ESTERE 6 - BIVHILI KHETHWA Mafhungo Madifha

Khosi a tshi hulisa Maradokai

¹ Vhusiku honoho khosi ya si fare khofhe, a ri hu ḓiswe maṅwalo a muvhuso wawe a vhalelwe one.

² Fhethu he vha hu vhala ho angaredza na mafhungo a musi Maradokai a tshi dzumbulula tshimbevha tsha u vhulaha khosi, tshimbevha tshe tsha itwa nga Bigithana na Thereshe, khombe mbili dza pfamoni vhe vha vha vha tshi linda muṋango.

³ Khosi ya vhudzisa ya ri, “Maradokai ro mu hulisa hani? Ro mu pfufha hani nge a ita zwenezwo?” Vhalanda vhawe vha fhindula vha ri, “Ha athu pfufhiwa.”

⁴ Khosi ya vhudzisa ya ri, “Hu na magota anga fhano pfamoni?” Zwino Hamani o vha a tshi kha ḓi bva u dzhena muṱani ó ḓa u humbela khosi uri Maradokai a ṱomiwe thandani yo itelwaho zwenezwo.

⁵ Ndi hone vhalanda vha tshi fhindula vha ri, “Vho-Hamani vha fhano, vho lindela u amba na vhone.” Khosi ya ri, “Vha vhudzeni vha dzhene.”

⁶ Ndi hone Hamani a tshi dzhena, khosi ya mu vhudza ya ri, “Hu na muṅwe ane nda funa u mu hulisa. Munna uyo ndi nga mu itela mini?” Hamani a elekanya a ri, “Zwino khosi a nga vha a tshi ṱoḓa u hulisa nnyi zwingafho arali e si nṋe?”

⁷ A fhindula khosi a ri, “Munna uyo ane thovhele a ṱoḓa u mu hulisa,

⁸ nga vha ri hu ḓiswe phuraphura dza vhuhosi dzine thovhele a dzi ambara, na bere ine ya namelwa nga vhone, yo ambadzwaho maṱeleṱele a vhuhosi ṱhohoni yayo.

⁹ Vha wane muṅwe wa vhaḓivhalea vhavho a fhiraho vhoṱhe a ambadze uyo munna phuraphura idzo, a mu endedze ó namela bere, a buḓekanye tshikwea tsha muḓi. Muḓivhalea a ḓivhadze zwenezwi vha tshi khou tshimbila a ri, ‘Vhonani uri khosi i pfufha hani munna ane ya funa u mu hulisa!’ ”

¹⁰ Ndi hone khosi a tshi vhudza Hamani a ri, “Ṱavhanyani ni yo dzhia dziphuraphura na bere, zwenezwo zwe na amba ni zwi itele Maradokai wa Mujuta. Ni ḓo mu wana o dzula muṋangoni wa pfamo. Ni songo litsha u ita na tshithihi tsha zwe na amba.”

¹¹ Hamani a mbo dzhia phuraphura, a dzi ambadza Maradokai, a dzhia bere a endedza Maradokai ó i namela, Hamani a tshi huwelela a ri, “Vhonani uri khosi i pfufha hani munna ane ya funa u mu hulisa.”

¹² Zwo no ralo Maradokai a humela muṋangoni wa pfamo, Hamani a gidimela hayani ó khurumela tshifhaṱuwo nga ṱhoni.

¹³ Hamani a vhudza musadzi wawe na khonani dzawe zwoṱhe zwe zwa mu wela. Ndi hone musadzi wawe na khonani dziḽa dzawe dza vhuṱali vha tshi mu vhudza vha ri, “Maanḓa avho a khou thoma u dzhiwa nga Maradokai. Maradokai ndi Mujuda, vhone vha nga si mu kunde. Vhukumakuma u ḓo vha kunda.”

Khunḓa i tshi fasha muvei

¹⁴ Musi vha tshi kha ḓi amba, khombe dza pfamoni dza swika nga luvhilo dza dzhia Hamani a iswa tshimimani tsha Estere.