GENESI 17 - BIVHILI KHETHWA Mafhungo Madifha

U fumba, tshiga tsha mulanga wa Mudzimu

¹ Musi Abramu e na miṅwaha ya 99, Muṋe washu a ḓisumbedza ene a ri, “Ndi Nṋe Mudzimu Ramaanḓaoṱhe. U fanela u tshila u tshi ita zwine nda funa u sa ṱahedzi,

² ndi ḓo vhofha mulanga na iwe nda andisa vhana vhau zwihulu.”

³ Abramu a wa nga tshifhaṱuwo. Mudzimu a amba nae a ri,

⁴ “A vha Nṋe, mulanga une nda vhofha na iwe ngoyu: u ḓo vha khotsi a tshakha nnzhi.

⁵ A u tsha ḓo pfi Abramu (Khotsi anga Mudzimu ndi muhulu), u vho ḓo pfi Abrahamu (Khotsi a magogo), ngauri ndo u ita khotsi a tshakha nnzhi.

⁶ Ndi ḓo ita uri u vhe na vhana vhanzhi; ndi ḓo vhumba dzitshakha nga iwe; kha iwe hu ḓo bva mahosi.

⁷ Ndi ḓo vhofha mulanga wa lini na lini na iwe na vhana vhau vha mirafho i kha ḓi ḓaho, nda vha Mudzimu wau na vhana vhau.

⁸ Shango ḽoṱhe ḽa Kanana hune zwino wa vha mutsinda, ndi ḓo u ṋea ḽa vha ḽau na vhana vhau lini na lini; Nṋe ndi ḓo vha Mudzimu wavho.”

⁹ Mudzimu a dovha a amba na Abrahamu a ri, “A vha iwe u vhulunge mulanga wanga – iwe na vhana vhau na mirafho i kha ḓi ḓaho.

¹⁰ Hoyu ndi mulanga we nda vhofha na iwe na vhana vhau. Mulanga une na fanela u u vhulunga ngoyu: vhoṱhe vha muṱa wau vha tshinnani vha fanela u fumbiswa.

¹¹ No fanela u fumba; tshi ḓo vha tshone tshiga tsha mulanga we nda vhofha na inwi.

¹² Na kha mirafho i ḓaho mutuka muṅwe na muṅwe a fumbiswe e na maḓuvha maṱanu na mararu, naho i phuli yo bebwaho muṱani wau, na o rengwaho kha mutsinda a si wa hau.

¹³ O bebwaho muṱani waṋu kana o rengwaho a fumbiswe, tshenetsho tshi ḓo vha tshiga tsha mulanga wanga tshi re muvhilini waṋu; u ḓo vha mulanga wa lini na lini.

¹⁴ Munna a songo fumbaho u ḓo bvisiwa kha lushaka lwa hawe; o vhofholola mulanga wanga.”

Zwe Mudzimu a fulufhedzisa Sarai

¹⁵ Mudzimu a dovha a vhudza Abrahamu a ri, “A vha Sarai musadzi wau, ha tsha pfi Sarai, u vho ḓo pfi Sara (Mufumakadzi wa musanda).

¹⁶ Ndi ḓo mu shudufhadza a u bebela ṅwana wa mutukana. Ndi ḓo mu shudufhadza a vha mme a dzitshakha; u ḓo beba mahosi a no ḓo vhusa vhathu.”

¹⁷ Abrahamu a mbo ḓi wa nga tshifhaṱuwo, a sea a ḓivhudzisa a ri, “Munna o no ḓi vhaho na miṅwaha ya ḓana a nga kha ḓi beba ṅwana naa? Sara a nga beba ṅwana o no ḓi vha na miṅwaha ya 90?”

¹⁸ Ndi hone Abrahamu a tshi vhudza Mudzimu a ri, “Ngavhe u tshi shudufhadza Ishmaele zwawe a tshila!”

¹⁹ Mudzimu a ri, “Aiwa, Sara musadzi wau u ḓo u bebela ṅwana wa mutukana; u ḓo pfi Isaka (Tshiseo); ndi ḓo vhofha mulanga wanga nae na vhaḓuhulu vhawe, wa vha wa lini na lini.

²⁰ A vha Ishmaele, ndo zwi pfa zwe wa amba: Ngoho ndi ḓo mu shudufhadza; u ḓo beba nda andisa vhana vhawe. U ḓo vha khotsi a vhavhusi vha 12; ndi ḓo mu ita lushaka luhulu.

²¹ Hone mulanga wanga ndi ḓo u vhofha na Isaka ane Sara a ḓo u bebela ene mwakani nga tshifhinga tshenetshi.”

²² Musi Mudzimu o fhedza u amba na Abrahamu a mu ṱutshela a gonya ṱaḓulu.

²³ Musi wonoyo Abrahamu a mbo dzhia ṅwana wawe Ishmaele na vhoṱhe vho bebwaho muṱani wawe na vho rengwaho, muṅwe na muṅwe wa tshinnani a re muṱani wawe, a vha fumbisa sa zwe Mudzimu a mu vhudza.

²⁴ Abrahamu o fumba e na miṅwaha ya 99;

²⁵ ṅwana wawe Ishmaele o vha e na miṅwaha ya 13;

²⁶ Abrahamu na ṅwana wawe Ishmaele vho fumba vhoṱhe musi wonoyo muthihi,

²⁷ ha fumba na vhoṱhe vha tshinnani vha muṱa wa Abrahamu, vho bebelwaho muṱani wawe khathihi na vho rengwaho kha vhatsinda.