EKISODA 13 - BIVHILI KHETHWA Mafhungo Madifha

Matanzhe ndi a Muṋe washu

¹ Muṋe washu a amba na Mushe a ri,

² “Matanzhe oṱhe a zwiduna kha ḽa Israele a sumelwe Nṋe, tshiduna tshiṅwe na tshiṅwe tshine tsha ranga u bebwa, a nga vha muthu kana tsha vha tshifuwo, ndi tshanga.”

Vhuṱambo ha Vhurotho vhu si na mbilisa

³ Mushe a vhudza vhathu a ri, “Dzulani ni tshi elelwa ḓuvha heḽi; ndi ḓuvha ḽe na pfuluwa ngaḽo Egipita he na vha ni dziphuli, na bviswa nga maanḓa a Muṋe washu; ni songo ḽa vhurotho vhu re na mbilisa nga ḓuvha heḽo.

⁴ Ṋamusi, nga ṅwedzi wa Avivi, ni khou pfuluwa Egipita.

⁵ Huno-ha, ni ite vhuṱambo honoho nga ṅwedzi wonoyo une Muṋe washu a ni isa shangoni ḽa Vhakanana na Vhahithi na Vhaamori na Vhahivi na Vhajebusi, shango ḽe a anela vhokhotsi aṋu a ri u ḓo ni ṋea ḽone, shango ḽi no ela mukhaha na ṋotshi.

⁶ Ni fhedze maḓuvha maṱanu na mavhili ni tshi ḽa vhurotho vhu si na mbilisa, zwino nga ḓuvha ḽa vhuṱanu na vhuvhili ni ite vhuṱambo ha u hulisa Muṋe washu.

⁷ Maḓuvha eneo maṱanu na mavhili hu ḽiwe vhurotho vhu si na mbilisa; ni songo vhuya na ḽa vhurotho vhu re na mbilisa, ni songo vhuya na dzula na mbilisa vhuponi haṋu hoṱhe.

⁸ “Musi wonoyo ni ṱalutshedze vhana vhaṋu ni ri, ‘Hezwi zwi itelwa zwe Muṋe washu a ri itela ri tshi pfuluwa Egipita.’

⁹ Maitele hayo a ḓo vha tshone tshihumbudzo, a nga tshiga tsho vhofhelelwaho tshanḓani tshaṋu kana kha phanḓa, zwenezwo mulayo wa Muṋe washu u ḓo dzula u mulomoni waṋu, ngauri Muṋe washu o ni pfulusa shangoni ḽa Egipita nga tshanḓa tsha maanḓa.

¹⁰ Ni ite vhuṱambo hovhu ṅwaha muṅwe na muṅwe nga tshifhinga tsho vhewaho.

Matanzhe

¹¹ “Musi Muṋe washu a tshi ni isa shangoni ḽa Vhakanana, a ni ṋea ḽone ḽa vha ḽaṋu, sa zwe a anela inwi na vhokhotsi aṋu a ri u ḓo zwi ita,

¹² ni kumedze Muṋe washu vhatukana vhoṱhe vho rangaho u bebwa, na zwifuwo zwoṱhe zwa zwiduna zwo rangaho u dzwalwa. Zwoṱhe zwenezwo ndi zwa Muṋe washu.

¹³ Hone tanzhe ḽiṅwe na ḽiṅwe ḽa donngi ni ḽi rengulule nga nngu kana mbudzi. Arali na sa ḽi rengulula ni ḽi vunḓe mutsinga. Ni rengulule na matanzhe oṱhe a vhatukana.

¹⁴ “Arali misi i ḓaho vhana vhaṋu vha tshi ni vhudzisa vha ri, ‘Izwi zwi amba mini?’ ni vha vhudze ni ri, ‘Ro vha ri dziphuli shangoni ḽa Egipita, hone Muṋe washu o ri pfulusa nga maanḓa awe.

¹⁵ Musi Farao a tshi ita tshipimbi a tshi ri hanisa u pfuluwa, Muṋe washu a vhulaha matanzhe oṱhe shangoni ḽa Egipita, a vhathu na a zwifuwo. Ndi zwine ra ṋekedza Muṋe washu tshiṱhavhelo tsha zwiduna zwoṱhe zwo rangaho u dzwaliwa, ra rengulula matanzhe oṱhe a vhatuka.’

¹⁶ Maitele ayo a ḓo vha tshihumbudzi, a nga tshithu tshe na tshi vhofhelela kha tshanḓa kana kha phanḓa; a ḓo ri humbudza uri Muṋe washu o ri pfulusa shangoni ḽa Egipita nga tshanḓa tshawe tsha maanḓa.”

Hu tshi welwa Lwanzhe lwa Dziṱhanga Phuphu ya gole na phuphu ya mulilo

¹⁷ Musi Farao o tendela vhathu uri vha pfuluwe, Mudzimu ho ngo vha litsha vha tshi fara gondo ḽi yaho shangoni ḽa Vhafilista, naho ḽo vha ḽi ḽone ḽa u khauledza. Mudzimu o ri vha nga ṱangana na nndwa vha kulea nungo vha humela Egipita.

¹⁸ Mudzimu o bvisa vhathu nga nḓila ya u mona ya sogani i yaho Lwanzheni lwa Dziṱhanga. Vhaisraele vho pfuluwa Egipita vho kungela zwihali.

¹⁹ Mushe o pfuluwa na marambo a Josefa, ngauri Josefa o vha o anisa Vhaisraele a ri, “Vhukumakuma Mudzimu u ḓo ni lamulela. Musi ḓuvha iḽo ḽi tshi swika ni pfuluwe na marambo anga.”

²⁰ Vha tshimbila u bva Sukotho vha ya vha awela Ethamu lumemeni lwa phanga.

²¹ Muṋe washu a vha ranga phanḓa, masiari o vha e tshivhumbeo tsha phuphu ya gole ḽi vha sumbedzaho nḓila, vhusiku e tshivhumbeo tsha phuphu ya mulilo uri a vha vhonetshele, zwenezwo vha kona u tshimbila vhusiku na masiari.

²² Phuphu ya gole yo vha i tshi ḓi dzula i tshi vha phanḓa ha vhathu masiari, phuphu ya mulilo i phanḓa havho vhusiku.