GENESI 43 - BIVHILI KHETHWA Mafhungo Madifha

Vhana vha Jakopo vha tshi vhuelela Egipita vhe na Benyamini

¹ Huno nḓala yo vha i tshee khulu shangoni.

² Zwenezwo musi vho no fhedza goroi i no bva Egipita, khotsi avho a vha vhudza a ri, “Vhuelelani ni yo ri rengela zwiḽiwanyana.”

³ Hone Juda a mu vhudza a ri, “Houḽa munna o tou ri vhudza o khwaṱhisa a ri, ‘A thi tsha ḓo dovha nda ni ṱanganedza ni si na murathu waṋu.’

⁴ Arali vha tenda ri tshi ṱuwa na murathu washu, ri ḓo ya ra vha rengela zwiḽiwa.

⁵ Hone arali vha sa tenda ri tshi ṱuwa nae a ri nga yi, ngauri uḽa munna o ri vhudza a ri, ‘A thi tsha ḓo dovha nda ni ṱanganedza ni si na murathu waṋu.’ ”

⁶ Israele a vhudzisa a ri, “No itelani ni tshi nngwedza khomboni nga u vhudza uyo munna uri ni na muṅwe murathu?”

⁷ Vhone vha fhindula vha ri, “Uyo munna o ri vhudzisesa a tshi ṱoḓa u ḓivha zwa riṋe vhaṋe na zwa muṱa wa hashu. O ri vhudzisa a ri, ‘Khotsi aṋu vha kha ḓi tshila naa? Ni na muṅwe murathu naa?’ Riṋe tshashu ho vha hu u fhindula mbudziso dzawe. Ro vha ri tshi nga zwi ḓivha ngani uri u ḓo ri, ‘Ni vhuye na murathu waṋu’?”

⁸ Ndi hone Juda a tshi vhudza khotsi awe Israele a ri, “Kha vha ri mutukana hoyu a ṱuwe na nṋe, ri mbo ḓi ṱuwa zwino, uri riṋe na vhone na vhana vhashu ri tshile ri si fe.

⁹ A vha nṋe ndi a khwaṱhisa uri a hu na tshi no ḓo mu wela; mafhungo awe kha a hweswe nṋe; arali nda sa vhuya nae nda mu ḓisa ha vhone, nda mu vhea phanḓa havho, mulandu u ḓo vha wanga vhutshilo hanga hoṱhe.

¹⁰ Vhukuma arali ro vha ri songo lenga ndi musi ri tshi ḓo vha ro no ḓi ya ra vhuya ra ita luvhili.”

¹¹ Ndi hone khotsi avho Israele a tshi vha vhudza a ri, “Arali zwo fanela u ralo, izwo itani hezwi: Dzhiani zwiṅwe zwibveledzwa zwavhuḓi zwa shango ḽino ni longe sagani dzaṋu ni ṱuwe nazwo ni yo ṋea uyo munna i vhe nduvho – zwiḓolonyana na mutolinyana wa zwilungi na ṋonzhe i nukhelelaho na thebvu na nḓuhu.

¹² Ni fare na tshelede i no lingana na iḽa kavhili, ngauri no fanela u humisa tshelede iḽa yo longwaho milomoni ya saga dzaṋu. Khamusi vho tou khakha.

¹³ Ṱuwani na murathu waṋu ni mbo ḓi ṱavhanya u humela kha uḽa munna.

¹⁴ Ngavhe Mudzimu Ramaanḓaoṱhe a tshi ni khathutshela uri ni tshi swika ha uyo munna a litshe Simioni na Benyamini vha vhuye na inwi. A vha nṋe, arali nda felwa, ndo ḓi felwa zwanga.”

¹⁵ Ndi hone avho vhanna vha tshi dzhia iyo nduvho na iḽa tshelede yo vhalwa kavhili, vha ṱuwa na Benyamini. Vha ṱavhanya u tsela Egipita, vha swikiswa ha Josefa.

¹⁶ Musi Josefa a tshi vhona Benyamini e navho, a vhudza mukoma wa nnḓu yawe a ri, “Dzhiani vhanna havha ni vha ise nḓuni yanga, ni ṱhavhe tshifuwo, ni lugise tshiswiṱulo; vha ḓo swiṱula na nṋe.”

¹⁷ Uyo munna a ita zwe Josefa a mu vhudza, a dzhia avho vhanna a vha isa nḓuni ya Josefa.

¹⁸ Zwino vhanna avho vha tshi iswa nḓuni yawe vha pfa vho farwa nga nyofho. Vha elekanya vha ri, “Ro ḓiswa hafhano nga mulandu wa tshelede ye ya dzheniswa sagani dzashu luḽa lwa u thoma. U ṱoḓa u ri zhongondedza a ri kunda a ri fara a ri ita dziphuli, a dzhia donngi dzashu.”

¹⁹ Vha ya ha mukoma wa Josefa vha amba nae tshifhingoni tshi yaho nḓuni,

²⁰ vha ri, “Muṋe washu, ro vhuya ra ḓa fhano lwa u thoma ra renga zwiḽiwa.

²¹ Hone he ra lala hone ra vula saga dzashu, muṅwe na muṅwe washu a wana tshelede yawe yoṱhe i songo ṱumbuliwa, i henefho mulomoni wa saga yawe. Zwino ro vhuya nayo,

²² ra dovha ra ḓa na iṅwe tshelede ya u renga zwiḽiwa. A ri ḓivhi uri we a longa tshelede yashu sagani dzashu ndi nnyi.”

²³ Ene a ri, “Ndi zwone, ni songo ofha tshithu. Mudzimu waṋu, Ene Mudzimu wa khotsi aṋu, ndi Ene o ni ṋeaho tshelede ye na i wana sagani dzaṋu; tshelede yaṋu ndo i ṱanganedza.” Ndi hone a tshi ḓisa Simioni khavho.

²⁴ Uyo mukoma a isa avho vhanna nḓuni ya Josefa, a vha ṋea maḓi uri vha ṱambe milenzhe, donngi dzavho a dzi ṋea zwiḽiwa.

²⁵ Vha lugisa zwifhiwa zwine vha ḓo zwi ṋea Josefa a tshi swika masiari, ngauri vho vha vho no zwi pfa uri vha ḓo swiṱula nae.

²⁶ Josefa a tshi ḓa hayani, vha mu ṋea nduvho dze vha ḓa nadzo nḓuni yawe, vha gwadama ṱhoho dza kwama fhasi.

²⁷ A vhudzisa uri vho vuwa hani, a konou ri, “Mukalaha khotsi aṋu vhe na mmbudza vha vuwa hani? Vha kha ḓi tshila naa?”

²⁸ Vhone vha fhindula vha ri, “Mulanda wavho khotsi ashu vha kha ḓi tshila, vho takala.” Vha mu hulisa nga u gwadama.

²⁹ Musi a tshi sedza a vhona murathu wawe Benyamini, ene ṅwana wa mme awe, a vhudzisa a ri, “Uyu ndi ene phedzi ya muṱa wa haṋu we na mmbudza ngae?” A ri, “Mudzimu a u ite nga vhuthu, ṅwananga.”

³⁰ Josefa a ri u vhona murathu wawe, zwa ritha mbilu yawe, a ṱavhanya a bvela nnḓa, a ṱoḓa hune a nga dzula hone a lila. A dzhena pfamoni yawe a lilela hone.

³¹ A ṱamba khofheni, a dovha a bvela nnḓa, a ḓikhwaṱhisa, a ri, “Avhani zwiḽiwa.”

³² Ene vha mu avhela thungo, na Vhaegipita vhe vha vha vha tshi khou ḽa nae vha vha avhela thungo, ngauri Vhaegipita a vha ḽi na Vhaheberu, izwo zwi a ila kha Vhaegipita.

³³ Avho vhanna vho vha vho dzudzwa phanḓa ha Josefa vho tou tevhekana zwi tshi ya nga u bebwa havho, u bva kha tanzhe u swika kha phedzi; vha kanuka vha sedzana.

³⁴ Musi vha tshi avhelwa mikovhe yavho i tshi bva ḓafulani ya Josefa, mukovhe wa Benyamini wa fhira ya vhaṅwe kaṱanu. Ndi hone vha tshi ḽa, vha nwa nae vha vhuya vha dzelela.