DZIPHISALEMA 9 - BIVHILI KHETHWA Mafhungo Madifha

Rudzani mbilu, muhaṱuli ndi Mudzimu U renda Mudzimu hu tshi livhuhiwa khaṱhulo yawe

Phisalema ya Dafita ye a ṅwalela malogwane; i pfi i imbiwe nga kuimbele kwa luimbo lune lwa ri, “Lufu lwa ṅwana”.

¹ Ndi ḓo u renda nga mbilu yanga yoṱhe Muṋe washu, maḓembe au oṱhe ndi ḓo a anea.

² Ndi ḓo takala nda tou pembela ndi tshi humbula Iwe. Ndi renda dzina ḽau nga nyimbo, Iwe Waṱaḓuluṱaḓulu,

³ ndi tshi vhona maswina anga o no shakuliswa, vha tshi gobagoba vha wa vha lovha phanḓa hau.

⁴ Ndi Iwe wo onyolosaho mulandu wanga, mafhungo a naka. Wo ya wa dzula kha khuluṋoni yau, Iwe Muhaṱuli a sa ṱaluli.

⁵ Wo tshenusa vhannḓa wa lozwa vhavhi, dzina ḽavho ḽa si tsha dovha ḽa elelwa lini na lini.

⁶ Maswina o fhela tshoṱhe, ha sala marubi fhedzi u swika lini na lini, miḓi yavho wo i thuthekanya ya mbo ḓi hangwiwa tshoṱhe.

⁷ Hone Muṋe washu u ḓo ḓi dzula e hone lini na lini, khuluṋoni yawe o dzula o i tika uri a haṱule.

⁸ Shango u ḓo ḽi haṱula a sa ṱaluli, dzitshakha u ḓo dzi haṱula nga khaṱhulo i sa khakhi.

⁹ Muṋe washu ndi dzhavhelo ḽa vho kandeledzwaho, ndi Ene bako ḽa vhukhudo musi wa u khakhedzwa.

¹⁰ Vhane vha u ḓivha nga vha fulufhele Iwe, Iwe Muṋe washu a u laṱedzi vhane vha shavhela kha iwe.

¹¹ Muṋe washu a dzulaho Tsioni mu rendeni nga nyimbo, ḓivhadzani dzitshakha mishumo yawe.

¹² Ha hangwi tshililo tsha vhaheḓana, u a vha elelwa a vha lifhedzela.

Fulufhelo musi wa khombo

¹³ Yawee Muṋe washu, nnyitele tshilidzi, sedza vhutshena vhune nda vha khaho nga mulandu wa vha mmbengaho; ndi Iwe une wa nndamukisa mulomoni wa i ḽaho,

¹⁴ uri ndi u rende phanḓa ha vhathu vhoṱhe vha Tsioni, ndi pembele nge wa ntshidza.

¹⁵ Vhannḓa vhone, khunḓa yo fasha muvei, gwekwe ḽo fasha murei.

¹⁶ Muṋe washu u ḓivhelwa u haṱula hawe; asizwi-ha, kha muvhi vhutulu ho ḽa mufhomi.

¹⁷ Vhavhi vhoṱhe vha ḓo tsetsa vha guma nga vhudzulavhafu, khathihi na tshakha dzoṱhe dzine dza hangwa Mudzimu.

¹⁸ Vhashai a vha nga hangwiwi tshoṱhe, zwe vhaheḓana vha lavhelela zwi ḓo vhuya zwa wanala.

¹⁹ Yawee Muṋe washu, takuwa! U songo tenda hu tshi kunda muthu wa ṋama, vhannḓa nga vha haṱulwe phanḓa hau.

²⁰ Muṋe washu, vha shele nyofho, dzitshakha dzi ḓivhe uri vha tou vha vhathu vha ṋama.