EKISODA 22 - BIVHILI KHETHWA Mafhungo Madifha

Milayo ya u lifhelana

¹ “Arali muthu a tswa kholomo kana nngu a i ṱhavha kana a i rengisa, o fanela u lifha kholomo nthihi nga kholomo ṱhanu, nngu nthihi a i lifhe nga nngu nṋa.

² “Arali ha farwa fobvu ḽi tshi khou pwasha nnḓu ḽa fa, uyo murwi ha na mulandu wa u shulula malofha.

³ Hone arali zwa itea ḽo no tsha, murwi u ḓo vha na mulandu wa u shulula malofha. Fobvu vhukuma ḽo fanela u lifha, hone arali a si na tshithu, o fanela u rengiswa u vhe wone mulifho wa vhufobvu.

⁴ Arali tshifuwo tsho tswiwaho tsha wanala tshi tshi kha ḓi tshila e natsho, i nga vha i kholomo kana donngi kana nngu, o fanela u zwi lifha kavhili.

⁵ “Arali muthu a fulisa zwifuwo zwawe pfuloni kana tsimuni ya minḓirivhe, a litsha zwifuwo zwawe zwi tshi fula tsimuni ya muṅwe, o fanela u lifha nga zwavhuḓi zwi fhiraho zwoṱhe zwi bvaho tsimuni yawe.

⁶ “Arali muthu a funga mulilo tsimuni yawe, wa fhisa tsheṋe wa pfukela tsimuni ya muṅwe, wa fhisa mavhele ane a khou mela kana o remiwaho a khokhiwa kana tsimu yoṱhe, uyo o fungaho mulilo o fanela u lifha iyo tshinyalelo.

⁷ “Arali muthu a tenda u farela muṅwe tshelede kana thundu, izwo zwithu zwa tswiwa nḓuni yawe, arali iḽo fobvu ḽa wanala, ḽo fanela u lifha izwo zwithu kavhili.

⁸ Huno arali fobvu ḽa si wanale, uyo munna we a vha o vhulunga idzo thundu dza mutengo muhulu, o fanela u anela Mudzimu uri ho ngo tswa thundu dza khonani yawe.

⁹ Kha milandu ine vhathu vhavhili vha lwela tshithu tsho xelaho muṅwe na muṅwe a tshi ri ndi tshawe, kana ndi kholomo kana donngi kana mbudzi kana nguvho, vha fanela u isa mafhungo ha Mudzimu. Ane Mudzimu a sumba uri a si yawe, o fanela u lifha kavhili.

¹⁰ “Arali muthu a tenda u swiswiwa donngi ya muṅwe kana kholomo kana nngu kana tshiṅwe tshifuwo, itsho tshifuwo tsha fa kana tsha huvhala kana tsha thubiwa, ha si vhe na ṱhanzi,

¹¹ uyo munna nga a anele Muṋe washu uri ho ngo tswa tshifuwo tsha muṅwe. Arali itsho tshifuwo tshi songo tswiwa, muṋe watsho o fanela u tenda uri ndi tshinyalelo, uyo munna a si mu lifhele.

¹² Hone arali itsho tshifuwo tsho tswiwa, uyo munna o fanela u lifhela muṋe watsho.

¹³ “Arali tsho pondiwa nga zwivhanda zwa ḓaka, uyo munna o fanela u ḓisa miraḓo yatsho yo salaho vhu vhe vhuṱanzi, ho ngo fanela u lifha.

¹⁴ “Arali munna a pamba tshifuwo kha muṅwe, tsha swika tsha huvhala kana tsha fa muṋe watsho a siho tsini, uyo munna o fanela u tshi lifha.

¹⁵ Hone arali izwo zwa itea muṋe watsho e henefho, uyo munna ho ngo fanela u lifha. Arali muṋe watsho o tou tshi swiswa, tshinyalelo i ḓo vha yo lifhiwa nga wonoyo mutengo wa u tshi hirisa.

Milayo ya vhuṱonḓo

¹⁶ “Arali munna a ṱonḓola musidzana a songo malwaho, o fanela u mu mala a mu vhinge.

¹⁷ Hone arali khotsi a uyo musidzana a hana uyo munna a tshi mu vhinga, o fanela u mu lifha nga tshelede i no eḓana na ya u mala musidzana a sa athu dzheniswa nḓuni nga munna.

¹⁸ “Musadzi ane a ita zwa manditi ni songo mu litsha a tshila.

¹⁹ “Munna ufhio na ufhio ane a lala na tshifuwo nga a vhulawe.

²⁰ “Ane a vhuya a ṋekedza miṅwe midzimu tshiṱhavhelo arali e si Nṋe Yahavee, nga a lozwiwe.

Muṋe washu u tsireledza vha sa koni u ḓilwela

²¹ “U songo tambudza mutsinda kana wa mu konḓisela vhutshilo, elelwa uri na iwe wo vha u mutsinda Egipita.

²² U songo tambudza tshilikadzi kana tsiwana.

²³ Arali wa zwi ita, Nṋe Yahavee ndi ḓo vha fhindula musi vha tshi mmbidzelela,

²⁴ nda sinyuwa nda ni vhulaha nndwani; vhasadzi vhaṋu vha ḓo sala vhe tshilikadzi, vhana vhaṋu vha sala vha si na vhokhotsi.

²⁵ “Arali vhathu vhanga vha re vhashai wa vha adzima tshelede, u songo ita unga vhaadzimisi vha tshelede, wa ri i tshi vhuya i vhuye na mavhoḓa.

²⁶ Arali wa fara nguvho ya muṅwe u tshi itela uri a lifhe mulandu wau, u fanela u i humisela khae ḽi sa athu kovhela,

²⁷ ngauri ndi lwone lupila lune a vha nalwo fhedzi lwa u mu dudedza. U ḓo lala o fukani? Musi a tshi nṱavhela mukosi uri ndi mu farise, ndi ḓo mu fhindula ngauri ndi na tshilidzi.

²⁸ “U songo teketela Mudzimu, na murangaphanḓa wa vhathu vha haṋu u songo mu teketela.

²⁹ “Nṋekedze nduvho i no bva kha mavhele au na waini yau na mapfura a muolivi nga tshifhinga tshazwo. Nkumedze tanzhe ḽau ḽa mutuka.

³⁰ Mphe na zwiranzhe zwa kholomo dzau na nngu dzau. Matanzhe a zwiduna nga zwi dzule na vhomme azwo maḓuvha maṱanu na mavhili, nga ḓuvha ḽa vhuṱanu na vhuraru ni zwi ṋekedze Nṋe.

³¹ “Inwi ni vhathu vhanga, zwenezwo ni songo ḽa ṋama ya phukha ifhio na ifhio yo vhulawaho nga zwivhanda zwa ḓaka, yeneyo i fheni dzimmbwa.