ESRA 9 - BIVHILI KHETHWA Mafhungo Madifha

Esra a tshi pfa zwa vhe vha dzea vha si Majuda

¹ Musi ho no itwa izwo zwithu, vharangaphanḓa vha ḓa ha nṋe vha ri, “Vhathu vha Israele, na vhone vhotshifhe na Vhalivi, a vho ngo ila zwa u dzetshelana na tshakha dza mashango o vha tangaho, vha no nga Vhakanana na Vhahithi na Vhapherisi na Vhajebusi na Vhaamoni na Vhamuaba na Vhaegipita na Vhaamori, vha vho tevhedza maitele adzo a nengisaho.

² Vho dzhia vhaṅwe vha vhananyana vha vhenevho vha vha ita vhasadzi vhavho na vhana vhavho, u ralo ha vha u vanganya lushaka lukhethwa na dzitshakha dzo vha tangaho. Nahone vharangaphanḓa na magota vho vha vhone vha u ranga u sa fulufhedzea honoho.”

³ Nda ri u pfa zwenezwo nda kherukanya khanzu yanga na phuraphura yanga, nda tupula mavhudzi anga na ndebvu, nda dzula fhasi ndo tshenuwa.

⁴ Zwenezwo vhoṱhe vhe vha tetemela vha tshi pfa maipfi a Mudzimu wa Israele vha kuvhangana vha ḓa ha nṋe nga mulandu wa u sa fulufhedzea hoho ha mathubwa. Nṋe nda dzula henefho ndo tshenuwa ha vhuya ha ṋekedzwa nduvho ya madekwana.

⁵ Huno musi hu tshi ṋekedzwa nduvho ya madekwana nda takuwa he nda vha ndo ḓiṱukufhadza phanḓa ha Mudzimu, khanzu yanga na phuraphura yanga zwo kherukana, nda gwadama nga magona, nda imisa zwanḓa zwa livha ha Muṋe washu Mudzimu wanga,

⁶ nda rabela nda ri, “Yawee Mudzimu wanga, ndi pfa ndo tou niwa nga ṱhoni, ndi shona na u u lavhelesa Mudzimu wanga, ngauri vhuvhi hashu vhu vho ri kumba, mulandu washu u swika makoleni.

⁷ U bva misi ya vhokhotsi ashu, na ṋamusi, mulandu washu u ḓi vha muhulu. Riṋe na mahosi ashu na vhotshifhe vhashu ro ḽiwa nga pfumo, ra hwalelwa vhuthubwani ró ṱangulwa, ra nyadziwa, ri tshi vhuswa nga mahosi asili, na ṋamusi, nga mulandu wa vhuvhi hashu.

⁸ Huno zwino Muṋe washu Mudzimu washu o ri khathutshela tshifhinganyana nga u lamulela vhaṅwenyana vho salaho a ri ṱokisa midzi fhethu hawe hukhethwa. Mudzimu washu o ri ṋea maanḓa a ri ṋea vhutshilo ngomu vhupulini hashu.

⁹ Naho ri dziphuli, Mudzimu washu ho ngo ri ṱutshela vhupulini hashu. O ita uri mahosi a Pheresia a ri tonde. O ri ṋea vhutshilo vhuswa uri ri vuse nnḓu ya Mudzimu washu, ri vuse matumba, a ri vhiela na luhura lwa u ri tsireledza rí Juda na Jerusalema.

¹⁰ “Huno zwino Mudzimu washu, ri nga ri mini ho no bvelela izwi? Ndi uri ro nyadza dzindaela

¹¹ dze wa dzi swikisa nga vhaḓinḓa vhau vhaporofita musi u tshi ri, ‘Shango ḽine na khou dzhena khaḽo uri ḽi vhe ḽaṋu ndi shango ḽo kumadzwaho nga vhuaḓa ha tshakha dzaḽo. Vho ita zwi nengisaho, vha ḽi ḓadza dzitshika dzavho u bva mugumoni uno u swika kha uḽa.

¹² Zwenezwo ni songo tenda vhananyana vhaṋu vha tshi dzewa nga vhatuka vhavho kana vhatuka vhaṋu vha tshi dzea vhananyana vhavho. Ni songo vha tikedza uri zwi vha nakele kana zwi vha anḓe na kathihi, ndi hone ni tshi ḓo vha na nungo, na ḽa zwivhuya zwa shango, na ḽi siela na vhana vhaṋu ḽa vha ifa ḽavho ḽa lini na lini.’

¹³ “Zwo ri welaho zwo ḓiswa nga zwiito zwashu zwivhi na mulandu washu muhulu. Naho zwo ralo, Iwe Mudzimu washu wo ri rwa nga ṱhamu ṱhukhu i songo eḓanaho vhuvhi hashu, wa litsha vhaṅwe vha songo fa.

¹⁴ Ri ḓo dovha ra pfuka ndaela dzau, ra vhingana na tshakha dza zwiito zwi nengisaho nga u ralo naa? A ri nga ḓo u sinyusa tshoṱhe wa ri fhedza tshoṱhe hu si sale muthu naa?

¹⁵ Yawee Muṋe washu Mudzimu wa Israele, u a fulufhedzea! Wo ri litsha ra si fe vhoṱhe. Rí fhano ṋamusi ri na mulandu, ndi zwine ha si vhe na ane a nga ima phanḓa hau.”