ESEKIELE 11 - BIVHILI KHETHWA Mafhungo Madifha

U ḓihudza ha vhathu vho salaho Jerusalema

¹ Muya a ntakulela nṱha a nkhwala a nnyisa khoroni ya vhubvaḓuvha ya thembele ya Muṋe washu, khoro yo lavhelesaho vhubvaḓuvha. Henefho tshifhingoni tsha khoro ho vha ho ima vhanna vha 25, vhukati havho nda vhona Jaasania ṅwana wa Asuru na Phelatia ṅwana wa Benaya, vhone vharangaphanḓa vha vhathu.

² Muṋe washu a ri, “Iwe ṅwana wa muthu, havha ndi vhone vha no luka vhunwa, vha enda vha tshi anḓadza nyeletshedzo dzavho mmbi na Jerusalema.

³ Vha ri, ‘Ndi nnyi ane a ri tshino a si tshifhinga tsha u fhaṱa dzinnḓu? Khali ya u bika ndi muḓi houno, ṋama ndi riṋe.’

⁴ Zwenezwo porofita u tshi vha hanedza, porofita, iwe ṅwana wa muthu.”

⁵ Muya wa Muṋe washu a mbo wela kha nṋe, a mmbudza a ri, “Amba u ri, ‘Yahavee u ri: Ndi ḓivha zwine na khou zwi amba inwi vhathu vha Israele, ndi ḓivha zwine na elekanya mbiluni dzaṋu.

⁶ No ḓadza muḓi houno nga zwitumbu zwi si na mbalo zwa vhanna vho vhulawaho, na ḓadza mikoto yawo nga vhe na vha vhulaha.

⁷ Zwino-ha, Nṋe Muṋe wa zwoṱhe Yahavee ndi ri: Zwitumbu zwe na posa ngomu hawo ndi yone ṋama, khali ya u bika ndi muḓi; hone inwi ndi ḓo ni thatha na bva ngomu hawo.

⁸ Inwi ni ofha pfumo, Nṋe ndi ḓo ḽi vhidza ḽa ḓa ḽa ni ḽa – hu amba Nṋe Muṋe wa zwoṱhe Yahavee.

⁹ Ndi ḓo ni thatha na bva muḓini nda ni kumedza vhatsinda, ndi ḓo ni rwa nga ṱhamu ye nda ni vhetshela yone;

¹⁰ ni ḓo ḽiwa nga pfumo ngei masakhani a Israele; ndi ḓo ni ita zwo ni teaho; ndi hone ni tshi ḓo zwi ḓivha uri ndi Nṋe Yahavee.

¹¹ Muḓi houno a u nga ḓo vha khali ya u ni tsireledza, na inwi a ni nga vhi ṋama ngomu hawo; ndi ḓo ni ita zwo ni teaho ngei masakhani a Israele;

¹² ndi hone ni tshi ḓo zwi ḓivha uri ndi Nṋe Yahavee we na si tevhedze milayo yawe, na si thetshelese ndaela dzawe; tshaṋu ho vha u edzisa maitele a tshakha dzo ni tangaho.’ ”

¹³ Zwino musi ndi tshi khou porofita, Phelatia ṅwana wa Benaya a mbo ḓi wa a fa. Nṋe nda shuvhama nda lila nda tou ṱavha mukosi nda ri, “Yawee Muṋe wa zwoṱhe Muṋe washu, u ṱoḓa u swiela tsalela dzoṱhe dza Israele naa?”

Mathubwa a tshi fulufhedziswa mulanga muswa

¹⁴ Ipfi ḽa Muṋe washu ḽa amba na nṋe ḽa ri,

¹⁵ “Iwe ṅwana wa muthu, vha hau, mashaka au, vhathu vhoṱhe vha Israele vha re fhano Babele, vha ambiwa nga vho salaho Jerusalema vha pfi, ‘Inwi no no vha kulesa na Muṋe washu; shango ḽo ṋewa rine ḽa vha ḽashu.’

¹⁶ Zwenezwo ambani ni ri, ‘Muṋe wa zwoṱhe Yahavee u ri: Ndi zwone, ndo vha isa kule vhukati ha dzitshakha, nda vha balanganya na mashango a kule; zwenezwo Nṋe nda vha hukhethwa havho tshifhinganyana henengei mashangoni e vha ya khao.’

¹⁷ Ni ri, ‘Muṋe wa zwoṱhe Yahavee u ri: Ndi ḓo ni kuvhanganya nda ni bvisa mashangoni e na vha no balanganywa nao, nda ni ṋea shango ḽa Israele.’

¹⁸ Vha ḓo humela khaḽo, vha ḓo thutha midzimu yaḽo yoṱhe i nengisaho na zwitungulo zwa dzitshika.

¹⁹ Ndi ḓo vha ṋea mbilu nthihi, nda longa muya muswa khavho. Ndi ḓo sudzulusa mbilu ya tombo mivhilini yavho, nda vha ṋea mbilu ya ṋama,

²⁰ uri vha vhulunge milayo yanga, vha thetshelese ndaela dzanga vha dzi tevhedze. Ndi hone vha tshi ḓo vha vhathu vhanga, Nṋe nda vha Mudzimu wavho.

²¹ Hone vhane mbilu dzavho dza luvha midzimu ya zwifanyiso i nengisaho na zwitungulo zwa tshika zwe vha ita, ndi ḓo ita uri zwi vha ḽe ṱhoho, hu amba Nṋe Muṋe wa zwoṱhe Yahavee.”

Lupenyo lwa Muṋe washu lu tshi pfuluwa Jerusalema

²² Ndi hone vhakherube vha tshi ṱharamudza phapha dzavho, milinga ya takuwa navho, lupenyo lwa Mudzimu wa Israele lu nṱha havho.

²³ Lupenyo lwa Muṋe washu lwa takuwa lwa ṱuwa muḓini, lwa ima nṱha ha thavha vhubvaḓuvha ha muḓi.

²⁴ Muya a ntakulela nṱha ndi kha bono, ndi Muyani wa Mudzimu, a nnyisa ngeno ha Vhakhaladia hu dzulaho mathubwa, ḽiḽa bono ḽe nda ḽi vhona ḽa mbo ḓi nṱutshela;

²⁵ ndi hone ndi tshi vhudza mathubwa zwoṱhe zwe Muṋe washu a ntsumbedza.