ESRA 10 - BIVHILI KHETHWA Mafhungo Madifha

Vhasadzi vha vhannḓa vha tshi ṱuwiswa

¹ Musi Esra a tshi khou rabela, a tshi khou bula zwivhi, ó tsengisa miṱodzi, ó ḓiposa fhasi phanḓa ha nnḓu ya Mudzimu, ha kuvhangana gogo ḽihulu ḽa Vhaisraele hune a vha hone, vhanna na vhasadzi na vhana. Na vhone vha lila lu ṱungufhadzaho.

² Ndi hone Shekania ṅwana wa Jehiele, muṅwe wa vhaḓuhulu vha Elamu, a tshi vhudza Esra a ri, “Mudzimu washu o vhona ro mu shandukela nga u dzea vhasadzi vhasili vha no bva kha tshakha dzo ri tangaho. Hone naho zwo ralo, Vhaisraele vha kha ḓi vha na tshine vha nga fulufhela.

³ Nga ri vhofhe mulanga na Mudzimu washu wa uri ri ḓo ṱala vhasadzi havha vhoṱhe vha ṱuwe na vhana vhavho, ri tshi tevhedza nyeletshedzo ya vhone muṋe wanga na ya vhane vha ofha ndaela dza Mudzimu washu. Nga zwi itwe hu tshi tevhedzwa Mulayo.

⁴ Nga vha takuwe, mafhungo haya a zwanḓani zwavho. Riṋe ri ḓo vha tikedza, zwenezwo nga vha vhe na nungo vha zwi ite.”

⁵ Ndi hone Esra a tshi takuwa a anisa vharangaphanḓa vha vhotshifhe na Vhalivi na Vhaisraele vhoṱhe uri vha ite zwe zwa ambiwa. Vha ana.

⁶ Ndi hone Esra a tshi ṱuwa phanḓa ha nnḓu ya Mudzimu a ya kamarani ya Jehohanani ṅwana wa Eliashibi. Musi e henefho, a si ḽe zwiḽiwa, a si nwe maḓi, ngauri o vha a tshi kha ḓi lilela u shanduka ha mathubwa.

⁷ Ha bviswa nḓivhadzo kha ḽoṱhe ḽa Juda na Jerusalema ya uri mathubwa oṱhe a kuvhangane Jerusalema.

⁸ Ha pfi ane a vhuya a kundwa u swika musi ho fhela maḓuvha mararu u ḓo dzhielwa thundu yawe yoṱhe, hu tshi tevhedzwa ndaela ya magota na vhahulwane, ene muṋe a thathwa a bviswa tshivhidzoni tsha mathubwa.

⁹ Musi ho fhela maḓuvha ayo mararu, vhanna vhoṱhe vha Juda na Benyamini vha kuvhangana Jerusalema. Nga ḓuvha ḽa 20 la ṅwedzi wa vhuṱanu na vhuṋa, vhathu vhoṱhe vho vha vho dzula muṱani phanḓa ha nnḓu ya Mudzimu, vha tshi khou tetemela nga u ofhisa ha fhungo iḽo na nga mvula.

¹⁰ Zwenezwo Esra ene tshifhe a takuwa a vha vhudza a ri, “No shandukela Mudzimu na dzea vhasadzi vhasili, u ralo ha vha u engedza mulandu wa Israele.

¹¹ Zwino bulani vhuvhi haṋu ni vhu vhudze Muṋe washu Mudzimu wa vhokhotsi aṋu, ni ite zwine a zwi funa. Ḓikhetheni ni si vangane na tshakha dzo ni tangaho na vhasadzi vhasili.”

¹² Tshivhidzo tshoṱhe tsha fhindula nga u ṱavha mukosi tsha ri, “Vha amba zwone! Tshashu ndi u ita zwine vha amba.

¹³ Hone hu na vhathu vhanzhi fhano nahone ndi tshifhinga tsha mvula, zwenezwo a ri koni u ima nnḓa. Nahone haya a si mafhungo ane a nga dzudzanywa nga ḓuvha ḽithihi kana mavhili, ngauri vhuvhi uvhu vhu kwama vhanzhi vhukati hashu.

¹⁴ Magota ashu nga vha ambele tshivhidzo tshoṱhe. Zwino nga vha ite uri muṅwe na muṅwe a dzulaho miḓini yashu o dzeaho musadzi wa mutsinda a ḓe nga tshifhinga tsho vhewaho, a ḓe na magota na vhahaṱuli vha muḓi muṅwe na muṅwe, mbiti dzi ofhisaho dza Mudzimu washu mafhungoni haya dzi vhuye ri ṱutshele.”

¹⁵ Ndi Jonathani ṅwana wa Asaele na Jahasiya ṅwana wa Thikiva fhedzi vhe vha hana ayo mafhungo, vha tshi tikedzwa nga Mishulamu na Shabithai wa Mulivi.

¹⁶ Mathubwa vha ṱanganedza nzudzanyo iyo. Esra, ene tshifhe, a nanga vhanna vhane vha vha ṱhoho dza mitupo vha nnḓu iṅwe na iṅwe, vhoṱhe vha ṅwalwa madzina. Nga ḓuvha ḽa u ranga ḽa ṅwedzi wa fumi vha dzula fhasi vha londolosa iyo milandu,

¹⁷ huno nga ḓuvha ḽa u ranga ḽa ṅwedzi wa u ranga vha vha vho fhedza mafhungo a vhanna vhoṱhe vho dzeaho vhasadzi vha vhatsinda.

Vhanna vhe vha dzea vhasadzi vha vhatsinda

¹⁸ Kha vhaḓuhulu vha vhotshifhe, vhe vha vha vho dzea vhasadzi vha vhatsinda ndi havhano: Kha vhaḓuhulu vha Joshua ṅwana wa Jotsadaka na vharathu vhawe ndi Maaseya na Eliesere na Jaribi na Gedalia.

¹⁹ Vhoṱhe vha ana uri vha ḓo ṱala vhasadzi vhavho, muṅwe na muṅwe a ṋekedza thutha i no bva kha sambi ḽawe ya vha tshipfumelo tsha mulandu.

²⁰ Kha vhaḓuhulu vha Imere ndi: Hanani na Zebadia.

²¹ Vhaḓuhulu vha Harimu ndi Maaseya na Elia na Shemaya na Jehiele na Uzia.

²² Vhaḓuhulu vha Phashuru ndi Elihwenai na Maaseya na Ishmaele na Nathaniele na Jozabadi na Elasa.

²³ Kha Vhalivi ndi Jozabadi na Shimei na Kelaya (ḽiṅwe u pfi Kelita) na Phethahia na Juda na Eliesere.

²⁴ Kha vhaimbi ndi Eliashibi. Kha vhalindi vha khoro ndi Shalumu na Telemu na Uri.

²⁵ Kha vhaṅwe Vhaisraele: Vhaḓuhulu vha Pharoshi ndi Ramia na Izia na Malikhiya na Miyamini na Eliasara na Malikhiya na Benaya.

²⁶ Vhaḓuhulu vha Elamu ndi Mathania na Zakaria na Jehiele na Abudi na Jeremotho na Elia.

²⁷ Vhaḓuhulu vha Zathu ndi Elihwenai na Eliashibi na Mathania na Jeremotho na Zabadi na Azisa.

²⁸ Vhaḓuhulu vha Bebai ndi Jehohanani na Hanania na Zabai na Athilai.

²⁹ Vhaḓuhulu vha Bani ndi Meshulamu na Malukhu na Adaya na Jashubu na Sheala na Jeremotho.

³⁰ Vhaḓuhulu vha Phahathi Muaba ndi Adina na Khelala na Benaya na Maaseya na Mathania na Betsaliele na Binui na Manase.

³¹ Vhaḓuhulu vha Harimu ndi Eliesere na Ishiya na Malikhiya na Shemaya na Simioni

³² na Benyamini na Malukhu na Shemaria.

³³ Vhaḓuhulu vha Hashumi ndi Mathenai na Mathatha na Zabadi na Eliphelete na Jeremai na Manase na Shimei.

³⁴ Vhaḓuhulu vha Bani ndi Maadai na Amuramu na Uele

³⁵ na Benaya na Bediya na Kheluhi

³⁶ na Vania na Miremotho na Eliashibi

³⁷ na Mathania na Mathenai na Jaasai.

³⁸ Vhaḓuhulu vha Binui ndi Shimei

³⁹ na Shelemia na Nathani na Adaya

⁴⁰ na Makhinadebai na Shashai na Sharai

⁴¹ na Asarele na Shelemia na Shemaria

⁴² na Shalumu na Amaria na Josefa.

⁴³ Vhaḓuhulu vha Nebo ndi Jeiele na Mathithia na Zabadi na Zebina na Jadai na Juele na Benaya.

⁴⁴ Vhoṱhe havho vho vha vho dzea vhasadzi vha vhatsinda; vho vha ṱala vha vha ṱuwisa na vhana vhavho.