EKISODA 12 - BIVHILI KHETHWA Mafhungo Madifha

Paseka

¹ Muṋe washu a amba na Mushe na Aroni vhe shangoni ḽa Egipita a ri,

² “Ṅwedzi hoyu ni vho ḓo u ita ṅwedzi wa u ranga, nga u vhe wone ṅwedzi wa u ranga ṅwaha.

³ Laya Vhaisraele vhoṱhe u ri, ‘Nga ḓuvha ḽa fumi ḽa houno ṅwedzi munna muṅwe na muṅwe o fanela u bvisa tshifuwo sambini ḽawe ḽa nngu kana ḽa mbudzi, muṱa muṅwe na muṅwe u vhe na tshithihi: muṱa muthihi u vhe na tshifuwo tshithihi.

⁴ Arali vha muṱa muthihi vhe vhaṱuku lune vha nga si kone u ḽa itsho tshifuwo vha tshi fhedza, uyo munna nga a baḓekane na mudzulelani wawe, zwi tshi ya nga mbalo ya vhathu. Hezwi ni tshi dzudzanya mbalo ya vhathu vhane vha nga kona u ḽa itsho tshifuwo vha fhedza, ni thome u sedza uri muthu muthihi a nga ḽa zwingafhani.

⁵ “ ‘Itsho tshifuwo tsho fanela u vha tshi si na luvhadzi, tshi vhe tshiduna tshi sa fhiri ṅwaha muthihi, ni nga ḓi nanga kha nngu kana mbudzi.

⁶ Ni tshi valele u swika ḓuvha ḽa fumi na vhuṋa ḽa ṅwedzi, nga ḽeneḽo ḓuvha zwivhidzo zwoṱhe zwa vhathu vha Israele zwi ḓo shidzha izwo zwifuwo nga madekwana.

⁷ Vhathu vha dzhie maṅwe malofha azwo vha ḓodze mihangammbwa na zwiaramo zwa dzinnḓu hune vha khou ḽela hone.

⁸ Vhusiku honoho ṋama i ḽiwe yo gotshwa muliloni; i ḽiwe na vhurotho vhu si na mbilisa na miroho i kalakataho.

⁹ Ni songo vhuya na i ḽa i mbisi kana yo bikiwa, i tou gotshiwa muliloni yoṱhe – ṱhoho na khwanḓa na miraḓo ya zwa ngomu.

¹⁰ Ni songo sia iṅwe ḽa vhuya ḽa tsha; zwine zwa sala ḽa vhuya ḽa tsha ni zwi fhise.

¹¹ Ni i ḽe nga tshihaḓu, nó vhofha khundu nga bannda, nó ambara navhula milenzheni, nó fara mbaḓa nga tshanḓa. Ndi vhuṱambo ha Paseka vhune ha itelwa u hulisa Nṋe Yahavee.

¹² Vhusiku honoho ndi ḓo buḓekanya shango ḽa Egipita nda vhulaha matanzhe oṱhe a shango ḽa Egipita, a vhathu na a zwifuwo. Ndi ḓo lifhedza midzimu yoṱhe ya Egipita, ndi Nṋe Yahavee!

¹³ Nnḓu dzine na dzula khadzo dzi ḓo swaiwa nga malofha. Ndi tshi vhona malofha ndi ḓo ni pfuka, na ponyoka khombo i lozwaho musi ndi tshi lifhedza shango ḽa Egipita.

¹⁴ Ḓuvha heḽi ni ḽi ite ḓuvha ḽa tshihumbudzo, ni ite vhuṱambo ngaḽo vhu vhe ha u hulisa Nṋe Yahavee. Ni ḓivhadze mirafho yoṱhe i ḽi ite ḓuvha ḽa vhuṱambo lini na lini.

Vhuṱambo ha vhurotho vhu si na mbilisa

¹⁵ “ ‘Ni fhedze maḓuvha maṱanu na mavhili ni tshi ḽa vhurotho vhu si na mbilisa. Nga ḓuvha ḽa u ranga ni bvise mbilisa yoṱhe nḓuni dzaṋu, ngauri ane a vhuya a ḽa vhurotho vhu re na mbilisa u bva nga ḓuvha ḽa u ranga u swika ḓuvha ḽa vhuṱanu na vhuvhili a thathwe kha vhathu vha Israele.

¹⁶ Nga ḓuvha ḽa u ranga na nga ḽa vhuṱanu na vhuvhili ni vhe na guvhangano ḽikhethwa. Nga maḓuvha eneo ni songo shuma tshithu; ni tou tendelwa fhedzi u ḓibikela zwiḽiwa.

¹⁷ Vhuṱambo ha vhurotho vhu si na mbilisa vhu fanela u ḓi dzula vhu tshi itwa ngauri ndo pfulusa matsinde aṋu shangoni ḽa Egipita nga ḓuvha ḽeneḽo. Na mirafho yoṱhe i ḓaho i ite vhuṱambo nga ḓuvha heḽo; hei ndi ndaela i sa shanduki.

¹⁸ Nga ṅwedzi wa u ranga, u thoma nga madekwana a ḓuvha ḽa 14 u swika nga madekwana a ḓuvha ḽa 21, ni ḽe vhurotho vhu si na mbilisa.

¹⁹ Hu vhuye hu fhele maḓuvha maṱanu na mavhili hu si na mbilisa nḓuni dzaṋu, ngauri ane a vhuya a ḽa vhurotho vhu re na mbilisa u fanela u thathwa kha vhathu vha Israele, a nga vha e mutsinda kana e mudzulapo o bebwaho henefho.

²⁰ Ni songo ḽa vhurotho vhu re na mbilisa; hoṱhe hune na vha hone ni ḽe vhurotho vhu si na mbilisa.’ ”

Paseka ya u thoma

²¹ Mushe a vhidzisa vhahulwane vha Israele a vha vhudza a ri, “Ṱuwani ni yo nanga nngu kana mbudzi ni tshi itela miṱa yaṋu, ni shidzhe tshiṱhavhiwa tsha Paseka.

²² Ni dzhie davhi ḽa muhisopo, ni i longe malofhani ane a vha sambeloni, ni ḓodze zwiaramo na mihangammbwa nga malofha a no bva sambeloni. Hu songo vha na ane a linga u bva nḓuni ḽi sa athu tsha.

²³ Hu ḓo ri Muṋe washu a tshi buḓekanya ḽa Egipita a tshi lifhedza Vhaegipita, a tshi vhona malofha kha zwiaramo na kha mihangammbwa, a fhira iḽo vothi a si tende mulozwi a tshi dzhena mahayani aṋu a ni vhulaha.

²⁴ Ni vhulunge milayo hei, inwi na vhana vhaṋu, i vhe ndaela ya lini na lini.

²⁵ Musi ni tshi dzhena shangoni ḽe Muṋe washu a ni fulufhedzisa uri u ḓo ni ṋea ḽone, ni vhulunge enea maitele.

²⁶ Musi vhana vhaṋu vha tshi ni vhudzisa vha tshi ri, ‘Maitele aya a amba mini?’

²⁷ ni vha vhudze ni ri, ‘Ndi tshiṱhavhelo tsha Paseka tshine tsha itelwa u hulisa Muṋe washu; o fhira nnḓu dza Vhaisraele vhe Egipita, a vhulaha Vhaegipita a tsireledza nnḓu dzashu.’ ” Vhathu vha gwadama vha luvha.

²⁸ Ndi hone Vhaisraele vha tshi ṱuwa, vha yo ita zwenezwo zwe Muṋe washu a laedza Mushe na Aroni.

Dambudzo ḽa fumi: Lufu lwa matanzhe

²⁹ Vhukati ha vhusiku Muṋe washu a vhulaha matanzhe oṱhe shangoni ḽa Egipita – tanzhe ḽa Farao, we a vha a tshi ḓo vha khosi, na matanzhe oṱhe, na ḽone tanzhe ḽa tshivhotshwa tshe tsha vha tshi dzhele, na matanzhe a kholomo dzoṱhe.

³⁰ Farao na magota awe na Vhaegipita vhoṱhe vha vuwa vhusiku, ha vuwa tshililo tshihulu Egipita, ngauri ho vha hu si na nnḓu i si na mufu.

³¹ Vhusiku honoho Farao a vhidzisa Mushe na Aroni, a ri, “Takuwani, inwi na Vhaisraele, ni ṱuwe fhano kha vhathu vhanga. Ṱuwani ni yo luvha Yahavee sa zwe na humbela.

³² Dzhiani mbudzi dzaṋu na nngu na kholomo ni ṱuwe. Ni nkhumbelele-vho mashudu.”

³³ Vhaegipita vha vhudza vhathu vhó khwaṱhisa uri vha ṱavhanye u ṱuwa afho shangoni, vha ri, “Na sa ṱuwa ri nga ḓo fa roṱhe.”

³⁴ Ndi hone vhathu vha tshi hwala bwindi ḽavho ḽa vhurotho mahaḓani, ḽi tshi ḓi vha ḽi si na mbilisa, midzio ya u bika ngayo yo putelwa nga zwifuko zwavho.

³⁵ Vhaisraele vha ita zwe Mushe a vha vhudza, vha humbela Vhaegipita thundu ya siliva na musuku, na zwifuko.

³⁶ Muṋe washu a ita uri Vhaegipita vha hulise Vhaisraele, vha vha ṋea zwe vha vha humbela. U ralo ha vha u ṱangula Vhaegipita.

Vhaisraele vha tshi pfuluwa

³⁷ Vhaisraele vha takuwa Ramisese vha livha Sukotho. Vho vha vha tshi nga vha vhanna vha 600 000 vha tshi khou tshimbila nga milenzhe, hu sa vhalwi miṱa yavho.

³⁸ Na vhaṅwe vhathu vha si Vhaisraele vha baḓekana navho vhe vhanzhi, vha tshi khou khada masambi avho a nngu na mbudzi na kholomo dzi si na vhukono.

³⁹ Vha baga dzikhekhe dzi si na mbilisa nga bwindi iḽo ḽa vhurotho ḽe vha ṱuwa naḽo Egipita, ngauri bwindi iḽo ḽa vhurotho ḽo vha ḽi si na mbilisa. Vho vha vho tou thathwa Egipita, vha si vhuye vha lenga, na mbuvha ya lwendoni vho vha vha si na.

⁴⁰ Vhaisraele vho dzula Egipita miṅwaha ya 430.

⁴¹ Musi wonoyo vha vha vha tshi khou fhedza miṅwaha ya 430, matsinde oṱhe a vhathu vha Muṋe washu vha pfuluwa Egipita.

⁴² Vhusiku he Muṋe washu a lala o lindela uri a vha pfuluse shangoni ḽa Egipita, ho pfi hu itwe mulindelo wa u hulisa Muṋe washu nga mirafho yavho yoṱhe i tevhekanaho.

Ndaela dza Paseka

⁴³ Muṋe washu a vhudza Mushe na Aroni a ri, “Ndaela dza Paseka ngedzi: Paseka i songo ḽiwa nga mutsinda,

⁴⁴ hone phuli ifhio na ifhio ye na i renga nga tshelede i nga ḓi ḽa arali no i fumbisa.

⁴⁵ Zwi songo ḽiwa nga mutsinda kana mushumi o tou tholiwaho.

⁴⁶ Zwiḽiwa zwoṱhe zwo fanela u ḽiwa muṱani wonoyo we zwa gotshiwa khawo; na thango ya ṋama zwayo i songo vhuya ya bviselwa nnḓa. Ni songo vhuya na vunḓa marambo a itsho tshifuwo.

⁴⁷ Vhathu vhoṱhe vha Israele vha vhulunge vhuṱambo ha Paseka.

⁴⁸ Arali ni tshi dzula na mutsinda ane a funa u ita vhuṱambo ha Paseka uri a hulise Muṋe washu, vhathu vhoṱhe vha tshinnani vha muṱa wawe vho fanela u fumbiswa, ndi hone a tshi nga tendelwa uri a ite-vho uho vhuṱambo, ngauri u vho nga mudzulapo o bebwaho henefho. Hone muthu a songo fumbaho a songo vhuya a zwi ḽa.

⁴⁹ Ndaela dzenedzo dzi vhusa mudzulapo o bebwaho henefho na mutsinda a re vhukati haṋu.”

⁵⁰ Vhaisraele vhoṱhe vha thetshelesa, vha tevhedza ndayo dze Muṋe washu a ṋea Mushe na Aroni.

⁵¹ Musi wonoyo Muṋe washu a pfulusa Vhaisraele na matsinde avho shangoni ḽa Egipita.