DZIPHISALEMA 95 - BIVHILI KHETHWA Mafhungo Madifha

U vhidza lushaka u ḓa u luvha Mifhululu

¹ Iḓani ri fhululedze Muṋe washu! Nga ri mu pembelele, Ene bako ḽi ri tshidzaho!

² Nga ri swike phanḓa hawe ri mu rende, nga ri mu imbele ri pembele.

³ Muṋe washu ndi Mudzimu muhulu, ndi Khosi khulu i vhusaho midzimu yoṱhe.

⁴ U vhusa u bva zwigodini zwa ḽifhasi u swika miṱombozwiloni ya dzithavha.

⁵ Lwanzhe ndi lwawe, ndi Ene o lu sikaho, na shango ndi ḽawe, ḽo vhumbwa nga zwanḓa zwawe.

Khuliso

⁶ Iḓani ri khothe ri mu luvhe, nga ri gwadamele Muṋe washu o ri vhumbaho.

⁷ Hufha e Ene Mudzimu washu, riṋe rí vhathu vhawe, rí sambi ḽine a ḽi londola. Ngavhe ṋamusi ni tshi pfa ipfi ḽawe nandi!

Phindulo ya Mudzimu a tshi kaidza lushaka

⁸ U ri, “Ni songo ita tshipimbi unga no ita ni Miriba, ni songo dovha zwa ḽiḽa ḓuvha musi ni Masa phangani,

⁹ he vhokhotsi aṋu vha nṱunga, vha nndinga, naho vho vhona zwe nda ita.

¹⁰ Murafho wonouḽa ndo u nyala miṅwaha ya mahumi maṋa, nda ri, ‘Ndi vhathu vha mbilu dzo bvaho ngonani, a vha funi u ḓivha nḓila dzanga.’

¹¹ Nda ana ndo sinyuwa nda ri, ‘Vha nga si dzhene he nda vha ndi tshi ḓo vha awedza.’ ”