EKISODA 11 - BIVHILI KHETHWA Mafhungo Madifha

Mushe a tshi ḓivhadza lufu lwa matanzhe

¹ Muṋe washu a vhudza Mushe a ri, “Ho sala bulayo ḽithihi fhedzi ḽine nda ḓo ḽi ḓisela Farao na ḽa Egipita. Hó no itea zwenezwo u ḓo ni litsha na ṱuwa tshoṱhe. Vhukuma u ḓo tou ni pandamedza!

² Laya vhathu uri munna muṅwe na muṅwe na musadzi muṅwe na muṅwe a humbele muhura wawe nungu dza siliva na musuku.”

³ Muṋe washu a ita uri Vhaegipita vha hulise Vhaisraele, Mushe ene a vha na bvumo ḽihulu shangoni ḽa Egipita, vhukuma magota a Farao na vhathu vhoṱhe vho vha vha tshi vhona Mushe e muthu muhulwane.

⁴ Mushe a ri, “Muṋe washu u ri, ‘Vhukati ha vhusiku ndi ḓo buḓekanya shango ḽa Egipita.

⁵ Matanzhe oṱhe a vhathu vha Egipita a ḓo fa, u thoma nga tanzhe ḽa Farao u guma nga tanzhe ḽa musadzi wa phuli a kuyaho goroi, na matanzhe oṱhe a kholomo.

⁶ Shangoni ḽoṱhe ḽa Egipita hu ḓo vha na mukosi u sa athu pfiwa, nahone a u tsha ḓo dovha wa pfiwa.

⁷ Hone kha Vhaisraele, muthu kana tshifuwo, na mmbwa zwayo a i nga vhuyi ya vha huvha, uri ni ḓivhe uri Nṋe Yahavee ndi ṱalula Vhaegipita kha Vhaisraele.’

⁸ Ndi hone magota aṋu haya oṱhe a tshi ḓo ḓa ha nṋe vha gwadama phanḓa hanga vha ri: Ṱuwa, iwe na vhathu vhau vhoṱhe! Ho no itea izwo ndi ḓo ṱuwa.” Mushe a ṱuwa ha Farao o sinyuwa zwihulu.

⁹ Ndi hone Muṋe washu a tshi amba na Mushe a ri, “Farao a nga si ni thethelese; izwo zwi ḓo ita uri ndi ite maḓembe manzhi shangoni ḽa Egipita.”

¹⁰ Maḓembe oṱhe hayo Mushe na Aroni vho a ita Farao a tshi zwi vhona. Hone Muṋe washu a ita uri Farao a vhe na tshipimbi, a si litshe Vhaisraele vha tshi ṱuwa shangoni ḽawe.