EKISODA 31 - BIVHILI KHETHWA Mafhungo Madifha

Vhatsila vha dennde ya u ṱangana na Muṋe washu

¹ Muṋe washu a amba na Mushe a ri,

² “Ndo nanga Betsalele, ṅwana wa Uri muḓuhulu wa Huru, ane a bva kha tsinde ḽa Juda,

³ nahone ndo mu ḓadza Muya wanga. Ndo mu ṋea ṱhalukanyo na vhutsila na vhukoni ha mushumo muṅwe na muṅwe wa u ita makolo –

⁴ wa u ita dzipulane dza zwa vhutsila na u zwi fhoma musuku na siliva na musinaseṱha;

⁵ wa u tsheṱa nungu dza u ṱama; wa u vhaḓa thanda; na mushumo muṅwe na muṅwe wa zwa vhutsila.

⁶ Ndo nanga na Oholiaba ṅwana wa Ahisamakha, a no bva kha tsinde ḽa Dani, uri a shume nae. Nda dovha nda ṋea vhatsila vhoṱhe vhukoni vhuhulu, uri vha kone u ita zwoṱhe zwe nda ri zwi itwe:

⁷ dennde ya u ṱangana na Nṋe na mbulungelo i re na milayo na tshitibo tshayo na thundu yoṱhe ya dennde,

⁸ na ḓafula na thundu dzaḽo na tshivheambone tsha musuku u songo vangiwaho na thundu yatsho yoṱhe, na aḽiṱari ya u fhisela zwioro,

⁹ na aḽiṱari ya u fhisela zwiṱhavhelo na thundu dzayo dzoṱhe na sambelo na tshiraho tshaḽo,

¹⁰ na zwiambaro zwa maṱeleṱele zwa tshifhe Aroni na vhana vhawe zwine vha zwi ambara musi vha tshi shuma mushumo wa vhutshifhe,

¹¹ na mapfura a u ḓodza na zwioro zwi nukhelelaho u ḓifha zwa fhethu hukhethwa. Vha tshi ita zwithu hezwo vha zwi ite vha tshi tevhedza vhukuma zwe nda u laya.”

Sabatha, ḓuvha ḽa u awela

¹² Muṋe washu a vhudza Mushe

¹³ uri a vhudze Vhaisraele a ri, “Vhulungani Sabatha, ḓuvha ḽanga ḽa u awela, ngauri ndi tshiga vhukati hanga na inwi tsha misi yoṱhe i ḓaho, tshi no sumbedza uri Nṋe Yahavee ndo ni ita vhathu vhanga.

¹⁴ No fanela u vhulunga ḓuvha ḽa u awela ngauri ndi ḽikhethwa. Ane a si ḽi vhulunge, a shuma nga ḓuvha ḽeneḽo, a vhulawe, a songo tsha vhalwa kha lushaka.

¹⁵ Ni na maḓuvha maṱanu na ḽithihi a u shuma mishumo yaṋu, hone ḓuvha ḽa vhuṱanu na vhuvhili ndi ḓuvha ḽa u awela tshoṱhe, ḽo kumedzwa Nṋe Yahavee. Ane a vhuya a shuma nga heḽo ḓuvha a vhulawe.

¹⁶ Vhaisraele vha vhulunge heḽo ḓuvha zwi tshi ya nga mirafho na mirafho, ḽi vhe tshiga tsha mulanga.

¹⁷ Ndi tshiga tsha lini na lini vhukati ha Vhaisraele na Nṋe, ngauri Nṋe Yahavee ndo ita ḽiṱaḓulu na ḽifhasi nga maḓuvha maṱanu na ḽithihi, nga ḓuvha ḽa vhuṱanu na vhuvhili nda litsha u shuma nda awela.”

¹⁸ Musi Mudzimu o fhedza u amba na Mushe thavhani ya Sinai, a mu ṋea maḓaba mavhili a matombo e Mudzimu Ene muṋe a vha o ṅwala milayo khao.