ESEKIELE 8 - BIVHILI KHETHWA Mafhungo Madifha

Bono ḽa midzimu isili i no rerelelwa Jerusalema

¹ Nga ṅwaha wa vhuṱanu na vhuthihi ri vhuthubwa Babele, nga ḓuvha ḽa vhuṱanu ḽa ṅwedzi wa vhuṱanu na vhuthihi, ndó dzula hayani na vhahulwane vha Juda, tshanḓa tsha Muṋe wa zwoṱhe Muṋe washu tsha nnziamedza.

² Ndi tshi sedza nda vhona tshithu tshi no nga munna. U bva he ha vha hu tshi nga ndi khundu dzawe u tsela fhasi a tshi tou vha mulilo; u bva khunduni dzawe u ya nṱha o vha a tshi penya unga musinaseṱha wo kulutedzwaho.

³ A ḓisa tshe tsha vha tshi tshi nga tshanḓa tshawe a mpfara nga mavhudzi; Muya a ntakulela nṱha a nkhwala a nnyisa Jerusalema ndi kha mabono a Mudzimu, a nnyisa tshifhingoni tsha khoro ya thungo ya devhula ya nga ngomu, ho imaho tshifanyiso tsha mudzimu usili wa u ṱunga mbiti dza Muṋe washu.

⁴ Henefho nda vhona vhugala ha Mudzimu wa Israele, sa zwe nda vhu vhona ngei govhani.

Mudzimu usili u ṱungaho Muṋe washu

⁵ A ri, “Iwe ṅwana wa muthu, lilala u sedze devhula.” Nda lilala nda sedza devhula, henefho thungo ya devhula ha khoro ya aḽiṱari, ho vha ho ima mudzimu wa tshifanyiso u tshi ṱunga Muṋe washu henefho tshifhingoni.

⁶ A ri, “Iwe ṅwana wa muthu, u khou zwi vhona zwine vha khou ita? U khou vhona zwi nengisaho zwine vhathu vha Israele vha khou ita fhano uri vha kundise vhathu u dzhena fhethu hanga hukhethwa? U kha ḓi ḓo vhona zwiṅwe zwihulu zwi nengisaho.”

U rerelela zwipuka

⁷ U bva henefho a nnyisa tshifhingoni tsha muṱa wa thembele. Nda sedza, nda vhona luvhondoni hu na buli.

⁸ A ri, “Iwe ṅwana wa muthu, pwasha luvhondo u phuletshedze.” Nṋe nda pwasha luvhondo nda phuletshedza, nda wana hu na vothi.

⁹ A ri, “Dzhena u vhone zwi nengisaho zwine vha khou ita hafho ngomu.”

¹⁰ Nṋe nda dzhena nda sedza, nda vhona tshakha dzoṱhe dza zwifanyiso zwa dziṋowa na zwipuka zwi nengisaho na midzimu yoṱhe ya zwifanyiso ya vhathu vha Israele yo olwa luvhondoni u mona nalwo.

¹¹ Phanḓa ha iyo midzimu ya zwifanyiso ho vha ho ima vhaṅwe vhahulwane vha 70 vha Vhaisraele, muṅwe na muṅwe o fara mudzio wa zwioro zwi dubiswaho, mutsi u nukhelelaho na zwioro u tshi khou duba. Na Jaasania ṅwana wa Shafani o vha e navho.

¹² A ri, “Iwe ṅwana wa muthu, wo vhona zwine vhahulwane vha vhathu vha Israele vha zwi ita tshiphirini, muṅwe na muṅwe e kamarani yawe ya midzimu ya zwifanyiso? Vha ri, ‘Yahavee ha ri vhoni; Yahavee o ṱutshela shango heḽino.’ ”

¹³ A ri, “U kha ḓi ḓo vhona zwiṅwe zwi no nengisesa zwine vha ita.”

U rerelela maanḓa a tsiko

¹⁴ Ndi hone a tshi nnzhia a nnyisa tshifhingoni tsha khoro ya devhula ya thembele ya Muṋe washu. Henefho ho vha ho dzula vhasadzi vha tshi khou lilela Thamusu.

¹⁵ A ri, “Iwe ṅwana wa muthu, u khou zwi vhona? U kha ḓi ḓo vhona zwi nengisaho u fhira izwo.”

U rerelela ḓuvha

¹⁶ Ndi hone a tshi nnyendedza a nnyisa muṱani wa nga ngomu wa thembele ya Muṋe washu. Henefho tshifhingoni tsha hukhethwa ha Muṋe washu, vhukati ha lufhera na aḽiṱari, ho vha hu na vhanna vhe vha vha vha tshi nga swika 25, vhó furalela hukhethwa ha Muṋe washu, vhó lavhelesa vhubvaḓuvha. Vho vha vho kotamela vhubvaḓuvha vha tshi khou rabela ḓuvha.

¹⁷ A mmbudza a ri, “Iwe ṅwana wa muthu, u khou zwi vhona? Zwoṱhe zwi nengisaho zwine vhathu vha Juda vha ita a zwi athu vha fusha. Vho phapha mbulu kha iṅwe vha ḓadza shango nga vhuvemu vha ḓi ṱunga mbiti dzanga zwa nga vha nṱunga nga davhi ḽa munḓirivhe.

¹⁸ Mbiti dzanga dzi fuḓa dzi tshi ya khavho; a thi nga khathutsheli muthu, a thi nga vha pfeli vhuṱungu. Vha nga ḓi ṱavha mukosi nga hune vha kona, ndi nga si vha thetshelese.”