EKISODA 28 - BIVHILI KHETHWA Mafhungo Madifha

Zwiambaro zwa vhotshifhe

¹ “Vhidzisa mukomana wau Aroni a bve kha Vhaisraele a ḓe ha iwe, a ḓe na vhana vhawe vha vhatuka, Nadaba na Abihu na Eliasara na Ithamara, vha vhe vhotshifhe vha ntshumele.

² Mukomana wau Aroni u mu rungele zwiambaro zwikhethwa a vhe na tshileme, a vhonale o ambara dza maṱeleṱele.

³ U vhudze vhatsila vhomakone, vhe nda vha ṋea vhukoni, vha rungele Aroni zwiambaro uri a vhumbiwe tshifhe a ḓikumedze Nṋe.

⁴ Zwiambaro zwine vha fanela u zwi runga ngezwi: tshipilakhana na bannda ya u pakata na phuraphura na hemmbe yo lukwaho na muthini na bannda. Vha rungele mukomana wau Aroni na vhana vhawe vha vhatuka zwiambaro zwikhethwa, uri vha vhe vhotshifhe vhane vha ntshumela.

⁵ Avho vhatsila vha shumise ludede lwa musuku na denga na muridili na vhukuse vhutswuku na lukhaha lwo lukiwaho zwavhuḓi.

⁶ “Vha ite bannda ḽa u pakata nga ludede lwa musuku na denga na muridili na vhukuse vhutswuku na lukhaha lwo lukiwaho zwavhuḓi, u vhe mushumo wa muluki makone.

⁷ Ḽo fanela u vha na pfuṋelo mbili dza mahaḓani dzo ṱumekanywaho naḽo uri dzi farakanye ṱhodzi dzaḽo mbili.

⁸ Khaḽo ho fanela u ṱumetshedzwa kubannda kwo lukwaho zwavhuḓi, kwa sila ḽi no fana na ḽa iḽo bannda, ku vhe tshipiḓa tshithihi naḽo, ku itwe nga ludede lwa musuku na denga na muridili na vhukuse vhutswuku na lukhaha lwavhuḓi.

⁹ U dzhie matombo mavhili a onikisi u ṅwale madzina a vhana vha Israele vha vhatuka khao,

¹⁰ u tsheṱe madzina avho maṱanu na ḽithihi kha ḽiṅwe tombo, maṱanu na ḽithihi kha ḽiṅwe, vha tshi tevhekana nga kubebelwe kwavho.

¹¹ U wane mutsheṱi makone a ṅwale ayo madzina a vhana vha Israele kha matombo ayo mavhili, a fhomiwe nga musuku.

¹² Matombo ayo mavhili u a vhofhelele kha pfuṋelo dza mahaḓani dza bannda ya u pakata, a vhe tshihumbudzo tsha matsinde a Israele a 12. Aroni u ḓo hwala madzina avho mahaḓani awe uri Nṋe Yahavee ndi dzule ndi tshi elelwa vhathu vhanga.

¹³ U dzinge maluvha mavhili a musuku a u a ṱama,

¹⁴ u ite na geḓane mbili dza musuku u songo vangiwaho dzo lukwa unga thambo, u kungele idzo geḓane kha ayo maluvha.

Tshipilakhana

¹⁵ “U ite tshipilakhana tshine tshifhe a ḓo vhona ngatsho musi a tshi haṱula milandu. Tshi itwe nga vhomakone vhukuma, vha tshi ite nga zwenezwo zwo itaho bannda ḽa u pakata, tshi itwe nga ludede lwa musuku na denga na muridili na vhukuse vhutswuku na lukhaha lwo hoṱiwaho zwavhuḓi.

¹⁶ Vhulapfu na vhuphara hatsho zwi eḓane, tshi petwe luvhili, vhulapfu tshi vhe senthimitha dza 25, vhuphara tshi vhe senthimitha dza 25.

¹⁷ U tshi rungelele miṱaladzi miṋa ya matombo a mutengo muhulu. Kha muṱaladzi wa u ranga u rungelele rubi na thophasi na ganethe.

¹⁸ Kha muṱaladzi wa vhuvhili u rungelele tombo ḽa muroxwe na safire na daimane.

¹⁹ Kha muṱaladzi wa vhuraru u rungelele thekhoisi na agethe na amethisi.

²⁰ Kha muṱaladzi wa vhuṋa u rungelele berili na khanelia na jasipere. Matombo ayo oṱhe a nambatedzwe kha musuku.

²¹ Ayo matombo a ṅwalwe madzina a vhana vha vhatuka vha Israele, a vhe 12 a nge madzina a re khao. A koriwe unga tshikandiso tsha luswayo, ḽiṅwe na ḽiṅwe ḽi vhe na dzina ḽa muṅwe wa matsinde a fumi na mavhili a Israele.

²² Tshipilakhana u tshi itele geḓane dza musuku u songo vangiwaho dzo sombiwa unga thambo.

²³ Itsho tshipilakhana u tshi itele mikungelo mivhili ya musuku, u i ṱumetshedze kha khuḓa dzatsho mbili dza nṱha.

²⁴ U pfuṋele idzo geḓane mbili dza musuku kha mikungelo iyo mivhili yo ṱumetshedzwaho kha khuḓa dza tshipilakhana.

²⁵ Dziṅwe ṱhodzi dza idzo geḓane u dzi pfuṋele kha aḽa maluvha mavhili, uri a ṱumekane na pfuṋelo dza mahaḓani dza bannda ya u pakata, nga phanḓa.

²⁶ U ite mikungelo mivhili ya musuku u i ṱumetshedze khuḓani mbili dza fhasi dza tshipilakhana, kha lupendelo lwa ngomu, tsini na bannda ḽa u pakata.

²⁷ U dovhe u ite miṅwe mikungelo mivhili ya musuku, u i ṱumetshedze fhasi phanḓa ha pfuṋelo mbili dza mahaḓani dza bannda ḽa u pakata, tsini na ho ṱumiwaho, nṱha ha kubannda kwo lukiwaho kwa bannda ḽa u pakata.

²⁸ U vhofhekanye mikungelo ya tshipilakhana na mikungelo ya bannda ya nṱha nga thambo dala, uri tshipilakhana tshi dzule nṱha ha kubannda kwo lukiwaho, tshi si rembeḓe tsha litshana na bannda ya u pakata.

²⁹ Itsho tshipilakhana tsha u haṱula tshi ḓo ita uri musi Aroni a tshi dzhena Hukhethwa, a vhe o kungela madzina a matsinde a Israele khanani yawe uri Nṋe Yahavee ndi dzule ndi tshi elelwa vhathu vhanga.

³⁰ Kha itsho tshipilakhana tsha u haṱula u nambatedze na madeṅwa makhethwa uri Aroni a vhe e nazwo khanani yawe musi a tshi dzhena hune Nṋe Yahavee nda vha hone. Zwenezwo Aroni a tshi ḓa phanḓa ha Nṋe Yahavee, khanani yawe u ḓo dzula o ambara tshine tsha nga mu farisa u haṱula Vhaisraele.

Dziṅwe phuraphura dza tshifhe

³¹ “U ite phuraphura ine ya ambarwa na bannda ya u pakata, u i ite nga vhukuse ha denga.

³² Vhukati hayo i vhe na buli ḽa u dzhenisa ṱhoho, u mona na iḽo buli hu vhe na lubomo lwo lukiwaho unga mutsinga wa dzhasi ḽa tsimbi uri i si kheruwe.

³³ Lupendelo lwa fhasi u lu ṱame nga maramba a denga na muridili na vhukuse vhutswuku na lukhaha lwavhuḓi lwo lukiwaho, vhukati hu vhe na ḓilogo dza musuku.

³⁴ Ḓilogo dza musuku na maramba zwi tevhekane zwi tshi mona na lupendelo lwa fhasi lwa phuraphura.

³⁵ Aroni a i ambare musi a tshi shuma mushumo wawe wa vhutshifhe uri hu pfale ḓilogo dzi tshi lila musi a tshi dzhena Hukhethwa hune Nṋe Yahavee nda vha hone na musi a tshi bva, zwenezwo a nga si fe.

³⁶ “U ite ḓaba ḽa musuku u songo vangiwaho ḽi koriwe maipfi haya a u ri, ‘ndo kumedzwa yahavee’ sa zwiḽa muthu a tshi tsheṱa khandiso.

³⁷ U lu vhofhelele phanḓa ha muthini nga thambo ya denga.

³⁸ Aroni a lu ambare kha phanḓa yawe, uri Nṋe Yahavee ndi kone u ṱanganedza zwoṱhe zwine Vhaisraele vha nṋekedza, naho vhathu vha nga vha vha tshi khakha musi vha tshi zwi ṋekedza. Aroni a dzule o lu ambara kha phanḓa uri Nṋe Yahavee ndi vha takalele.

³⁹ Hemmbe u i luke nga lukhaha lwavhuḓi, u ite muthini nga lukhaha lwavhuḓi, na muvhofho wo lukiwaho nga muluki makone.

⁴⁰ “Vhana vha Aroni u vha itele hemmbe na muvhofho na muṅadzi uri vha vhe na tshileme na lunako.

⁴¹ Izwo u zwi ambadze Aroni mukomana wau na vhana vhawe vha vhatuka. Zwenezwo u vha vhumbe vhotshifhe nga u vha ḓodza nga mapfura a muolivi u vha kumedze Nṋe vha ntshumele.

⁴² U vha itele dzishothi dza lukhaha dzi vha pile u bva khunduni u swika zwirumbini, vha si vhonelwe.

⁴³ Aroni na vhana vhawe vha zwi ambare musi vha tshi dzhena denndeni ya u ṱangana na Nṋe na musi vha tshi sendela aḽiṱarini u yo ntshumela vhe Hukhethwa uri vha sa ḓo khakha vha fa. Iyo ndi ndayo ya lini na lini ya Aroni na vhaḓuhulu vhawe.