EKISODA 37 - BIVHILI KHETHWA Mafhungo Madifha

Hu tshi itwa mbulungelo

¹ Betsalele a vhaḓa mbulungelo nga thanda ya muunga, vhunavha hayo ha ita mitha na kotara, vhuphara ya ita senthimitha dza 75, vhulapfu u ya nṱha ya ita senthimitha dza 75.

² Ngomu hayo na nnḓa a i fhoma musuku u songo vangiwaho, a i itela lubomo lwa musuku u mona nayo.

³ A i itela mikungelo miṋa ya musuku ya u i hwala, a i mometshedza kha milenzhe yayo miṋa, sia ḽiṅwe na ḽiṅwe ḽi na mikungelo mivhili.

⁴ A vhaḓa thanda dza u i hwala nga thanda ya muunga, dza fhomiwa musuku,

⁵ a dzi longa kha mikungelo sia ḽiṅwe na ḽiṅwe ḽa mbulungelo uri i hwalwe ngadzo.

⁶ A ita tshitibo nga musuku u songo vangiwaho, vhunavha hatsho tsha ita mitha na kotara, vhuphara tsha ita senthimitha dza 75.

⁷ A vhumba vhakherube vhavhili nga musuku wo fuliwaho,

⁸ a vhea muthihi sia ḽino ḽa tshitibo, muṅwe sia ḽiḽa ḽatsho. A vha ita uri vha vhe tshipiḓa tshithihi na tshitibo.

⁹ Avho vhakherube vha lavhelesana vhe nṱha ha itsho tshitibo, phapha dzavho dzó ṱharamuwa dza tshi tibedza.

Hu tshi itwa ḓafula ḽa vhurotho vhu no ṋekedzwa Mudzimu

¹⁰ Betsalele a vhaḓa ḓafula nga thanda ya muunga, vhunavha haḽo ḽa vha mitha, vhuphara ḽa vha hafu ya mitha, vhulapfu u ya nṱha ḽa vha senthimitha dza 75.

¹¹ A ḽi fhoma musuku u songo vangiwaho, a ḽi itela lubomo lwa musuku u mona naḽo.

¹² A ḽi itela mulinga wa vhuphara ha milimitha dza 75 u mona naḽo, a mometshedza lubomo lwa musuku u mona na uyo mulinga.

¹³ A ḽi itela mikungelo miṋa ya u fara ya musuku, a i mometshedza khuḓani dzayo nṋa, hune ha vha na milenzhe.

¹⁴ Mikungelo ya u fara thanda dza u hwala iḽo ḓafula yo vha yo vhewa tsini ha mulinga.

¹⁵ Idzo thanda dza u hwala mbulungelo a dzi vhaḓa nga thanda ya muunga a dzi fhoma musuku.

¹⁶ A fula thundu dza ḓafula nga musuku u songo vangiwaho: dzindilo na zwidongo na dzimvuvhelo na midzio ya u tevhula nduvho ya waini.

Hu tshi itwa tshivheambone

¹⁷ Betsalele a ita tshivheambone nga musuku u songo vangiwaho. A ita tshiraho tshatsho na tsinde ḽatsho nga musuku wo fuliwaho. Maluvha atsho na pfungwi na nḓevhe, zwo vha zwi tshipiḓa tshithihi natsho.

¹⁸ Ha ṱoṱomowa matavhi maṱanu na ḽithihi nga matungo atsho, mararu e sia ḽino, mararu e kha ḽiḽa.

¹⁹ Ḽiṅwe na ḽiṅwe ḽa ayo matavhi maṱanu na ḽithihi ḽo vha ḽi na maluvha mararu o ḽi ṱamaho o vhumbea unga mualimondo u tshi fhufhumisa, e na pfungwi na nḓevhe.

²⁰ Tsinde ḽa tshivheambone ḽo vha ḽi na maluvha maṋa o ḽi ṱamaho o vhumbea unga mualimondo u tshi fhufhumisa, e na pfungwi na nḓevhe.

²¹ Ho vha hu na pfungwi nthihi fhasi ha matavhi mavhili a u thoma o ṱoṱomowaho a tshi bva kha tshivheambone, ḽiṅwe ḽi fhasi ha matavhi mavhili a tevhelaho, ḽiṅwe ḽi fhasi ha matavhi mavhili a u fhedzisela, matavhi oṱhe e maṱanu na ḽithihi.

²² Pfungwi na matavhi na tshivheambone zwo vha zwo momekana zwo fulwa musuku u songo vangiwaho.

²³ A ita mbone ṱhanu na mbili dza tshivheambone, a ita na zwiṱunyi zwatsho na zwifaredzi nga musuku u songo vangiwiho.

²⁴ O ita tshivheambone na zwithu zwatsho zwoṱhe nga musuku u songo vangiwiho wa khilogiramu dza 35.

Hu tshi fhaṱiwa aḽiṱari ya u fhisela zwioro

²⁵ Betsalele a fhaṱa aḽiṱari nga thanda ya muunga, ya vha ya u fhisela zwioro. Masia oṱhe ayo o vha a tshi eḓana, vhunavha hayo vhu hafu ya mitha, vhuphara vhu hafu ya mitha, vhulapfu u ya nṱha vhu mitha. Ṋanga dzayo khuḓani dzayo nṋa dzo vha dzo momekana nayo.

²⁶ A fhoma nṱha hayo na masia ayo maṋa oṱhe na ṋanga dzayo nga musuku u songo vangiwaho, a i mometshedza lubomo lwa musuku u mona nayo.

²⁷ A i itela mikungelo mivhili ya musuku ya u hwala ngayo, a i mometshedza fhasi ha lubomo masia mavhili, uri i kone u fara thanda dzine ya hwalwa ngadzo.

²⁸ Idzo thanda o dzi vhaḓa nga thanda ya muunga, a dzi fhoma musuku.

Hu tshi itwa mapfura a u ḓodza na zwioro

²⁹ Betsalele a ita na mapfura makhethwa a u ḓodza na zwioro, a zwi ṱanganya na mapfura a u ḓola sa muvangi mukoni.