EKISODA 40 - BIVHILI KHETHWA Mafhungo Madifha

U akha dennde ya u ṱangana na Muṋe washu

¹ Muṋe washu a vhudza Mushe a ri,

² “Nga ḓuvha ḽa u ranga ḽa ṅwedzi wa u ranga u imise dennde ya u ṱangana na Nṋe.

³ Ngomu hayo u longe mbulungelo i re na Milayo ya fumi, u nembeledze pesa ḽa lupila phanḓa hayo.

⁴ U dzhenise ḓafula u vhee thundu dzaḽo nṱha haḽo. U dzhenise na tshivheambone, nṱha hatsho u vhee mbone.

⁵ Phanḓa ha mbulungelo u vhee aḽiṱari ya musuku ya u fhisela zwioro, u nembeledze pesa ḽa lupila muṋangoni wa dennde.

⁶ Phanḓa ha dennde u vhee aḽiṱari ya u fhisela zwiṱhavhelo.

⁷ U vhee sambelo vhukati ha dennde na aḽiṱari u ḽi ḓadze maḓi.

⁸ U ite muṱa u mona na dennde, u nembeledze pesa ḽa lupila muṋangoni wa muṱa.

⁹ “Wo no fhedza u nkumedze iyo dennde na thundu yayo yoṱhe nga u i shela mapfura makhethwa, ndi hone i tshi ḓo vha khethwa.

¹⁰ Wo no fhedza izwo u nkumedze aḽiṱari na thundu yayo yoṱhe nga u i shela mapfura, ndi hone i tshi ḓo vha khethwa tshoṱhe.

¹¹ U nkumedze na sambelo na tshiraho tshaḽo nga u ralo.

¹² “U ḓise Aroni na vhana vhawe muṋangoni wa dennde ya u ṱangana na Nṋe, u vha vhudze vha ṱambe.

¹³ U ambadze Aroni zwiambaro zwikhethwa, u mu ḓodze mapfura, u nkumedze ene, uri a ntshumele e tshifhe.

¹⁴ U ḓise vhana vhawe u vha ambadze dzihemmbe.

¹⁵ Wo no ralo u kone u vha ḓodza mapfura, zwi nge u tshi ḓodza khotsi avho mapfura, uri vha ntshumele vhe vhotshifhe. U ḓodzwa mapfura uho hu ḓo vha ita vhotshifhe, vhone na vhana vhavho vha vha vhotshifhe lini na lini.”

¹⁶ Mushe a ita zwoṱhe nga he Muṋe washu a mu laya; ho ngo siedza na tshithihi.

¹⁷ Nga ḓuvha ḽa u ranga ḽa ṅwedzi wa u ranga wa ṅwaha wa vhuvhili tshee vha pfuluwa Egipita, dennde ya u ṱangana na Mudzimu ya imiswa.

¹⁸ Mushe a longa zwiraho zwayo vhudzuloni hazwo, a imisa thikho dzayo, a longa mbalelo dza u rambalala dza tsimbi, a imisa phuphu dzayo.

¹⁹ Mushe a fulela iyo dennde, nṱha a fukedza lupila lwa nnḓa, nga he Muṋe washu a mu laya.

²⁰ Ndi hone a tshi dzhia aḽa maḓaba mavhili a milayo a dzi longa ngomu ha mbulungelo. A longa thanda kha mikungelo ya mbulungelo, a i tiba nga tshitibo.

²¹ Ndi hone a tshi longa mbulungelo ngomu ha dennde, a nembeledza pesa ḽa lupila. U ralo ha vha u pila mbulungelo, nga he Muṋe washu a mu laya.

²² Mushe a longa ḓafula denndeni ya u ṱangana na Mudzimu, thungo ya devhula nnḓa ha pesa ḽa lupila,

²³ nṱha haḽo a vhea vhurotho vhune ha ṋekedzwa Muṋe washu, nga he Muṋe washu a mu laya.

²⁴ A vhea tshivheambone ngomu denndeni ya u ṱangana na Mudzimu, thungo ya tshipembe, u livhana na ḓafula.

²⁵ Henefho phanḓa ha Muṋe washu a funga mbone, nga he Muṋe washu a mu laya.

²⁶ A vhea aḽiṱari ya musuku ngomu ha dennde ya u ṱangana na Mudzimu, phanḓa ha pesa ḽa lupila,

²⁷ a fhisa zwioro, nga he Muṋe washu a mu laya.

²⁸ A nembeledza pesa ḽa lupila muṋangoni wa dennde,

²⁹ henefho phanḓa ha pesa ḽa lupila a vhea aḽiṱari ya u fhisela zwiṱhavhelo. Henefho nṱha hayo a ṋekedza tshiṱhavhelo tshi fhiswaho na nduvho ya thoro, nga he Muṋe washu a mu laya.

³⁰ A vhea sambelo vhukati ha dennde ya u ṱangana na Mudzimu na aḽiṱari, a ḽi ḓadza maḓi a u ṱamba.

³¹ Mushe na Aroni na vhana vhawe vha ḓi ṱamba zwanḓa na milenzhe henefho,

³² misi yoṱhe vha tshi dzhena denndeni ya u ṱangana na Mudzimu kana vha tshi ya aḽiṱarini, nga he Muṋe washu a laya.

³³ Mushe a ita muṱa wa u tanga dennde na aḽiṱari, a nembeledza pesa ḽa lupila muṋangoni wa muṱa. Mushe a vha o khunyeledza mushumo woṱhe.

Muṋe washu a tshi dzhena Hukhethwa

³⁴ Ndi hone hu tshi ḓa gole ḽa tiba dennde ya u ṱangana na Mudzimu, ya ḓala lupenyo lwa Muṋe washu.

³⁵ Mushe a kundwa u dzhena denndeni ya u ṱangana na Mudzimu nge gole ḽa vha ḽi nṱha hayo na nge ya vha yo ḓala lupenyo lwa Muṋe washu.

Vhaisraele vha tshi endedzwa nga gole

³⁶ Hoṱhe he Vhaisraele vha vha vho fara lwendo, musi gole ḽi tshi takuwa nṱha ha dennde, na vhone vho vha vha tshi takuwa vha tshimbila.

³⁷ Arali gole ḽi songo takuwa vho vha vha tshi lindela, vha si tshimbile ḽa vhuya ḽa takuwa.

³⁸ Ndi uri gole ḽa Muṋe washu ḽo vha ḽi tshi vhonala ḽi nṱha ha dennde masiari, vhusiku hu tshi penya mulilo ngomu ha gole, Vhaisraele vhoṱhe vha tshi zwi vhona hoṱhe he vha tshimbila.