EKISODA 36 - BIVHILI KHETHWA Mafhungo Madifha

¹ “Betsalele na Oholiaba na vhaṅwe vhatsila vhoṱhe vhe Muṋe washu a vha ṋea vhutsila na ṱhalukanyo, vhane vha ḓivha u ita zwoṱhe zwi ṱoḓeaho kha u fhaṱa dennde heyo khethwa, vha ite zwoṱhe nga he Muṋe washu a laya.”

Vhathu vha tshi ḓisa zwifhiwa zwinzhi

² Mushe a vhidza Betsalele na Oholiaba na vhaṅwe vhoṱhe vhanna vha vhatsila vhe Muṋe washu a vha ṋea vhukoni, khathihi na vhoṱhe vhe vha pfa mbilu dzi tshi tou zwi funa, Mushe a vha vhudza uri vha thome mushumo.

³ Ene a vha ṋea nduvho dzoṱhe dze Vhaisraele vha dzi ḓisa uri dzi fhaṱe dennde. Hone Vhaisraele vha ḓi ḓisela Mushe nduvho dzavho, musi muṅwe na muṅwe ḽi tshi tsha.

⁴ Ndi hone vhatsila vhe vha vha vha tshi khou shuma vha tshi ya

⁵ vha vhudza Mushe vha ri, “Vhathu vha khou ḓisa zwi no fhira zwine zwa ṱoḓea kha mushumo we Muṋe washu a laya uri u itwe.”

⁶ Ndi hone Mushe a tshi isa ndaela mishashani yoṱhe uri hu songo vha na ane a kha ḓi bvisa tshithu tsha dennde khethwa; zwenezwo vhathu vha si tsha dovha u ḓisa.

⁷ Zwe zwa vha zwo no ḓi ḓiswa zwo vha zwo eḓana u fhedzisa mushumo woṱhe zwa dovha zwa sala.

Hu tshi fhaṱwa dennde ya u ṱangana na Muṋe washu

⁸ Vhatsila vha konesaho kha avho vhe vha vha vha tshi khou shuma vha fhaṱa dennde ya u ṱangana na Mudzimu. Vha i fhaṱa nga mbemba dza fumi dza lukhaha vhukuma lwo lukiwa nga denga na muridili na vhukuse vhutswuku, lwa oliwa makolo a vhakherube.

⁹ Luvhemba luṅwe na luṅwe lwo vha lu tshi eḓana masia oṱhe, vhunavha lu mitha dza 14, vhuphara lu mitha mbili.

¹⁰ Vha rungekanya mbemba ṱhanu dza ita pesa ḽithihi, mbemba dziḽa dziṅwe ṱhanu na dzone vha ḓi dzi rungekanya-vho dza ita pesa ḽithihi.

¹¹ Vha ita nkhwe dza sila ḽa denga lumemeni lwa luvhemba lwa nnḓa kha pesa ḽiṅwe na ḽiṅwe.

¹² Vha rungelela nkhwe dza 50 kha luvhemba lwa u thoma lwa pesa ḽa u thoma na nkhwe dza 50 dzi no fana nadzo kha luvhemba lwa u fhedzisela lwa pesa ḽa vhuvhili. Nkhwe dzo vha dzo vhambela.

¹³ Vha ita dzihuka dza 50 dza musuku dzine dza farakanya ayo mapesa mavhili a ita ḽithihi, uri dennde i vhe nthihi yoṱhe.

¹⁴ Zwino vha konou ita lupila lwa u fukedza dennde nga mbemba dza 11 dza sila ḽo itwaho nga vhukuse ha mbudzi.

¹⁵ Dzoṱhe dza eḓana, vhunavha dza vha mitha dza 15, vhuphara dza vha mitha mbili.

¹⁶ Vha rungekanya mbemba ṱhanu dza ita pesa ḽithihi, dziḽa dziṅwe ṱhanu na nthihi vha dzi rungekanya-vho dza ita pesa ḽithihi.

¹⁷ Vha rungelela nkhwe dza 50 lumemeni lwa luvhemba lwa u fhedzisela lwa pesa ḽa u thoma, na nkhwe dza 50 lumemeni lwa luvhemba lwa u fhedzisela lwa pesa ḽa vhuvhili.

¹⁸ Vha ita huka dza 50 dza musinaseṱha dza u farakanya ayo mapesa mavhili uri a vhe lupila luthihi.

¹⁹ Vha ita dziṅwe phila mbili, luṅwe lwa itwa nga mukumba mutswuku wa thutha, luṅwe lwa itwa nga mukumba wo sukwaho, lwa ita lupila lwa nnḓa.

²⁰ Vha ita thikho dza dennde nga muunga dza tou tswiti.

²¹ Thikho iṅwe na iṅwe yo vha i na vhulapfu ha mitha ṱhanu na vhuphara ha senthimitha dza 75,

²² na mikungelo mivhili i fanaho, uri idzo thikho dzi kone u farakana. Thikho dzoṱhe dzo vha dzi na mikungelo yeneyo.

²³ Vha vhaḓa thikho dza 20 dza sia ḽa tshipembe,

²⁴ na zwiraho zwa 40 zwi no dzhena fhasi hadzo, fhasi ha thikho iṅwe na iṅwe hú na zwiraho zwivhili zwa u tika mikungelo yawo mivhili.

²⁵ Vha vhaḓa thikho dza 20 dza sia ḽa devhula ḽa dennde,

²⁶ na zwiraho zwa 40 zwa siliva, fhasi ha thikho iṅwe na iṅwe hu na zwivhili.

²⁷ Na nga murahu ha dennde sia ḽa vhukovhela vha vhaḓa thikho ṱhanu na nthihi

²⁸ na thikho mbili dza dzikhuḓa.

²⁹ Thikho hedzo dza dzikhuḓa dzo vha dzo farakanywa nga fhasi, dza paṱekanywa hoṱhe u ya nṱha. Thikho mbili dzo longwaho khuḓani dzo vha dzo itwa nga u ralo.

³⁰ Ndi uri ho vha hu na thikho ṱhanu na tharu dzi na zwiraho zwa 16 zwa siliva, zwivhili zwi fhasi ha thikho iṅwe na iṅwe.

³¹ Vha ita mabaphathi o rambalalaho, vha a ita nga thanda ya muunga, maṱanu a thikho dza sia ḽithihi ḽa dennde,

³² maṱanu a thikho dza ḽiḽa ḽiṅwe sia-vho, na maṱanu a thikho dza sia ḽa vhukovhela, nga murahu.

³³ Baphathi ḽa vhukati ḽo rambalalaho, ḽo longwaho vhukati ha thikho u ya nṱha, ḽo vha ḽi tshi bva kha sia ḽino ḽa dennde ḽa swika kha ḽiḽa.

³⁴ Idzo thikho dza fhomiwa musuku, vha dzi longa mikungelo ya musuku ya u fara mabaphathi o rambalalaho, na one o fhomiwa musuku.

³⁵ Vha ita pesa ḽa lupila nga lukhaha ḽo lukwa nga denga na muridili na vhukuse vhutswuku ḽo oliwa zwifanyiso zwa vhakherube.

³⁶ Vha vhaḓa phuphu nṋa dza muunga dza u tika iḽo pesa ḽa lupila, dzo fhomiwa nga musuku, vha dzi longa dzihuka dza musuku. Vha ita zwiraho zwiṋa zwa siliva zwa u fara idzo phuphu.

³⁷ Muṋangoni wa dennde vha ita pesa ḽa lupila ḽa lukhaha ḽo lukwa nga denga na muridili na vhukuse vhutswuku lwo ṱamiwa nga makolo.

³⁸ Iḽo pesa ḽa lupila vha ḽi vhaḓela phuphu ṱhanu dza longwa dzihuka, nṱha hadzo na mbalelo dzadzo dza fhomiwa musuku, vha ita zwiraho zwiṱanu zwa musinaseṱha zwa idzo phuphu.