DZIPHISALEMA 98 - BIVHILI KHETHWA Mafhungo Madifha

Khosi ya ḽifhasi i lamulela vhathu vhayo U kunda ha Mudzimu

Phisalema.

¹ Imbelani Muṋe washu luimbo luswa, o ita zwimangadzo! O kunda nga maanḓa awe, nga tshanḓa tshawe tshikhethwa.

² Muṋe washu o ri sumbedza gundo ḽawe, a dzumbululela dzitshakha u fulufhedzea hawe.

³ U a fulufhedzea; zwe a fulufhedzisa Israele nga lufuno o zwi ita; ḽifhasi nga he ḽa kanda ḽo vhona gundo ḽa Mudzimu washu.

Mifhululu ya vhathu

⁴ Ḽifhasi ḽoṱhe nga ḽi ṱavhele Muṋe washu mukosi nga dakalo, nga ḽi mu huvhele mihuvho nga nyimbo.

⁵ Imbelani Muṋe washu nga haripa, ni imbe ni tshi lidza haripa!

⁶ Pembelelani Khosi, Muṋe washu, ni tshi lidza porompiṱa na phalaphala!

U pembela ha tsiko

⁷ Lwanzhe nga lu bvume na zwoṱhe zwi re khalwo; na shango na zwoṱhe zwi dzulaho khaḽo.

⁸ Milambo nga i vhande zwanḓa; dzithavha nga dzi fhululedze,

⁹ dzi imbele Muṋe washu; u khou ḓa u haṱula ḽifhasi. U ḓo haṱula shango a sa ṱaluli, tshakha u ḓo dzi haṱula nga khaṱhulo ya ngoho.