EKISODA 39 - BIVHILI KHETHWA Mafhungo Madifha

Hu tshi itwa zwiambaro zwa vhotshifhe

¹ Vha ita zwiambaro zwa maṱeleṱele nga denga na muridili na vhukuse vhutswuku zwine vhotshifhe vha ḓo ambara musi vha tshi shuma hukhethwa. Vha itela Aroni zwiambaro zwikhethwa zwa vhutshifhe sa zwe Muṋe washu a laya Mushe.

² Vha ita bannda ya u pakata nga lukhaha lwavhuḓi na denga na muridili na vhukuse vhutswuku na ṱhale dza musuku.

³ Vha fula mapesa a musuku, vha a tumukanya a ita mbemba dza u mometshedza kha lukhaha lwavhuḓi na kha denga na muridili na vhukuse vhutswuku, wa vhonala u mushumo wa mutsila.

⁴ Vha ita zwibannda zwivhili zwa mahaḓani vha tshi itela bannda ya u pakata vha zwi rungelela masia ayo uri i kone u pfuṋelwa.

⁵ Kha bannda ya u pakata ho rungelelwa bannda yo lukiwaho zwavhuḓi, yo itwaho nga zwi fanaho na zwenezwo, uri i vhe tshipiḓa tshithihi nayo, nga he Muṋe washu a laya Mushe.

⁶ Vha lugisa matombo a onikisi vha a govhela nga thale dza musuku; a tsheṱiwa madzina a fumi na mavhili a vhana vha Israele nga nḓila ya vhutsila.

⁷ Vha a nambatedza kha kubannda kwa mahaḓani kwa bannda ya u pakata uri a humbudze Mudzimu matsinde a 12 a vhathu vha Israele, nga he Muṋe washu a laya Mushe.

Hu tshi itwa tshipilakhana

⁸ Vha ita tshipilakhana nga zwithu zwi fanaho na zwenezwo zwe vha ita ngazwo bannda ya u pakata na makolo a fanaho na eneaḽa.

⁹ Masia oṱhe o vha a tshi eḓana nahone dzi mbemba mbili, vhunavha vhu senthimitha dza 25, vhuphara vhu senthimitha dza 25.

¹⁰ Vha mometshedza miduba miṋa ya matombo a mutengo muhulu khatsho: kha muduba wa u ranga vha nambatedza rubi na thophasi na ganethe;

¹¹ kha muduba wa vhuvhili vha nambatedza muroxwe na safire na daimane;

¹² kha muduba wa vhuraru vha nambatedza hiyasinthi na agathi na amethisi;

¹³ kha muduba wa vhuṋa vha nambatedza berili na onikisi na jasipere. Ayo a govhelwa nga thale dza musuku.

¹⁴ Ḽiṅwe na ḽiṅwe ḽa matombo ayo a 12 ḽo vha ḽo tsheṱiwa dzina ḽa muṅwe wa vhana vha Israele zwi tshi imela matsinde a 12 a vhathu vha Israele.

¹⁵ Tshipilakhana vha tshi itela dzigeḓane nga musuku u songo vangiwaho, wo sombiwa unga ṱhale.

¹⁶ Vha ita maluvha mavhili a musuku na rinngi mbili dza musuku, idzo rinngi mbili vha dzi rungelela kha khuḓa dza nṱha dza tshipilakhana.

¹⁷ Vha pfuṋela dziḽa ṱhale mbili dza musuku kha idzo rinngi mbili,

¹⁸ ṱhodzi dziṅwe mbili dza idzo ṱhale vha dzi pfuṋela kha ayo maluvha mavhili, nga u ralo vha dzi pfuṋela nga phanḓa kha zwibannda zwa mahaḓani zwa bannda ya u pakata.

¹⁹ Vha ita rinngi mbili dza musuku vha dzi rungelela kha khuḓa dza fhasi dza tshipilakhana kha lumeme lwa ngomu ha bannda ya u pakata.

²⁰ Vha ita dziṅwe rinngi mbili dza musuku vha dzi rungelela kha tshipiḓa tsha fhasi tsha phanḓa ha izwo zwibannda zwa mahaḓani zwivhili zwa bannda ya u pakata, tsini ha lupendelo, nṱha ha bannda iḽa yo lukwaho zwavhuḓi.

²¹ Vha vhofhekanya dzirinngi dza tshipilakhana na dzirinngi dza bannda ya u pakata nga ṱhale dza denga, sa zwenezwiḽa zwe Muṋe washu a laya Mushe, uri tshipilakhana tshi dzule nṱha ha bannda, tshi si rembeḓe.

Hu tshi itwa zwiṅwe zwiambaro zwa tshifhe

²² Phuraphura ine ya ḓa nṱha ha bannda ya u pakata yo vha yo lukwa nga vhukuse ha denga.

²³ Buli ḽa ṱhoho ḽo vha ḽo khwaṱhiswa nga lubomo lwo lukiwaho uri ḽi si kheruwe.

²⁴ Vha ṱama lupendelo lwa fhasi lwa phuraphura nga zwivhuvhi zwa denga na muridili na vhukuse vhutswuku na lukhaha lwavhuḓi lwo lukiwaho.

²⁵ Vha ita na dziḓilogo dza musuku u songo vangiwaho vha dzi vhea u mona na lupendelo lwa fhasi lwa phuraphura vhukati ha zwivhuvhi,

²⁶ dziḓilogo na zwivhuvhi zwo ṱoredzana hoṱhe u mona na lupendelo lwa fhasi lwa phuraphura ya mushumo, nga he Muṋe washu a laya Mushe.

²⁷ Vha ita hemmbe dza Aroni na vhana vhawe,

²⁸ na muthini na gebisi na shothi dza lukhaha,

²⁹ na bannda ya lukhaha lwavhuḓi na denga na muridili na vhukuse vhutswuku, zwo ṱamiwa nga makolo, nga he Muṋe washu a laya Mushe.

³⁰ Vha ita na phuleithi, tshone tshiga tshikhethwa tsha u ḓikumedza, nga musuku u songo vangiwaho, vha ṅwala khayo vha ri, “ndo kumedzwa yahavee.”

³¹ Vha tshi vhofhelela nga phanḓa ha muthini nga luṱale lwa denga, nga he Muṋe washu a laya Mushe.

Mushumo u tshi khunyeledzwa

³² Mushumo woṱhe wa dennde ya u ṱangana na Mudzimu wa khunyeledzwa. Vhaisraele vha ita zwoṱhe nga he Muṋe washu a laya Mushe vha si siedze na tshithihi.

³³ Vha ḓisa iyo dennde ha Mushe na thundu dzayo dzoṱhe, dzihuka dzayo na thikho dzayo na mbalelo dzayo dza tsimbi na phuphu dzayo na zwiraho zwayo,

³⁴ na vhupila ha mukumba wa thutha ho fhomiwa nga phomo tswuku, na vhupila ha mukumba wo sukiwaho; pesa ḽa u pila,

³⁵ na mbulungelo ya milayo na thanda dzayo na tshitibo tshayo,

³⁶ na ḓafula na thundu dzaḽo dzoṱhe na vhurotho vhune ha ṋekedzwa Mudzimu;

³⁷ tshivheambone tsha musuku u songo vangiwaho na mbone dzatsho na thundu dzatsho dzoṱhe na mapfura a mbone,

³⁸ na aḽiṱari ya musuku na mapfura a u ḓodza, na zwioro; na pesa ḽa lupila lwa muṋango wa dennde,

³⁹ na aḽiṱari ya musinaseṱha na tshiṱhaṱhi tshayo tsha musinaseṱha na thanda dzayo na thundu dzayo dzoṱhe, na sambelo na tshiraho tshaḽo,

⁴⁰ na mapesa a u pila muṱa na phuphu dzawo na zwiraho, na pesa ḽa muṋango wa muṱa na thambo dzaḽo, na khokho dza dennde na thundu yoṱhe ine ya shuma denndeni,

⁴¹ na zwiambaro zwa maṱeleṱele zwine vhotshifhe vha zwi ambara vhe fhethu hukhethwa, zwiambaro zwikhethwa zwa tshifhe Aroni na vhana vhawe.

⁴² Vhaisraele vho ita mushumo woṱhe nga he Muṋe washu a laya Mushe.

⁴³ Mushe a sedza zwoṱhe a vhona uri zwoṱhe vho zwi ita nga he Muṋe washu a laya. Ndi hone Mushe a tshi vha shudufhadza.