DZIPHISALEMA 92 - BIVHILI KHETHWA Mafhungo Madifha

Maanḓa a bva kha Mudzimu Thendo i sa tumuwi

Phisalema, luimbo lwa ḓuvha ḽa Sabatha.

¹ Muṋe washu, Waṱaḓuluṱaḓulu, zwo naka hani ri tshi u livhuha, ri tshi renda dzina ḽau nga nyimbo,

² ri tshi ḓivhadza lufuno lwau nga matsheloni, nga madekwana ra anḓadza u fulufhedzea hau,

³ nga tshilidzo tsha thale dza fumi, na nga luimbo lwa mbila, hu tshi lidzwa haripa!

⁴ Muṋe washu, u ntakadza nga mishumo yau, ndi fhululedza zwe wa ita.

U lovha ha maswina a Mudzimu

⁵ Muṋe washu, mishumo yau yo hula hani! Mihumbulo yau yo ṱanḓavhuwa hani!

⁶ A si na ṱhalukanyo ha ḓivhi, tsilu a ḽi pfesesi,

⁷ uri naho vhavhi vha tshi simuwa unga hatsi, na vhaitazwivhi zwi tshi vha anḓa, vha ḓo fhedzwa tshoṱhe.

⁸ Hone Iwe Muṋe washu u ḓi dzula u muhulwane lini na lini.

⁹ Ngoho-ngoho maswina au, Muṋe washu, ngoho-ngoho maswina au a ḓo lovha; vhoṱhe vhaitazwivhi vha ḓo balanganywa.

U lalama na maanḓa a vha fulufhedzeaho

¹⁰ Wo nnyombela shambo nda nga ṋari, wa nnḓodza mapfura a netulusaho.

¹¹ Maṱo anga o vhona maswina anga a tshi kundwa, nḓevhe dzanga dzo no ḓi pfa mutsindo wa vhane vha mmvutshela.

¹² Vha fulufhedzeaho zwi ḓo vha anḓa unga mutshevho u tshi ṱuma lurere, vha aluwa unga mukedara wa Libanoni.

¹³ Vho ṱavhiwa nḓuni ya Muṋe washu, vha titima miṱani ya Mudzimu washu.

¹⁴ Vha ḓo ḓi aṋwa mitshelo naho vho no ḓi vha vha maḓuvha; vha ḓo dzula vhe vhaswa unga miri midala,

¹⁵ vha tshi ṱanziela uri Muṋe washu u ita zwone, ndi Ene bako ḽanga, ha khakhi.