EKISODA 25 - BIVHILI KHETHWA Mafhungo Madifha

Maluvhele a u luvha Mudzimu wa Mulanga (Ek. 25:1 – 31:18) Zwifhiwa zwa hukhethwa

¹ Muṋe washu a amba na Mushe a ri,

² “Vhudza Vhaisraele uri nduvho dzine vha ḓo mpha vha dzi vhetshele thungo. U ṱanganedze nduvho hedzo dzi tshi bva kha muthu muṅwe na muṅwe ane mbilu yawe ya vha na dzangalelo ḽa u ṋea.

³ Nduvho dzine wa ḓo vha bvisisa ndi dzi no nga hedzi: musuku, siliva, musinaseṱha,

⁴ vhukuse ha denga na ha muridili na vhutswuku, zwiambaro zwo itwaho nga lukhaha na nga vhukuse ha mbudzi,

⁵ mukumba wa thutha wo fhomiwa wa ita mutswuku, mukumba wo sukiwaho, thanda ya muunga ya mivhalavhala,

⁶ mapfura a mbone, zwilungi zwa mapfura a u ḓola na zwa zwioro,

⁷ matombo a onikisi na nungu dza u ṱama nguvho ya tshifhe muhulu na tshipilakhana tshawe.

⁸ Vha mphaṱele nnḓu khethwa uri ndi kone u dzula vhukati havho.

⁹ Kufhaṱele na thundu dzoṱhe dzaho ni tevhedze tshifanyiso tshine nda ḓo ni sumbedza.

Mbulungelo ya mulanga

¹⁰ “Vha vhaḓe mbulungelo nga thanda ya muunga, vhunavha vhu vhe senthimitha dza 110, u aṱama i vhe senthimitha dza 66, u lapfa u ya nṱha i vhe senthimitha dza 66.

¹¹ Nga nnḓa na nga ngomu ni i fhome nga musuku u songo vangiwaho, ni ite lubomo lwa musuku u mona nayo.

¹² U i itele mikungelo miṋa ya musuku ya u hwala ngayo, u i kungele milenzheni yayo miṋa, sia ḽino ḽi vhe na mikungelo mivhili, ḽiḽa-vho ḽi vhe na mivhili.

¹³ U vhaḓe na thanda dza muunga u dzi fhome nga musuku,

¹⁴ u dzi longe kha mikungelo nga matungo a mbulungelo, idzo ndi dza u hwala mbulungelo.

¹⁵ Idzo thanda dzi dzule mikungeloni ya mbulungelo, dzi songo vhuya dza ṱomowa.

¹⁶ Ngomu ha mbulungelo u vhulunge milayo ine nda ḓo u ṋea.

¹⁷ “U dovhe u vhaḓe tshitibo tsha musuku u songo vangiwaho, vhunavha tshi vhe senthimitha dza 110, u aṱama tshi vhe senthimitha dza 66.

¹⁸ Magumoni a tshitibo ngeno na ngeno u ite vhakherube vhavhili vha musuku; u vha ite nga musuku wo fuliwaho.

¹⁹ U ite mukherube wa u thoma sia ḽino, wa vhuvhili u mu ite sia ḽiḽa, u vha kungele magumoni a tshitibo uri vha vhe tshithu tshithihi na tshitibo.

²⁰ Avho vhakherube vha vhe na phapha dzo ṱharamuwaho dzo imela nṱha uri dzi tibedze tshitibo. Vhakherube vho fanela u lavhelesana, zwifhaṱuwo zwavho zwo lavhelesa tshitibo.

²¹ Maḓaba a re na vhuṱanzi ha milayo ine nda ḓo u ṋea u a longe ngomu ha mbulungelo u a tibe nga tshenetsho tshitibo.

²² Ndi ḓo ḓa nda ṱangana na iwe henefho, henefho nṱha ha tshitibo, vhukati ha vhakherube vhavhili vha re nṱha ha mbulungelo ya mulayo, wa konou nnḓivha nda u ṋea ndayo dzanga dzoṱhe dzine wa ḓo vhudza Vhaisraele.

Ḓafula ḽa vhurotho vhu no ṋekedzwa Mudzimu

²³ “U vhaḓe ḓafula nga thanda ya muunga, vhunavha ḽi vhe senthimitha dza 88, vhuphara ḽi vhe senthimitha dza 44, vhulapfu u ya nṱha ḽi vhe senthimitha dza 66.

²⁴ U ḽi fhome nga musuku u songo vangiwaho, u mona naḽo ḽoṱhe u ḽi ṱame nga lubomo lwa musuku.

²⁵ U ite lumeme lwa vhuphara ha milimitha dza 75 u mona naḽo, u lu ṱame nga lubomo lwa musuku u mona nalwo.

²⁶ U ḽi itele mikungelo miṋa ya musuku, u i mometshedze matungo maṋa, hune ha vha na milenzhe.

²⁷ Mikungelo ya u ṱoma thanda dza u hwala iḽo ḓafula yo fanela u vha tsini ha ulwo lumeme.

²⁸ Idzo thanda u dzi ite nga thanda ya muunga, u dzi fhome nga musuku. Iḽo ḓafula ḽi hwalwe ngadzo.

²⁹ Ḓafula u ḽi itele dzindilo na zwidongo na dzimvuvhelo na zwinwelo zwa u ṋekedza waini, izwo u zwi ite nga musuku u songo vangiwaho,

³⁰ ḽi konou vhewa phanḓa hanga, nṱha haḽo u dzule wo vhea vhurotho vhune ha ṋekedzwa Nṋe.

Tshivheambone

³¹ “U ite tshivheambone nga musuku u songo vangiwaho wo fuliwaho. Tshiraho na tsinde ḽatsho na maluvha atsho a u tshi nakisa – pfungwi na nḓevhe dza maluvha – nga zwi vhe tshipiḓa tshithihi natsho.

³² Hu ṱoṱomowe matavhi maṱanu na ḽithihi a tshi bva matungo atsho, mararu kha ḽino sia, mararu kha ḽiḽa.

³³ Davhi ḽa u thoma ḽi vhe na maluvha mararu a tshivhumbeo tsha maluvha a mualimondo, dzuvha ḽiṅwe na ḽiṅwe ḽi vhe na pfungwi na nḓevhe. Davhi ḽa vhuvhili na ḽone ḽi vhe na maluvha mararu a tshivhumbeo tsha maluvha a mualimondo, dzuvha ḽiṅwe na ḽiṅwe ḽi vhe na pfungwi na nḓevhe; matavhi oṱhe maṱanu na ḽithihi a ḓi ralo-vho o ṱoṱomowa a tshi bva kha tshivheambone.

³⁴ Tshivheambone tshone tshiṋe tshi vhe na maluvha maṋa a tshivhumbeo tsha maluvha a mualimondo, dzuvha ḽiṅwe na ḽiṅwe ḽi na pfungwi na nḓevhe.

³⁵ Pfungwi nthihi i vhe fhasi ha matavhi mavhili a u thoma ane a ṱoṱomowa a tshi bva kha tshivheambone, iṅwe i vhe fhasi ha matavhi mavhili a tevhelaho, iṅwe ya vha fhasi ha matavhi mavhili a u fhedzisela, zwi ḓi fana na matavhi maṱanu na ḽithihi ane a ṱoṱomowa a tshi bva kha tshivheambone.

³⁶ Pfungwi na matavhi zwi vhe tshipiḓa tshithihi na tshivheambone, zwoṱhe zwo itwa nga tshipiḓa tshithihi tsha musuku u songo vangiwaho wo tou fuliwa.

³⁷ “Itsho tshivheambone u tshi itele mbone ṱhanu na mbili u dzi vhee nṱha hatsho uri dzi vhonetshele phanḓa hatsho.

³⁸ Zwifaredzi zwa thambo dzatsho na zwigubu zwatsho zwi vhe zwa musuku u songo vangiwaho.

³⁹ U dzhie musuku u songo vangiwaho wa khilogiramu dza 35 u ite hetsho tshivheambone na zwipiḓa zwatsho zwoṱhe ngawo.

⁴⁰ U vhone uri u tshi ite u tshi tevhedza tshifanyiso tshe wa sumbedzwa ngei thavhani.