DZIPHISALEMA 99 - BIVHILI KHETHWA Mafhungo Madifha

Khosi khethwa ya ṱaḓulu-ṱaḓulu Khuluṋoni khethwa

¹ Muṋe washu u a vhusa, tshakha nga dzi tetemele! O thukha kha khuluṋoni vhukati ha vhakherube; ḽifhasi nga ḽi dzinginyee!

² Muṋe washu ndi muhulwane Tsioni, ndi Ene Muvhusi muhulu wa tshakha dzoṱhe.

³ Nga vha rende dzina ḽau ḽihulu ḽi ofhisaho. Ndí mukhethwa!

Khuluṋoni mbuya

⁴ U Khosi ya maanḓa i funaho khaṱhulo mbuya, ndi Iwe wo teaho khaṱhulo ya ngoho, wa funza Jakopo zwi re zwone na u fulufhedzea.

⁵ Hulisani Mudzimu Muṋe washu, mu luvheni ni he milenzhe yawe ya kanda! Ndí mukhethwa!

He Mudzimu a sumbedza u fulufhedzea hawe misi ya kale

⁶ Mushe na Aroni vho vha vhe vhotshifhe vhawe, Samuele na ene o vha a tshi mu rabela; vho vhidzelela Muṋe washu a vha aravha.

⁷ O amba navho e kha phuphu ya gole, vha tevhedza zwe a vha laya, na ndaela dze a vha ṋea.

⁸ Ndi ngoho, Mudzimu Muṋe washu, wo vha fhindula; wo vha Mudzimu a vha hangwelaho, naho wo vha u tshi vha lifhedzela vhukhakhi havho.

⁹ Hulisani Mudzimu Muṋe washu, mu luvheni e thavhani yawe khethwa. Mudzimu Muṋe washu ndi mukhethwa!