ESRA 8 - BIVHILI KHETHWA Mafhungo Madifha

Vhathu vhe vha vhuya na Esra vha tshi bva vhuthubwani

¹ Ngevha vhaṋe vha miṱa na vhe vha ṅwalwa navho; vho vhuya na nṋe vha tshi bva Babele hu tshi vhusa khosi Arathakhesese, ndi

² Gerisoni, wa mutupo wa Finiasi; Daniele, wa mutupo wa Ithamara; Hatushi, wa mutupo wa Dafita,

³ ṅwana wa Shekania; Zakaria, wa mutupo wa Pharoshi; vhe vha vha vhe nae ho vha ho ṅwaliswa vhanna vha 150;

⁴ Elihwenai ṅwana wa Zerakhia, wa mutupo wa Phahathi Muaba, e na vhanna vha 200;

⁵ Shekhania ṅwana wa Jahasiele, wa mutupo wa Zathu, e na vhanna vha 300;

⁶ Ebede ṅwana wa Jonathani, wa mutupo wa Adini, e na vhanna vha 50;

⁷ Jeshaya ṅwana wa Athalia, wa mutupo wa Elamu, e na vhanna vha 70;

⁸ Zebadia ṅwana wa Mikaele, wa mutupo wa Shafatia, e na vhanna vha 80;

⁹ Obadia ṅwana wa Jehiele, wa mutupo wa Juaba, e na vhanna vha 218;

¹⁰ Shelomithi ṅwana wa Josifia, wa mutupo wa Bani, e na vhanna vha 160;

¹¹ Zakaria ṅwana wa Bebai, wa mutupo wa Bebai, e na vhanna vha 28;

¹² Johanani ṅwana wa Hakatani, wa mutupo wa Asigadi, e na vhanna vha 110;

¹³ Eliphelete na Jeuele na Shemaya, vha mutupo wa Adonikamu, vhe vha vha vho sala Babele, vhe na vhanna vha 60;

¹⁴ Uthai na Zakhuru, vha mutupo wa Bigivai, vhe na vhanna vha 70.

Esra a tshi wana Vhalivi vha u shuma thembeleni

¹⁵ Avho ndo vha kuvhanganya ḽigeroni ḽine ḽa ela ḽi tshi ya muḓini wa Ahava, ra ṱoka dzidennde henefho maḓuvha mararu. Ndi tshi ṱoḓisesa kha avho vhathu na vhotshifhe, nda wana hu si na Vhalivi.

¹⁶ Ndi hone ndi tshi vhidzisa Eliesere na Ariele na Shemaya na Elinathani na Jaribi na Elinathani na Nathani na Zakaria na Meshulamu, vhe vha vha vhe vharangaphanḓa, na Joyaribi na Elinathani, vhe vha vha vhe vhanna vho funzeaho,

¹⁷ nda vha ruma ha Ido, murangaphanḓa wa vhathu vha Khasifia. Nda vha vhudza zwine vha fanela u vhudza Ido na mashaka awe na vhashumi vha thembeleni vha Khasifia, uri vha ri ḓisele vhashumi vha nḓuni ya Mudzimu washu.

¹⁸ Vhunga tshanḓa tsha Mudzimu washu tsha vhuthu tsho vha tshi na riṋe, vho ri ḓisela Sherebia, munna ane a kona, Mulivi wa mutupo wa Mahali, a ḓa na vhana vhawe na vharathu vhawe, vha ita vhanna vha 18;

¹⁹ na Hashabia, khathihi na Jeshaya wa mutupo wa Mirari, na vharathu vhawe na vhana vhavho, vha ita vhanna vha 20.

²⁰ Vha dovha vha ḓa na vhashumi vha thembeleni vha 220, itsho ndi tshigwada tshe Dafita na magota awe vha vhea uri tshi farise Vhalivi. Vhoṱhe vho ṅwalwa madzina avho.

Esra a tshi ita uri vhathu vha ḓidzime vha rabele

²¹ Henefho tsini ha ḽigero ḽa Ahava, ndo ḓivhadza vhathu uri vha ḓidzime zwiḽiwa, uri ri kone u ḓiṱukufhadza phanḓa ha Mudzimu washu, ri mu humbele uri a ri tsireledze lwendoni lwashu, riṋe na vhana vhashu na thundu yashu.

²² Ndo pfa ndi na ṱhoni ndi tshi humbula u humbela khosi uri a ri fhe vhahali na vhanameli vha dzibere uri vha ri tsireledze kha maswina gondoni, nge ra vha ro vhudza khosi ra ri, “Tshanḓa tsha Mudzimu washu tsha vhuthu tshi kha muṅwe na muṅwe ane a mu fulufhela, hone mbiti dzawe dzi ofhisaho dzi wela vhoṱhe vhane vha mu shandukela.”

²³ Ndi hone ri tshi ḓidzima zwiḽiwa ra humbela Mudzimu washu zwenezwo, Ene a fhindula thabelo yashu.

Zwifhiwa zwa thembele

²⁴ Ndi hone ndi tshi sedza vharangaphanḓa vha vhotshifhe nda nanga vha 12 khavho, khathihi na Sherebia na Hashabia na Vhalivi ngavho vha fumi;

²⁵ nda vha kalela nduvho ya siliva na musuku na midzio yoṱhe ye ya bviswa nga khosi na vhaeletshedzi vhayo na magota ayo na Vhaisraele vhoṱhe vhe vha vha vhe hone henefho, zwi tshi bviselwa nnḓu ya Mudzimu washu.

²⁶ Nda vha kalela 22 000 khilogiramu dza siliva na ḓana ḽa midzio ya siliva ine tshileme tshayo tsha eḓana 60 khilogiramu na khilogiramu dza 3 500 dza musuku

²⁷ na midzio ya 20 ya musuku ine ya lemela khilogiramu dza 8,4 na midzio mivhili yavhuḓi ya musinaseṱha u songo vangiwaho, ine mutengo wayo wa nga wa musuku.

²⁸ Nda vha vhudza nda ri, “Inwi no kumedzwa Muṋe washu khathihi na midzio hei. Siliva na musuku ndi nduvho yo ṋewaho Muṋe washu Mudzimu wa vhokhotsi aṋu, ye muthu a bvisa nga u tou funa hawe.

²⁹ Zwi londoleni zwavhuḓi ni vhuye ni zwi kale pherani dza nnḓu ya Muṋe washu i re Jerusalema ni tshi vhonwa nga vharangaphanḓa vha vhotshifhe na Vhalivi na vhaṋe vha miṱa ya Israele.”

³⁰ Ndi hone vhotshifhe na Vhalivi vha tshi ṱanganedza siliva na musuku na midzio mikhethwa ye ya vha yo kaliwa uri i hwaliwe i iswe nḓuni ya Mudzimu washu i re Jerusalema.

Hu tshi humelwa Jerusalema

³¹ Nga ḓuvha ḽa 12 ḽa ṅwedzi wa u ranga ra takuwa ḽigeroni ḽa Ahava ra livha Jerusalema. Tshanḓa tsha Mudzimu washu tsho vha tshi na riṋe, a ri tsireledza kha maswina na mavemu nḓilani.

³² Ra swika Jerusalema ra awela maḓuvha mararu.

³³ Nga ḓuvha ḽa vhuṋa ra ya nḓuni ya Mudzimu washu, ra kala siliva na musuku na midzio mikhethwa zwi tshi ṱanganedzwa nga tshifhe Miremotho ṅwana wa Uria. O vha e na Eliasara ṅwana wa Finiasi, na Vhalivi vho vha vhe hone, Jozabadi ṅwana wa Joshua na Nuadia ṅwana wa Binui.

³⁴ Tshiṅwe na tshiṅwe tsha vhaliwa tsha kaliwa, zwoṱhe zwa mbo ḓi ṅwaliwa na zwenezwo.

³⁵ Ndi hone mathubwa o vhuyaho vhuthubwani a tshi ṋekedza Mudzimu wa Israele zwiṱhavhelo zwi fhiswaho: mboho dza 12 dza Vhaisraele vhoṱhe na thutha dza 96 na ngwana dza nduna dza 77, vha ṋekedza na tshipfumelo tsha mbokoṱo dza 12. Zwoṱhe hezwo zwo vha zwiṱhavhelo zwi fhiselwaho Muṋe washu.

³⁶ Ndaela dza khosi dza swikiswa na kha magota a musanda na kha vhavhusi vha Seli-ha-Yufuratha, vhenevho vha farisa vhathu, vha tikedza mushumo wa nnḓu ya Mudzimu.