DZIPHISALEMA 91 - BIVHILI KHETHWA Mafhungo Madifha

Mudzimu Mutsireledzi Vhushavhelo

¹ Ane a khuda nga Waṱaḓuluṱaḓulu, u ḓo lala murunzini wa Ramaanḓaoṱhe.

² Ndi ḓo amba na Muṋe washu nda ri, “Ndi Iwe vhushavhelo hanga, u vhudzumbamo hanga, Mudzimu wanga ane nda mu fulufhela.”

Tsireledzo

³ Ngoho u ḓo u ponyokisa tshikwekweni tshe wa retshelwa, hu tshi ḓa dwadze ḽi vhulahaho, a u tshidza.

⁴ U ḓo u kuvhatedza nga mithenga yawe, a u pilela nga phapha dzawe; u fulufhedzea hawe ndi tshone tshiṱangu na philelo.

⁵ Na khombo dza vhusiku a u nga dzi ofhi, naho u musevhe u poswaho masiari,

⁶ nangwe ḽi dwadze ḽi dodelaho swiswini, naho ḽi bulayo ḽi fhedzaho vhathu masiari tshivhangalala.

⁷ Vha tshigidi vha tshi ḓi rambalala thungo ino yau, vha fumi ḽa zwigidi vha tshi wa thungo ya tshauḽa tshau, hone iwe a zwi nga u kwami;

⁸ u ḓo sokou sedza zwau, wa vhona vhavhi vha tshi lifhedzwa.

⁹ Hufha Muṋe washu e vhushavhelo hau, Waṱaḓuluṱaḓulu e vhudzumbamo hau,

¹⁰ a hu na khombo i no ḓo u wela, a hu na phanzi i no ḓo sendela nnḓu yau.

¹¹ U ḓo ruma vharuṅwa vhawe, vha u londola nḓilani dzau dzoṱhe;

¹² vha ḓo u takula nga zwanḓa zwavho, u sa ḓo khukhulwa mulenzhe nga tombo.

¹³ U ḓo kanda ndau na ṋowa, ndawana na mbeḓa wa zwi kandekanya.

Zwe Mudzimu a ri fulufhedzisa

¹⁴ Mudzimu u ri, “Ú a mpfuna, ndi ḓo mu tshidza; ndi ḓo mu tsireledza, u ḓivha dzina ḽanga.

¹⁵ A tshi mmbidzelela ndi ḓo mu aravha; e khomboni ndi ḓo ima nae; ndi ḓo mu lamukisa nda mu hulisa;

¹⁶ ndi ḓo mu tonda a lalama, a vhona uri muthu ndi mu tshidza hani.”