GENESI 12 - BIVHILI KHETHWA Mafhungo Madifha

Vhomakhulukuku (12 – 50) Mudzimu a tshi vhidza Abramu

¹ Muṋe washu o amba na Abramu a ri, “Pfuluwa shangoni ḽa hau, u ṱutshele vhathu vha hau na muṱa wa khotsi au, u pfulutshele shangoni ḽine nda ḓo u sumbedza.

² Ndi ḓo u ita lushaka luhulu, nda u shudufhadza; ndi ḓo hudza dzina ḽau; u ḓo ḓisela vhathu mashudu!

³ Ndi ḓo shudufhadza vhane vha u shudufhadza; ane a vhuya a u sema, ndi ḓo mu teketela; tshakha dzoṱhe dza ḽifhasi dzi ḓo wana mashudu nga iwe.”

⁴ Ndi hone Abramu a tshi pfuluwa nga he Muṋe washu a mu vhudza; Loto a ṱuwa nae. Abramu a tshi pfuluwa Harani o vha e na miṅwaha ya 75.

⁵ O ṱuwa na musadzi wawe Sarai na Loto ṅwana wa murathu wawe na thundu yoṱhe ye vha vha vhe nayo, na phuli dze vha dzi wana Harani, vha takuwa vha livha shangoni ḽa Kanana, vha vhuya vha swika.

⁶ Abramu a buḓekanya shango a vhuya a swika fhethu ha muri muhulu wa More muḓini wa Shikheme. O wana Vhakanana vha tshi kha ḓi dzula shangoni iḽo,

⁷ hone Muṋe washu a ḓa ha Abramu a ri, “Shango heḽi ndi ḓo ḽi ṋea vhana vhau.” Henefho a fhaṱela Mune washu we a ḓa khae aḽiṱari.

⁸ U bva henefho a tshimbila o livha zwivhangani zwi re vhubvaḓuvha ha Bethele, a akha dennde yawe, Bethele o hu sumbela vhukovhela, Ai o hu sumbela vhubvaḓuvha. Henefho a fhaṱela Muṋe washu aḽiṱari, a mu rabela.

⁹ Ndi hone Abramu a tshi takuwa a tshimbila o livha tshipembe.

Abramu e Egipita

¹⁰ Huno ha wa nḓala shangoni iḽo, Abramu a tsela Egipita a yo dzula hone tshifhinganyana, nge nḓala ya vha i khulu.

¹¹ Musi a tshi ṱoḓou dzhena Egipita, a vhudza musadzi wawe Sarai a ri, “Ndi a ḓivha uri no naka;

¹² musi Vhaegipita vha tshi ni vhona vha ḓo ri, ‘Hoyu ndi musadzi wawe,’ vha mmbulaha, inwi vha ni litsha na tshila.

¹³ Inwi ni vha vhudze uri ni khaladzi anga, ndi hone vha tshi ḓo mpfara zwavhuḓi vha tshi itela inwi, vha nnditsha nda tshila vha tshi itela inwi.”

¹⁴ Musi Abramu a tshi swika Egipita, Vhaegipita vha vhona uri Sarai ndi musadzi wa lunako vhukuma.

¹⁵ Musi magota a Farao vha tshi vhona Sarai, vha mu khoḓa vha tshi vhudza Farao, Sarai a dzhiwa a iswa pfamoni ya Farao.

¹⁶ Farao a tonda Abramu a tshi itela Sarai, a mu fha nngu na kholomo na donngi dza mboho na dza tsadzi, na phuli dza vhanna na dza vhasadzi, na dzigamela.

¹⁷ Huno Muṋe washu a ḓisela Farao na muṱa wawe vhulwadze vhu ofhisaho nga mulandu wa Sarai musadzi wa Abramu.

¹⁸ Ndi hone Farao a tshi vhidzisa Abramu. A mu vhudzisa a ri, “No nnyita zwithu-ḓe? Ndi mini ni songo mmbudza uri ndi musadzi waṋu?

¹⁹ Ndi mini no ri ndi khaladzi aṋu, nda vhuya nda mu dzhia nda mu ita musadzi wanga? Zwino-ha, musadzi waṋu ngoyu! Mu dzhieni ni ṱuwe!”

²⁰ Ndi hone Farao a tshi ruma vhalanda vhawe uri vha fhelekedze Abramu na musadzi wawe na zwoṱhe zwe a vha e nazwo.