GENESI 32 - BIVHILI KHETHWA Mafhungo Madifha

Jakopo a tshi ḓilugisela u ṱangana na Esau

¹ Musi na Jakopo o fara yawe nḓila, vharuṅwa vha Mudzimu vha ṱangana nae.

² Jakopo a tshi vha vhona a ri, “Hoyu ndi mushasha wa Mudzimu!” A ri afho fhethu hu pfi Mahanaimi (Mishasha mivhili).

³ Jakopo a ruma vhaḓinḓa vha mu ranga phanḓa vha ya ha mukomana wawe Esau shangoni ḽa Seiri kha ḽa Edomo.

⁴ A vha laya a ri, “Ni tshi vhudza muṋe wanga Esau ni ri, ‘Mulanda wavho Jakopo u ri: Ndo vha ndi tshi dzula na Labani, nda dzula henengei u swika zwino.

⁵ Ndi na kholomo na donngi, nngu na mbudzi, phuli dza vhanna na dza vhasadzi. Zwino ndi khou swikisa malaedzwa haya ha muṋe wanga, ndi ri ngavhe vha tshi nṱanganedza nga mulalo.’ ”

⁶ Musi vhaḓinḓa vha tshi humela ha Jakopo, vha ri, “Ro ya ha mukomana wavho Esau, vha khou ḓa u vha ṱanganedza, vha khou ḓa na vhanna vha 400.”

⁷ Jakopo a ofha zwihulu a tou hanganea. A fhandekanya vhathu vhe vha vha vhe nae vha bva zwigwada zwivhili, a fhandekanya na maṱambi a nngu na a kholomo na a gamela nga u ralo.

⁸ A elekanya a ri, “Arali Esau a tshi swika a lwa na tshigwada tshithihi, khamusi tshigwada tsho salaho tshi nga ḓi ponyoka tsha shavha.”

⁹ Zwenezwo Jakopo a rabela a ri, “Mudzimu wa makhulu wanga Abrahamu, Mudzimu wa khotsi anga Isaka, Iwe Muṋe washu, wo mmbudza wa ri, ‘Humela shangoni ḽa hau ha mashaka au, ndi ḓo ita uri zwi u nakele.’

¹⁰ Muṋe washu, a tho ngo fanelwa nga vhuthu hoṱhe he wa nnyitela na u fulufhedzea he wa sumbedza nṋe mulanda wau. Ndi tshi wela mulambo uyu wa Jorodani ndo vha ndi tshi tou vha na mbaḓa yanga fhedzi, hone zwino ndo no vha na zwigwada zwivhili.

¹¹ Ndi a rabela ndi ri, ntshidze zwanḓani zwa mukomana wanga Esau; ndi a ofha uri u ḓo ḓa a lwa na nṋe a vhulaha vhomme na vhana vhavho.

¹² Hufha wo ri, ‘Vhukuma ndi ḓo ita uri zwi u nakele, nda andisa vhaḓuhulu vhau vha nga muṱavha wa lwanzhe, une wa si kone u vhaliwa nga u anda.’ ”

¹³ A lala henefho. Kha zwe a vha e nazwo a nangela mukomana wawe tshifhiwa:

¹⁴ maḓana mavhili a mbudzi dza phambala na mbokoṱo dza 20, nngu dza tsadzi dza 200 na thutha dza 20,

¹⁵ gamela dza tsadzi dza 30 na vhana vhadzo, kholomo dza tsadzi dza 40 na mboho dza fumi na donngi dza tsadzi dza 20 na mboho dza fumi.

¹⁶ A ri vhashumi vhawe vha dzi londole, sambi ḽiṅwe na ḽiṅwe ḽi thungo, a vhudza vhashumi vhawe a ri, “Nthangeni phanḓa ni sie tshikhala vhukati ha masambi.”

¹⁷ A laya o rangaho phanḓa a ri, “Arali mukomana wanga Esau a ṱangana na iwe a u vhudzisa a ri, ‘U wa nnyi? U ya ngafhi? Muṋe wa zwifuwo izwi zwoṱhe zwine wa khou zwi swoga ndi nnyi?’

¹⁸ iwe u mu fhindule u ri, ‘Ndi zwa mulanda wavho Jakopo; ndi tshifhiwa tshi no khou iswa ha muṋe wanga Esau; Jakopo u khou ri tevhela.’ ”

¹⁹ Jakopo a laya na wa vhuvhili na wa vhuraru na vhaṅwe vhoṱhe vha no khou swoga maṱambi ayo a ri, “Na inwi ni tshi ṱangana na Esau ni ambe zwi fanaho.

²⁰ Ni songo hangwa u ri, ‘Mulanda wavho Jakopo u khou ri tevhela.’ ” Jakopo o humbula a ri, “Ndi ḓo rudza mbilu yawe nga zwifhiwa hezwi zwe nda zwi rangisa phanḓa; ngavhuya ndi tshi vho mu vhona, khamusi u ḓo nṱanganedza nga mulalo.”

²¹ Nangoho zwifhiwa zwa Jakopo zwa mu ranga phanḓa, hone ene muṋe a lala henefho mushashani.

Jakopo a tshi ita tsimbe na Mudzimu ḓambuwoni ḽa Phenuele

²² Vhusiku honoho Jakopo a vuwa a dzhia vhasadzi vhawe vhavhili na phuli mbili dza vhasadzi na vhana vhawe vha vhatuka vha 11, a wela mulambo wa Jaboko nga ḓambuwoni.

²³ Musi o no vha wedza mulambo a wedza na thundu dzawe dzoṱhe.

²⁴ Zwenezwo Jakopo o vha o no sala e eṱhe, ha ḓa munna a ita tsimbe nae ḽa vhuya ḽa tsha.

²⁵ Huno munna uyo a tshi vhona uri ha koni u kunda Jakopo, a rwa Jakopo kha khundu dza fhirea a tshi khou ita tsimbe na uyo munna.

²⁶ Ndi hone uyo munna a tshi ri, “Ḽo tsha, nnditshe ndi ṱuwe.” Jakopo a fhindula a ri, “Ndi nga si u litshe wa ṱuwa u sa athu ntshudufhadza.”

²⁷ Uyo munna a mu vhudzisa a ri, “U pfi nnyi?” Ene a fhindula a ri, “Ndi pfi Jakopo.”

²⁸ Ndi hone uyo munna a tshi ri, “A u tsha ḓo pfi Jakopo, u vho ḓo pfi Israele, nge wa ita tsimbe na Mudzimu na vhathu wa konḓelela.”

²⁹ Jakopo a ri, “Zwino mmbudze uri u pfi nnyi.” Huno Ene a fhindula a ri, “Ndi mini u tshi vhudzisa dzina ḽanga?” Ndi hone a tshi shudufhadza Jakopo henefho.

³⁰ Jakopo a ri, “Ndo vhona Mudzimu ndo livhana nae, hone ndi si fe.” Ndi zwe a ri afho fhethu hu pfi Phenuele (Tshifhaṱuwo tsha Mudzimu).

³¹ Jakopo a tshi ṱuwa Phenuele, ḓuvha ḽa vha ḽi tshi bva, a tshi khou ṱudza nge a vha o fhirea khundu.

³² Ndi zwine u swika ṋamusi Vhaisraele vha ila luṱale lwa khuli, nge Jakopo a rwiwa kha khundu tsini na luṱale lwonolwo.