DZIPHISALEMA 97 - BIVHILI KHETHWA Mafhungo Madifha

Mudzimu Khosi ya vhugala na u fulufhedzea Mudzimu o tangwaho nga mulilo

¹ Muṋe washu u a vhusa, ḽifhasi nga ḽi fhululedze! Mashango a kule nga a takale!

² O tangwa nga makole na swiswi; khuluṋoni yawe yo tewa kha u fulufhedzea na khaṱhulo mbuya.

³ Mulilo u mu ranga phanḓa, u fhisa maswina awe thungo dzoṱhe.

⁴ Phenyo dzawe dzi tshi ri vhenge dzi vhonetshela shango; ḽifhasi ḽi tshi zwi vhona ḽi a tetemela.

⁵ Dzithavha dzi ṋoka sa phula phanḓa ha Muṋe washu, phanḓa ha Muṋe wa ḽifhasi ḽoṱhe.

⁶ Ḽiṱaḓulu ḽi ḓivhadza u fulufhedzea hawe; tshakha dzoṱhe dzi vhona vhugala hawe.

⁷ Vhoṱhe vha no rerelela zwifanyiso vha a shona; ndi vha no ṱongisa midzimu i si tshithu. Muṋe washu u gwadamelwa nga midzimu yoṱhe.

⁸ Tsioni i tshi zwi pfa i a takala, miḓi ya Juda i a fhululedza, i tshi vhona khaṱhulo yau, Muṋe washu.

⁹ Iwe Muṋe washu, u Waṱaḓuluṱaḓulu a no fhira zwoṱhe fhano fhasi; u muhulwane, u fhira midzimu yoṱhe.

U fulufhedzea ha Muṋe washu

¹⁰ Vha funaho Muṋe washu nga vha nengwe vhuvhi; u londola vhalanda vhawe vha fulufhedzeaho, a vha lamukisa zwanḓani zwa vhavhi.

¹¹ Hu si kale ḓuvha ḽa vha fulufhedzeaho ḽi ḓo bva, vha mbilu dzo ṱambaho vha pembela.

¹² Inwi vha fulufhedzeaho, takalelani Muṋe washu, mu rendeni, ḓivhani uri ndi mukhethwa!