EKISODA 5 - BIVHILI KHETHWA Mafhungo Madifha

Mushe na Aroni vhe phanḓa ha khosi ya Egipita

¹ Ngavhuya Mushe na Aroni vha ṱuwa vha ya ha Farao vha mu vhudza vha ri, “Yahavee Mudzimu wa Israele o ri, ‘Litsha vhathu vhanga vha ṱuwe vha ye phangani vha yo ita vhuṱambo ha u nnduvha.’ ”

² Farao a fhindula a ri, “Yahavee ndi nnyi, ane nda fanela u mu thetshelesa nda litsha Vhaisraele vha ṱuwa? Yahavee a thi mu ḓivhi nahone a thi nga litshi Vhaisraele vha ṱuwa.”

³ Vha fhindula vha ri, “Mudzimu wa Vhaheberu o ḓa u ṱangana na riṋe. Nga vha ri tendele-ha ri fare lwendo lwa maḓuvha mararu ri ye sogani ri yo ṋekedza Yahavee Mudzimu washu tshiṱhavhelo, a sa ḓo ri ḓisela dwadze kana a ri fhedza nga pfumo.”

⁴ Khosi ya Egipita ya vha vhudza ya ri, “Mushe na Aroni, khezwi ni tshi ṱoḓa u litshisa vhathu mushumo wavho? Humelani mushumoni waṋu.”

⁵ Farao a dovha a ri, “Vhathu avha vho no andesa, zwino ni vho ṱoḓa u vha litshisa na mushumo?”

Mushumo u tshi engedzwa

⁶ Musi wonoyo Farao a laya vhalangi vha dziphuli vha Vhaegipita na vhalavhelesi vha Vhaisraele a ri,

⁷ “U swika zwino no vha ni tshi ṋea vhathu havha maṱanga a u foroma zwidina. Ni songo tsha vha ṋea maṱanga, vha litsheni vha yo kuvhanganya maṱanga vhone vhaṋe.

⁸ Naho zwo ralo ni vhone uri tshivhalo tsha zwidina tshi ḓi vha tshenetshiḽa, ni songo vhuya na fhungudza. Vha a bvafha, ndi zwine tshililo tshavho tsha ri, ‘Ri litsheni ri yo ṋekedza Mudzimu washu tshiṱhavhelo.’

⁹ Vhanna havha vha shumiseni lwa u tou kalula, uri vha si wane tshifhinga tsha u thetshelesa mazwifhi.”

¹⁰ Vhalangaphuli vha Vhaegipita na vhalavhelesi vha Vhaisraele vha bva vha yo amba na Vhaisraele vha ri, “Farao o amba a ri, ‘A thi nga ni ṋei maṱanga.

¹¹ Ibvani ni yo kuvhanganya maṱanga inwi vhaṋe hune na nga a wana hone. Hone tshivhalo tsha zwidina tshi ḓi vha tshenetshiḽa.’ ”

¹² Ndi hone vhathu vha tshi balangana na shango ḽa Egipita u yo kuvhanganya zwiguthe zwa maṱanga.

¹³ Vhashumisi vha dziphuli vha vha kombetshedza vha ri, “Ḓuvha ḽiṅwe na ḽiṅwe tshaṋu ndi u foroma zwidina zwenezwiḽa zwe na vha ni tshi foroma ni tshi kha ḓi ṋewa maṱanga.”

¹⁴ Vhashumisaphuli vha Vhaegipita vha rwa vhalavhelesi vha Vhaisraele vhe vha vha vho vha vhea uri vha lavhelese mushumo, vha ri, “Khezwi ṋamusi ni songo foroma zwidina zwi no lingana na zwiḽa zwa kale?”

Vhalavhelesi vha Vhaheberu vha tshi gungula

¹⁵ Vhalavhelesi vha Vhaisraele vha ya ha Farao vha gungula, vha ri, “Khezwi vha tshi ri tambudza nga u rali?

¹⁶ A vha ri ṋei maṱanga, naho zwo ralo hu ḓi pfi, ‘Itani zwidina!’ Zwino ro ita na u rwiwa! Ro khakhelwa vhafuwi!”

¹⁷ Ene a fhindula a ri, “Ni a bvafha, a hu na zwiṅwe, ndi zwine na ri ndi ni litshe ni ṱuwe ni yo ṋekedza Yahavee tshiṱhavhelo.

¹⁸ Ni mbo ḓi humela mushumoni waṋu. A ni nga ḓo ṋewa maṱanga, hone no fanela u ḓi swikisa mbalo yeneiḽa ya zwidina.”

Vhalavhelesi vha tshi hanganea

¹⁹ Vhalavhelesi vha Vhaisraele vho vhona zwithu zwi tshi vho vhifha musi vha tshi vhudzwa upfi a vha nga fhungudzelwi tshivhalo tsha zwidina zwine vha fanela u zwi foroma nga ḓuvha.

²⁰ Musi vha tshi ṱuwa ha Farao vha ṱangana na Mushe na Aroni vha wana vhó vha lindela.

²¹ Vha vhudza Mushe na Aroni vha ri, “Ngavhe Muṋe washu a tshi vhona zwe na ita a ni lifhedza nga he zwa ni fanela! No ri vhengisa nga Farao na magota awe. No vha ṋea pfumo ḽa u ri vhulaha.”

²² Mushe a dovha a rembulutshela ha Muṋe washu a mu vhudza a ri, “Muṋe wa zwoṱhe, ndi mini u tshi itela vhathu avha tshiṱuhu? Ndi mini wo nthuma fhano?

²³ Tshee nda swika ha Farao nda amba nae nga dzina ḽau, o thoma u tambudza lushaka ulu, hone Iwe a hu na tshe wa ita u lamulela vhathu vhau.”