EKISODA 21 - BIVHILI KHETHWA Mafhungo Madifha

Milayo ya u tshilisana na dziphuli

¹ “Milayo ine wa fanela u vhudza Vhaisraele ngei:

² “Arali i tshi renga phuli ya Muheberu, i shume i fhedze miṅwaha miṱanu na muthihi. Nga ṅwaha wa vhuṱanu na vhuvhili a nga ḓi ḓiṱutshela zwawe, nga a vhofhololwe, a songo lifha tshithu.

³ Arali o ḓa a sa athu dzea, a ṱuwe a si na musadzi. Arali o ḓa o no dzea, a ṱuwe na musadzi wawe.

⁴ Arali muṋe wawe a mu ṋea musadzi, uyo musadzi a mu bebela vhana vha vhatuka na vha vhazidzana, musadzi na vhana vha ḓo vha vha muṋe wawe, uyo munna a ṱuwe e eṱhe.

⁵ Hone arali phuli ya ḓivhadza ya ri, ‘Ndi funa muṋe wanga na musadzi wanga na vhana vhanga, a thi funi u vhofhololwa,’

⁶ zwenezwo muṋe wawe a ye a ime nae phanḓa ha Mudzimu, a mu endedze tsini ha vothi kana muhangammbwa. Muṋe wawe a mu phule nḓevhe nga luunzhi. Ndi hone a tshi ḓo konou vha phuli yawe vhutshilo hawe hoṱhe.

⁷ “Arali munna a rengisa ṅwana wawe wa musidzana a vha phuli, ha dovhi a vhofholowa unga phuli dza vhanna.

⁸ Arali a sa takadzi muṋe wawe ane a tama u mu dzea uri a vhe musadzi wawe, izwo o fanela u dovha a rengululwa nga khotsi awe, muṋe wawe ha na pfanelo ya u mu rengisela vhatsinda, ngauri o mu shandukela.

⁹ “Arali munna a renga phuli uri i vhe musadzi wa ṅwana wawe wa mutuka, o fanela u mu fara unga ṅwana wawe wa musidzana.

¹⁰ “Arali munna a dzea musadzi wa vhuvhili, o fanela u ḓi ṋea musadzi wawe wa u ranga zwiḽiwa na zwiambaro a mu dzhenisa nḓuni unga kale.

¹¹ Arali a mu fhura kha hezwo zwithu zwiraru, a nga ḓi ḓiṱutshela, o vhofholowa ha si lifhiwe tshithu.

Milayo i no amba zwa u huvhadza muthu

¹² “Ane a huvhadza muthu a mu vhulaha, na ene o fanela u fa.

¹³ Arali a songo tou mu vhulaha nga khole, e Mudzimu we a mu kumedza zwanḓani zwawe, izwo ndi ḓo ni nangela hune muvhulahi a nga shavhela hone.

¹⁴ Hone arali muthu a luka vhunwa a vhulaha muṅwe nga khole, nangwe e aḽiṱarini yanga mu bviseni a vhulawe.

¹⁵ “Ane a vhuya a rwa khotsi awe kana mme awe, u a vhulawa.

¹⁶ “Ane a tswa muthu a ṱuwa nae a yo mu rengisa kana a wanala e nae, o fanela u vhulawa.

¹⁷ “Ane a teketela khotsi awe kana mme awe o fanela u vhulawa.

¹⁸ “Arali vhathu vha lwa, muṅwe a rwa muṅwe nga tombo kana nga vili lune uyo muthu naho a songo fa, a lala thovhoni,

¹⁹ uyo we a mu rwa a nga si vhe na mulandu arali uyo o rwiwaho a vuwa thovhoni a kona u tshimbila-tshimbila, nangwe a tshi tou gogoḓela nga mugo. Naho zwo ralo uyo we a mu rwa o fanela u lifha zwe a ita uri a si kone u ḓishumela, a dovha a mu onga a vhuya a fhola tshoṱhe.

²⁰ “Arali muthu a rwa phuli yawe ya munna kana ya musadzi nga thanda, iyo phuli ya fela henefho, o fanela u lifhedzwa.

²¹ Hone arali iyo phuli ya tshila ya fhedza ḓuvha ḽithihi kana mavhili, muṋe wayo a songo lifhedzwa ngauri iyo phuli ndi yawe o i renga.

²² “Arali vhanna vha ri vha tshi lwa vha huvhadza musadzi o vhifhaho muvhilini a tshinyalelwa, naho a songo huvhala tshoṱhe, munna o mu huvhadzaho o fanela u bvisa mulifho une wa ṱoḓiwa nga muṋe wa musadzi, a u bvise zwó no tendelwa nga khoro.

²³ Hone arali uyo musadzi a fa, vhutshilo ho fanela u lifhiwa nga vhutshilo,

²⁴ ḽiṱo ḽi lifhiwe nga ḽiṱo, ḽiṋo ḽi lifhiwe nga ḽiṋo, tshanḓa nga tshanḓa, lwayo nga lwayo,

²⁵ u fhisa nga u fhiswa, mbonzhe nga mbonzhe, u zwimba nga u zwimba.

²⁶ “Arali muthu a rwa ḽiṱo ḽa phuli yawe ya munna kana ya musadzi, ḽa si tsha vhona, u fanela u mu vhofholola ya vha yone ndifho ya iḽo ḽiṱo.

²⁷ Arali a kula ḽiṋo ḽa phuli yawe ya munna kana ya musadzi, o fanela u mu vhofholola wa vha wone mulifho wa iḽo ḽiṋo.

²⁸ “Arali kholomo ya runga munna kana musadzi ya mu vhulaha, iyo kholomo yo fanela u kanḓwa nga matombo. Ṋama yayo i songo ḽiwa, hone muṋe wa iyo kholomo ha nga vhi na mulandu.

²⁹ Hone arali iyo kholomo yo vha i tshi ḓi runga vhathu, muṋe wayo a vhudzwa a si i lange, zwenezwo arali kholomo yeneyo ya vhulaha munna kana musadzi, yeneyo kholomo yo fanela u kanḓwa nga matombo, muṋe wayo a vhulawa.

³⁰ Arali a pfi a bvise tshipfumelo, o fanela u bvisa tshenetsho tshine ha pfi a pfumelwe ngatsho, uri a konou vhofhololwa.

³¹ Arali kholomo ya runga mutukana kana musidzana, muṋe wayo u fanela u lifha hu tshi tevhedzwa mulayo wonoyo.

³² Arali kholomo ya runga phuli ya munna kana ya musadzi, muṋe wayo o fanela u lifhela muṋe wa phuli nga mangwende a 30 a siliva, iyo kholomo i kanḓwe nga matombo.

³³ “Arali muthu a litsha dindi ḽi songo thivhiwa kana a bwa dindi a si ḽi thivhe, ha wela kholomo kana donngi ngomu haḽo,

³⁴ zwenezwo muṋe wa mulindi o fanela u lifha tshinyalelo, o fanela u bvisa tshelede a lifhele muṋe wa itsho tshifuwo, itsho tshifuwo tsho faho tsha vha tshawe.

³⁵ Arali kholomo ya muṅwe ya huvhadza ya muṅwe ya fa, muṋe wa iyo kholomo i tshilaho o fanela u i rengisa avho vhavhili vha kovhekana tshelede, vha dovha vha kovhekana na iyo kholomo yo faho.

³⁶ Huno arali zwi tshi ḓivhea uri iyo kholomo yo vha i tshi ḓi runga dziṅwe, muṋe wayo a si i lange, muṋe wayo o fanela u lifha kholomo nga kholomo, itsho tshifuwo tsho faho tsha vha tshawe.