DZIPHISALEMA 96 - BIVHILI KHETHWA Mafhungo Madifha

Khosi ya tshakha dzoṱhe Vhugala ha Khosi

¹ Imbelani Muṋe washu luimbo luswa, ḽifhasi ḽoṱhe nga ḽi imbele Muṋe washu!

² Imbelani Muṋe washu, khoḓani dzina ḽawe, ḓivhadzani u tshidza hawe ḓuvha ḽiṅwe na ḽiṅwe.

³ Anḓadzani vhugala hawe tshakhani dzoṱhe, ni ḓivhadze vhathu vhoṱhe mishumo yawe i mangadzaho.

⁴ Muṋe washu ndi muhulu, o tewa nga thendo khulu, o fanela u ofhiwa u fhira midzimu yoṱhe.

⁵ Hufha midzimu yoṱhe ya dzitshakha i si tshithu; hone Muṋe washu o sika ḽiṱaḓulu.

⁶ Vhurena na vhugala zwi khae, fhethu hawe hukhethwa hu na maanḓa na lupenyo.

Khuliso yo teaho Khosi

⁷ Inwi tshakha dzoṱhe, iḓani ha Muṋe washu! Mu huliseni, mu luvheni, u na maanḓa.

⁸ Rendani dzina ḽa Muṋe washu, zwo tea; ḓisani nduvho nḓuni yawe.

⁹ Khothani Muṋe washu a tshi vhonadza lupenyo lwawe lukhethwa! Ḽifhasi ḽoṱhe nga ḽi mu tetemele.

Khosi i tshi ḓa

¹⁰ Vhudzani dzitshakha ni ri, “Muṋe washu u a vhusa; shango ḽo tikwa, ḽi nga si sudzuluswe; u ḓo haṱula dzitshakha a sa ṱaluli.”

¹¹ Ḽiṱaḓulu nga ḽi takale, ḽifhasi nga ḽi fhululedze, lwanzhe nga lu bvume na zwoṱhe zwi re khalwo;

¹² masimu nga a pembele na zwoṱhe zwi re khao. Ndi hone miri yoṱhe ya ḓaka i tshi ḓo fhululedza;

¹³ i ḓo imbela Muṋe washu ngauri u a ḓa; u ḓa u haṱula ḽifhasi. U ḓo haṱula shango a sa ṱaluli, dzitshakha u ḓo dzi haṱula nga khaṱhulo ya ngoho.