DZIPHISALEMA 94 - BIVHILI KHETHWA Mafhungo Madifha

Mudzimu u ḓo haṱula vhakandeledzi vha vhathu vhawe U hwelela vhavhi

¹ Muṋe washu, u Mudzimu ane a lifhedza; Iwe Mudzimu Mulifhedzi, ḓivhonadze!

² Takuwa, Iwe Muhaṱuli wa ḽifhasi; lifhedza vhadzia-u-ḓihudza u tshi tevhedza zwiito zwavho!

³ Muṋe washu, vhavhi vha ḓo ḓiphiṋa u ya ho ya naa? Vha ḓo gumafhi?

Vhadzia-u-levha vha u ṱonga

⁴ Maṱamba vha tou pfa vha tshi vhea; vhaitazwivhi vhoṱhe vha a ḓikhoḓa.

⁵ Vha kandeledza vhathu vhau, Muṋe washu, vha tsikeledza vhanangiwa vhau.

⁶ Vha vhulaha tshilikadzi na ṱhunḓu, vha ponda tsiwana.

⁷ Vha ri Muṋe washu ha zwi vhoni; Mudzimu wa Jakopo ha zwi londi.

Vhutsilu ha vhadzia-u-levha

⁸ Ni vhone, inwi ni si na ṱhalukanyo; inwi matsilu, ni ḓo ṱalifha lini?

⁹ Kani we a ni ṋea nḓevhe ndi dzinganḓevhe? We a ni fha maṱo ndi bofu kani?

¹⁰ Kani-ha ane a onyolosa dzitshakha ha laṱisi? Ene ane a gudisa vhathu ha na nḓivho kani?

¹¹ Muṋe washu u ḓivha mihumbulo ya vhathu; u ḓivha uri a vha tshithu.

Mashudu a vha pfaho Mudzimu

¹² Muṋe washu, ú na mashudu ane wa mu laya, wa mu funza mulayo wau,

¹³ u mu rudza mbilu musi wa khombo, vhavhi vha vhuya vha swiṱwa.

¹⁴ Muṋe washu a nga si laṱe vhathu vhawe, a nga si furalele vhanangiwa vhawe.

¹⁵ Hu ḓo dovha ha vhuya khaṱhulo mbuya; vhoṱhe vha mbilu dzo ṱambaho vha ḓo i tevhela.

Mulamuleli e eṱhe

¹⁶ Ndi nnyi ane a ḓo nndwela ndi tshi imedzana na vhavhi? Ndi nnyi ane a ḓo nnyimelela vhaitazwivhi vha tshi mmvutshela?

¹⁷ Ngavhe Muṋe washu a si mpfarise, ndi musi ndo fa.

¹⁸ Ndi tshi ri, “Mulenzhe wanga u khou redzemuwa,” Iwe Muṋe washu wa ntika, ngauri u na lufuno.

¹⁹ Musi mbilu yanga i tshi swa, wa nkhuthadza wa nthudza mbilu.

Khaṱhulo i sa khakhi

²⁰ Nṋa vhavhusi vhavhi vhane vha ḓivhetshela milayo ya vhukwila, vha nga konana na Iwe?

²¹ Vha luka vhunwa ha u fasha vha fulufhedzeaho, vha si na mulandu vha haṱulelwa lufu.

²² Muṋe washu ndi Ene vhushavhelo hanga; Mudzimu wanga ndi Ene bako ḽi ntsireledzaho.

²³ Ú ḓo vha lifhedzela vhutshinyi havho, a vha fhedza nga mulandu wa vhuvhi havho. Mudzimu Muṋe washu u ḓo vha lozwa.