ESEKIELE 4 - BIVHILI KHETHWA Mafhungo Madifha

Hu tshi porofitwa u govhelwa ha Jerusalema

¹ “Iwe ṅwana wa muthu, dzhia lubaba lwa vumba u lu vhee phanḓa hau; u ole muḓi wa Jerusalema khalwo.

² Wo no ralo u u govhele, u u tange nga mutsheṱo, u u khokhele thulwi dza mavu, u fhaṱe mishasha, u vhaḓe na thanda ndenya dza u thutha mitsheṱo yawo,

³ u konou dzhia tsimbi ya baphathi u ite mutsheṱo wa tsimbi vhukati hau na muḓi. U lwe nawo u u govhele iwe muṋe. Hetsho ndi tshiga tsha vhathu vha Israele.

⁴ “Lala nga lurumbu lwa tshamonde, u hwale vhuvhi ha vhathu vha Israele. Ndi funa uri u hwale vhuvhi havho maḓuvha manzhi wo lala henefho.

⁵ A vha Nṋe ndo vhea maḓuvha a vhuvhi havho a ita 390; maḓuvha eneo iwe u ḓo hwala vhuvhi ha vhathu vha Israele.

⁶ Musi maḓuvha eneo o no fhela, u dovhe u lale nga lurumbu lwa tshauḽa wa hwala vhuvhi ha vhathu vha Juda wa fhedza maḓuvha a 40. Ndo u vhetshela uri ḓuvha ḽithihi ḽi imele ṅwaha muthihi.

⁷ U lwe na muḓi wa Jerusalema u u govhele, u u finyele zwanḓa u u ṱunge, u porofite zwi no ḓo u wela.

⁸ Ndi ḓo u vhofha nga thambo wa si kone u rembuluwa u swika maḓuvha a u govhelwa hawo a tshi fhela.

⁹ “Zwenezwo u dzhie goroi na bali na ṋawa na ṱhumbe na mufhoho na luvhele, u zwi bike nga khali nthihi zwi vhe zwiḽiwa zwau. U zwi ḽe maḓuvha eneo oṱhe wo lala nga lurumbu, maḓuvha a 390.

¹⁰ U ḽe zwiḽiwa zwi no eḓana dzigiramu dza 230 nga ḓuvha.

¹¹ U nwe maḓi a si gathi, khavho mbili nga ḓuvha u tshi nwa nga zwiṱuku nga zwiṱuku.

¹² Iḽa izwo zwiḽiwa unga u tshi ḽa mukonde wa bali, u zwi bike hune vhathu vha u vhona, u zwi bike nga mupfudze wa vhathu.

¹³ U ambe u ri, ‘Yahavee Mudzimu wa Israele u ri: Vhaisraele vha ḓo ḽa zwiḽiwa zwavho zwo kumalaho nga u ralo, hoṱhe hune nda ḓo vha balanganya na dzitshakha.’ ”

¹⁴ Ndi hone nṋe tshi ri, “Muṋe wa zwoṱhe, Muṋe washu, nṋe a thi athu vhuya nda ḓikumadza. U bva hanani hanga u swika zwino, a thi athu vhuya nda ḽa tshidu kana tsho vhulawaho nga zwivhanda; mulomoni wanga a hu athu vhuya ha dzhena ṋama yo tshinyalaho.”

¹⁵ Ene a ri, “Ndi zwone, ndi ḓo u litsha wa bika zwiḽiwa zwau nga mupfudze wa kholomo, wa si tsha zwi bika nga wa vhathu.”

¹⁶ Ndi hone a tshi ri, “Iwe ṅwana wa muthu, ndi ḓo ita uri Jerusalema hu we nḓala; vha ḓo ḽa zwiḽiwa zwi no tou eliwa vha tshi ḽa mbilu, vha ḓo nwa maḓi o tou eliwa vha tshi tetemela.

¹⁷ Ndi uri zwiḽiwa na maḓi zwi ḓo shaea; vha ḓo fhela nga muthihi nga muthihi nga vhuvhi havho.”