ Ndi hone a tshi ri vhakomana vhawe vha ṱuwe, a vha vhudza maipfi awe a u fhedzisela a ri, “Ni songo enda ni tshi rovhedzana nḓilani.”

²⁵ Ndi hone vha tshi ṱuwa Egipita. Musi vha tshi swika shangoni ḽa Kanana, ha khotsi avho Jakopo,

²⁶ vha mu anetshela vha ri, “Josefa u kha ḓi tshila. Vhukuma ndi ene muvhusi wa shango ḽoṱhe ḽa Egipita.” Jakopo zwa mu somela, a si vhuye a tenda zwine vha amba.

²⁷ Hone musi vha tshi mu vhudza zwoṱhe zwe Josefa a vha vhudza, a tshi vhona na dzigoloi dze Josefa a dzi rumela uri dzi ḓe dzi mu dzhie, a dzivhuluwa.

²⁸ Ndi hone Israele a tshi ri, “Ndi vho tenda! Ṅwananga Josefa u kha ḓi tshila. Ndi ḓo ṱuwa nda yo mu vhona ndi sa athu fa.”