GENESI 44 - BIVHILI KHETHWA Mafhungo Madifha

Tshinwelo tsha Josefa sagani ya Benyamini

¹ Zwino Josefa a vhudza vhakoma vha nnḓu yawe a ri, “Ḓadzani saga dza havha vhanna nga zwiḽiwa zwinzhi nga hune vha kona u hwala, tshelede ya muṅwe na muṅwe ni i longe mulomoni wa saga yawe.

² Ni longe tshinwelo tshanga tsha siliva mulomoni wa saga ya wa phedzi wa muṱani wa havho, ni longe na tshelede yawe ya u renga mavhele.” Uyo a ita nga he Josefa a mu vhudza.

³ Musi mapfuvhi a tshi tswuka, avho vhanna vha ṱuwa na donngi dzavho.

⁴ Huno vha sa athu vha kule na muḓi, Josefa a vhudza mukoma wawe a ri, “Ṱavhanyani ni tevhele havhaḽa vhanna, ni tshi swika khavho ni ri, ‘Ndi mini ni tshi lifhedza zwivhuya nga zwivhi?

⁵ Itshi a si tshinwelo tshine muṋe wanga a nwa ngatsho a bvumba ngatsho naa? No ita vhuvhi!’ ”

⁶ Musi mukoma a tshi swika khavho, a dovholola ayo maipfi.

⁷ Hone vhone vha mu fhindula vha ri, “Ndi mini muṋe wanga a tshi amba zwo raloho? Riṋe ri nga si ite zwo raloho!

⁸ Hufha ro ri ri tshi bva shangoni ḽa Kanana ra ita na u vhuya na iḽa tshelede ye ra i wana milomoni ya saga dzashu, ra vha ṋea. Zwino ri nga tswa hani siliva kana musuku nḓuni ya muṋe wavho?

⁹ Arali vha wana muṅwe washu e nayo, nga a vhulawe; riṋe vhaṅwe roṱhe nga ri itwe phuli dza muṋe wanga.”

¹⁰ Ene a ri, “Izwo ndi zwone, zwine na amba zwi ḓo tou ralo. Ane a wanala e natsho u ḓo vha phuli yanga; inwi vhaṅwe noṱhe a ni nga vhi na mulandu.”

¹¹ Muṅwe na muṅwe wavho a mbo ḓi tsisela saga yawe fhasi, a i vula.

¹² Ndi hone mukoma a tshi sedza a thoma nga tanzhe a fhedzisela nga wa phedzi. Tshinwelo tsha wanala sagani ya Benyamini.

¹³ Zwo no ralo, vha kherukanya zwiambaro zwavho. Vhoṱhe vha hwesa donngi dzavho mihwalo, vha humela muḓini.

¹⁴ Josefa o vha a tshi kha ḓi vha nḓuni musi Juda na vhana vha khotsi awe vha tshi dzhena, vha ḓiposa fhasi phanḓa hawe.

¹⁵ Josefa a vha vhudza a ri, “No ita zwithu-ḓe? No vha ni sa ḓivhi uri munna a no nga nṋe u kona u ḓivha zwithu nga u bvumba?”

¹⁶ Juda a fhindula a ri, “Ri ḓo fhindula muṋe wanga ra ri mini? Ri nga ri mini? Ri nga ḓikupula hani mulandu? Mudzimu o dzumbulula mulandu washu, zwino ri dziphuli dzavho muṋe wanga, riṋe na uyo we a wanwa e na tshinwelo.”

¹⁷ Huno Josefa a ri, “Nṋe zwo raloho ndi nga si zwi ite! Onoyo munna we a wanala e na tshinwelo ndi ene a no ḓo vha phuli yanga e eṱhe. Inwi vhaṅwe noṱhe ḓiṱutsheleni nga mulalo ni humele ha khotsi aṋu.”

Juda a tshi luvhelelela Benyamini

¹⁸ Ndi hone Juda a tshi sendela a ri, “Ndi a vha humbela muṋe wanga, nga vha litshe ndi ambe navho muṋe wanga. Navho vha tshi eḓana na Farao vha songo ntsinyutshela.

¹⁹ Vhone muṋe wanga vho ri vhudzisa vha ri, ‘Ni na khotsi kana murathu naa?’

²⁰ Riṋe ra fhindula ra ri, ‘Ri na khotsi vho no ḓi vhaho vha maḓuvha; hu na ṅwana muṱuku wa mutuka we vha mu bebelwa vho no ḓi kalaha. Mukomana wawe o fa, ndi ene ṅwana wa mme awe e eṱhe o salaho, khotsi awe a vha mu funi zwone.’

²¹ Ndi hone vhone vha tshi ri vhudza vha ri, ‘Mu ḓiseni ha nṋe ndi tou mu vhona nga anga maṱo.’

²² Riṋe ra vhudza vhone muṋe wanga ra ri, ‘Uyo mutukana ha koni u ṱutshela khotsi awe; arali a ṱutshela khotsi awe vha ḓo fa.’

²³ Hone vhone vho ri vhudza vha ri, ‘Na sa ḓa na murathu waṋu wa phedzi, a ni tsha ḓo vhona tshifhaṱuwo tshanga.’

²⁴ “Musi ri tshi humela ha mulanda wavho khotsi anga, ra vha vhudza zwe vhone muṋe wanga vha amba.

²⁵ Ndi hone khotsi ashu vha tshi ri, ‘Humani ni yo renga zwiṅwe zwiḽiwanyana.’

²⁶ Hone riṋe ra ri, ‘Arali ra ṱuwa na murathu washu wa phedzi, ndi hone ri tshi nga ya; ra sa ṱuwa nae a ri koni u tsela hone. A ri koni u vhona tshifhaṱuwo tsha uyo munna ri si na murathu washu wa phedzi.’

²⁷ Mulanda wavho khotsi anga vha ri vhudza vha ri, ‘Ni a ḓivha uri musadzi wanga o mmbebela vhana vhavhili vha vhatuka.

²⁸ Muṅwe wavho o nṱutshela, nṋe nda ri: Vhukuma uyo o ṱhukhukanywa. Tshi tsheetsho a tho ngo tsha dovha nda mu vhona.

²⁹ Arali na nnzhiela na uyu, a huvhala, ni ḓo ita uri ndi fe nga mbilu ndo tshena ṱhoho ndo rano.’

³⁰ “Zwino-ha, mulanda wavho khotsi ashu a vha tsha ṱoḓa u fhambana na uyu mutukana; arali ra mu sia,

³¹ ri tshi swika vha vhona uri mutukana haho, vha ḓo fa. Ri ḓo vha ro ita uri khotsi ashu vha fe nga mbilu vho tshena ṱhoho vho ralo.

³² Nṋe ndo fulufhedzisa khotsi anga ndo tou khwaṱhisa nda ri a hu na tshi no ḓo wela hoyu mutukana. Ndo ri, ‘Arali nda sa vhuya nae nda mu ḓisa ha vhone, kha vha nkhwese mulandu khotsi anga, vhutshilo hanga hoṱhe!’

³³ Zwino-ha, ndi humbela uri nṋe ndi sale fhano ndi vhe phuli yavho vhudzuloni ha hoyu mutukana, vha litshe uyu mutukana a hume na vhakomana vhawe.

³⁴ Nṋe ndi nga humela hani ha khotsi anga, uyu mutukana ndi si nae? Aiwa nandi! Ndi nga si kone u konḓelela ndi tshi vhona u vhavha ha mbilu ya khotsi anga.”