ESRA 1 - BIVHILI KHETHWA Mafhungo Madifha

Khoreshe a tshi tendela mathubwa uri vha humele hayani havho (538 BC)

¹ Nga ṅwaha wa u thoma wa Khoreshe khosi ya Pheresia Muṋe washu o ita uri hu khunyelele zwe a zwi amba nga mulomo wa muporofita Jeremia. Muṋe washu a ritha mbilu ya Khoreshe khosi ya Pheresia uri a ṅwale ndaela hei i tou ḓivhadzwa hoṱhe muvhusoni wawe, ya ri:

² “Khoreshe khosi ya Pheresia u ri, ‘Yahavee Mudzimu wa ṱaḓulu o nkumedza mivhuso yoṱhe ya ḽifhasi, a dovha a mmbea uri ndi mu fhaṱele thembele Jerusalema kha ḽa Juda.

³ Muṅwe na muṅwe wa vhathu vhawe vha re vhukati haṋu, ngavhe Mudzimu a tshi vha nae, a mu litsha a gonya Jerusalema kha ḽa Juda a yo fhaṱa thembele ya Yahavee Mudzimu wa Israele, Mudzimu ane a luvhiwa Jerusalema.

⁴ Vhathu vha mashango oṱhe hune vho salaho u fa vha dzula hone zwino vho fanela u vha ṋea siliva na musuku na thundu na zwifuwo na zwine muthu a tou funa u ṋea, uri vha fhaṱe ngazwo thembele ya Mudzimu muḓini wa Jerusalema.’ ”

⁵ Ndi hone ṱhoho dza miṱa ya Juda na Benyamini na vhotshifhe na Vhalivi – muṅwe na muṅwe we Mudzimu a karusa mbilu yawe – vha tshi ḓilugisa u yo fhaṱa nnḓu ya Muṋe washu i re Jerusalema.

⁶ Vhahura vhoṱhe vha vha ṱhaḓula nga u vha ṋea zwithu zwa siliva na musuku na thundu na zwifuwo na zwifhiwa zwa mutengo muhulu na zwine muthu a tou ṋea nga u funa hawe.

⁷ Khosi Khoreshe a dovha a bvisa midzio ya thembele ya Muṋe washu, ye Nebukhadnetsara a i thuba Jerusalema a i vhea thembeleni ya mudzimu wawe.

⁸ Khoreshe khosi ya Pheresia a i kumedza Mithiridathi, ene mufaragwama, uyo a i vhalela Sheshebatsara muvhusi wa Juda.

⁹ Mutevhe wa midzio yeneyo ngoyu: ndilo dza musuku 30 ndilo dza siliva 1 000 zwidongo zwa siliva 29

¹⁰ zwinwelo zwa musuku 30 zwinwelo zwa siliva 410 miṅwe midzio 1 000

¹¹ Midzio ya musuku na siliva yoṱhe yo ṱangana ndi 5 400. Sheshebatsara o ḓa nayo yoṱhe heyo midzio musi mathubwa vha tshi pfuluwa Babele vha tshi vhuelela Jerusalema.