EKISODA 18 - BIVHILI KHETHWA Mafhungo Madifha

Jethero a tshi dalela Mushe

¹ Jethero tshifhe wa Midiani, khotsi a musadzi wa Mushe, a pfa zwoṱhe zwe Mudzimu a itela Mushe na vhathu vha hawe vha Israele, na zwe Muṋe washu a pfulusa Vhaisraele shangoni ḽa Egipita.

² Mushe o vha o humisa Tsiphora musadzi wawe, Jethero khotsi a Tsiphora a dzula nae

³ na vhana vhawe vhavhili vha vhatuka. Muṅwe wa avho vhana o vha a tshi pfi Gerisoni nge Mushe a ri, “Ndi mutsinda shangoni ḽisili.”

⁴ Dzina ḽa muṅwe ḽo vha ḽi tshi pfi Eliasara nge a ri, “Mudzimu wa khotsi anga o mpfarisa a ntshidza nda si vhulawe nga Farao.”

⁵ Zwenezwo Jethero makhulu wa Mushe a ḓa na musadzi wa Mushe na vhana vhawe phangani he a ṱoka mushasha wawe, thavhani ya Mudzimu.

⁶ Mushe a vhudzwa upfi, “Makhulu wavho Jethero ngevha, vho ḓa u vha dalela, vho ḓa na musadzi wavho na vhana vhawe vhavhili vha vhatuka.”

⁷ Ndi hone Mushe a tshi bva a yo ṱanganedza makhulu wawe, a gwadama a mu kuvhatedza vha vhudzisana mutakalo, vha konou dzhena denndeni.

⁸ Mushe a vhudza makhulu wawe zwoṱhe zwe Muṋe washu a ita Farao na Vhaegipita, a tshi itela u tshidza Vhaisraele, na zwoṱhe zwi konḓaho zwe zwa itea nḓilani, na zwe Muṋe washu a vha lamulela.

⁹ Jethero a takalela zwe Muṋe washu a itela Israele vhuthu a tshi vha lamukisa zwanḓani zwa Vhaegipita.

¹⁰ Zwenezwo Jethero a ri, “Nga hu rendwe Yahavee we a ni tshidza kha Vhaegipita na kha Farao, o lamulela vhathu vhawe vhupulini ha Vhaegipita

¹¹ musi vha tshi ni levhela. Zwino ndi vho zwi ḓivha uri Yahavee ndi muhulwane kha midzimu yoṱhe.”

¹² Ndi hone Jethero makhulu wa Mushe a tshi ṋekedza Mudzimu tshiṱhavhelo tshi fhiswaho, na zwiṅwe zwiṱhavhelo. Aroni a ḓa na vhahulwane vha Israele vha ḽa vhoṱhe na makhulu wa Mushe phanḓa ha Mudzimu.

Hu tshi vhewa vharangaphanḓa

¹³ Nga matshelo Mushe a ita mushumo wa u senga mafhungo a vhathu, vha kuvhangana khae u bva nga matsheloni u swika nga madekwana.

¹⁴ Musi makhulu wa Mushe a tshi vhona mushumo u lemelaho une Mushe a ḓinetisa ngawo a tshi itela vhathu, a mu vhudzisa a ri, “Ndi mini vha tshi ḓinetisa nga u rali vha tshi itela vhathu? Khezwi vha tshi dzula afha vhe vhoṱhe vhathu vho kuvhangana u bva nga matsheloni u swika nga madekwana?”

¹⁵ Mushe a fhindula makhulu wawe a ri, “Ndi uri vhathu vha ḓa ha nṋe vha tshi vhudzisa zwine Mudzimu a zwi funa.

¹⁶ Arali vha khakhelana vha ḓa ha nṋe, nṋe nda vha pfumedzanya nda vha funza ndaela dza Mudzimu na zwine a vha laya.”

¹⁷ Jethero a mu vhudza a ri, “Izwo a si zwone.

¹⁸ Vha ḓo vhuya vha fhela nungo, ha ri vhone ha ri vhathu zwa fana. Mushumo hoyo u a lemelesa, vha nga si u kone vhe vhoṱhe.

¹⁹ Nga vha thetshelese nyeletshedzo yanga, Mudzimu u ḓo vha navho. Vhone vho vha vho fanela vha tshi ambela vhathu ha Mudzimu vha swikisa mafhungo avho khae.

²⁰ Nga vha vha funze ndaela dza Mudzimu na zwine a vha laya; nga vha vha funze kutshilele na zwine vha fanela u zwi ita.

²¹ Huno kha vhathu havha nga vha nange vhanna vhane vha kona, vhane vha ofha Mudzimu, vha fulufhedzeaho, vha sa pfani na zwa tshanḓanguvhoni, vha vha vhee uri vha vhe vharangaphanḓa vha vhathu: vharangaphanḓa vha no langa tshigidi, vha ḓana, vha mahumi maṱanu, vha fumi.

²² Nga vha ite uri vhathu avho vha shumele vhathu vha tshi vha sengisela mafhungo avho tshifhinga tshoṱhe. Milandu i konḓaho vha nga i ḓisa kha vhone, hone milandu miṱuku vha nga i dzudzanya vhone vhaṋe, u ralo ha vha u vha leludzela zwithu na u ṱhaḓulana muhwalo na vhone.

²³ Arali vha ita nga u ralo, vha tshi tevhedza zwine Mudzimu a vha laya, vha nga si nete, vhathu vhoṱhe havha vha ḓo ya mahayani avho vho fushea.”

²⁴ Mushe a thetshelesa nyeletshedzo ya makhulu wawe a ita zwe vha mu vhudza,

²⁵ a nanga vhanna vha konaho kha Vhaisraele a vha vhea uri vha lange vhathu; vharangaphanḓa vha tshigidi, vha ḓana, vha mahumi maṱanu, na vha fumi.

²⁶ Vha shumela vhathu vha tshi vha pfumedzanya tshifhinga tshoṱhe. Milandu i konḓaho vha i ḓisa ha Mushe, milandu miṱuku vha i haṱula vhone vhaṋe.

²⁷ Ndi hone Mushe a tshi tendela makhulu wawe uri vha ṱuwe, vha humela shangoni ḽa havho.