DZIPHISALEMA 89 - BIVHILI KHETHWA Mafhungo Madifha

Luimbo lwa lushaka lu re khomboni, lu tshi humbudza Mudzimu u fulufhedzea hawe Khuluṋoni ya Dafita, ya lini na lini

Tshirendo tsha Ethani wa Muesra.

¹ Muṋe washu, ndi ḓo imba nda ḓivhadza lufuno lwau lini na lini, mulomo wanga u ḓo hanelela mirafho yoṱhe u fulufhedzea hau.

² Ndo ri, “Lufuno lwau a lu dzinginyei lini na lini, u fulufhedzea hau ho ima ho khwaṱha unga ḽiṱaḓulu.”

³ Wo ri, “Ndo vhofha mulanga na munangiwa wanga, ndo anela Dafita muḓinḓa wanga nda ri,

⁴ ‘Vhaḓuhulu vhau vha ḓo ḓi vha hone lini na lini, ndi ḓo khwaṱhisa khuluṋoni yau zwi tshi ya nga mirafho na mirafho.’ ”

Khosi ya mahosi

⁵ Muṋe washu, ḽiṱaḓulu ḽi renda zwimangadzo zwau, vharuṅwa vha renda u fulufhedzea hau!

⁶ Ndi nnyi makoleni a eḓanaho na Muṋe washu? Ane a nga Muṋe washu kha zwivhumbwa zwa ṱaḓulu ndi nnyi?

⁷ Khoroni ya ngei ṱaḓulu hu ofheswa Mudzimu; ndi muhulu, u ofhisa u fhira vhoṱhe vho mu tangaho.

⁸ Muṋe washu, Mudzimu Ramaanḓaoṱhe, ndi nnyi ane a nga Iwe? Muṋe washu, u na maanḓa mahulu, wo tangwa nga u fulufhedzea hau.

⁹ U vhusa lwanzhe lwo sinyuwa, wa dzikisa magabelo alwo a tshi takuwa.

¹⁰ Wo pwashekanya Rahaba ḓiragoni ḽa lwanzhe, ḽa vha khuvhabvu, wa balanganya maswina au nga tshanḓa tshau tsha maanḓa.

¹¹ Ḽiṱaḓulu ndi ḽau, na ḽifhasi ndi ḽau; wo tea ḽifhasi, wa sika zwoṱhe zwi re khaḽo.

¹² Ndi Iwe wo sikaho devhula na tshipembe, Thaboro na Heremoni dzi fhululedza dzina ḽau.

¹³ Tshanḓa tshau tshi na maanḓa, u na nungo, maanḓa au ndi mahulu, tshanḓa tshau tshi fhira zwoṱhe.

¹⁴ Khuluṋoni yau yo tewa kha ngoho na khaṱhulo mbuya, zwoṱhe zwine wa ita zwi vhonala zwi lufuno na u fulufhedzea.

Mashudu a vhalanda vha Mudzimu

¹⁵ Vha na mashudu vhe vha guda u u renda, vhane vha tshimbila tshedzani tsha tshifhaṱuwo tshau, Iwe Muṋe washu.

¹⁶ Vha fhululedza dzina ḽau ḓuvha ḽoṱhe, vha pembelela vhuvhuya hau.

¹⁷ U vha ṋea vhugala na nungo, wa vha ombela shambo nge wa vha funa.

¹⁸ Ngoho thovhele tshiṱangu tshashu u bva kha Muṋe washu, khosi yashu ro ṋewa nga Iwe Mukhethwa wa Israele.

Mulanga we Mudzimu a vhofha na Dafita

¹⁹ Zwiḽa kale wo amba na vhalanda vhau vha fulufhedzeaho, wa amba nga bono wa ri, “Ndi na muhali we nda mu ṋea nungo; ndo hulisa muṱhanngana we nda mu nanga vhukati ha vhathu.

²⁰ Ndo wana Dafita muḓinḓa wanga, nda mu ḓodza mapfura anga makhethwa, ha vha hone u mu rwela ṱari.

²¹ Tshanḓa tshanga tshi ḓo mu tika; ngoho u ḓo khwaṱhiswa nga tshanḓa tshanga tsha maanḓa.

²² A hu na swina ḽi no ḓo mu kunda nga maano; muvhi a no ḓo mu kandeledza haho.

²³ Hoṱhe hune a ya ndi ḓo pwashekanya maswina awe, nda vhulaha vha mu vhengaho.

²⁴ Ndi a fulufhedzea, ndi ḓo mu funa nga lufuno lu sa dzinginyei, dzina ḽanga ḽi ḓo mu ombela shambo,

²⁵ a vhusa lwanzhe, muvhuso wawe wa pfuka milambo.

²⁶ U ḓo mmbidzelela a ri, ‘U Khotsi anga, u Mudzimu wanga, bako ḽi no ntshidza.’

²⁷ Nṋe ndi ḓo mu ita tanzhe ḽanga, a vha muhulwane wa mahosi a ḽifhasi.

²⁸ Ndi ḓo mu londola nga lufuno lu sa dzinginyei lini a lini, mulanga we nda vhofha nae a u nga fi;

²⁹ vhana vhawe vha ḓo dzula vhe hone lini na lini, khuluṋoni yawe i ḓo lalama unga lutombo.

³⁰ Hone vhana vhawe vhá laṱa Mulayo wanga, vha si tsha tevhedza zwe nda vha laya,

³¹ vha nyadza ndaela dzanga, vha si dzi vhulunge,

³² ndi ḓo vha laṱisa vhuvhi havho nga luḓo, vhukhakhi havho nda vha laṱisa nga ṱhamu.

³³ Ene a thi nga litshi u mu funa nda si tsha fulufhedzea.

³⁴ A thi nga vhofhololi mulanga wanga, zwe nda amba thi nga shandukisi.

³⁵ Ndo ana nga vhukhethwa hanga zwa vha zwo fhela, ndi nga si zwifhele Dafita.

³⁶ Vhana vhawe vha ḓo dzula vha hone, khuluṋoni yawe i ḓo lalama unga ḓuvha,

³⁷ i ḓo ima lini na lini unga ṅwedzi, wone ṱhanzi i fulufhedzeaho ya makoleni.”

Tshililo tsha u lilela muḓuhulu wa Dafita o kundwaho

³⁸ Hone zwino wo laṱa khosi ye wa i ta, wa i landula, wa i sinyutshela;

³⁹ wo vhofholola mulanga we wa vhofha na mulanda wau, tshiala tshawe tsha vhuhosi wa tshi mbulumbudza buseni.

⁴⁰ Wo thutha mitsheṱo yawe yoṱhe, wa phusukanya madzhavhelo awe ha sala matumba.

⁴¹ U ṱangulwa nga vhafhiri vhoṱhe vha gondo, ndi munyadziwa-nga-vhahura.

⁴² Wo ṋea maswina awe maanḓa a u mu kunda, wa a takadza oṱhe.

⁴³ Wo gomadza vhuhali ha pfumo ḽawe; nndwani ha tsha kunda.

⁴⁴ Wo tshinya vhuḽa vhugala hawe, khuluṋoni yawe we i thenu ye fhasi huru!

⁴⁵ Wo mu ṱungufhadza, a kalaha a tshi kha ḓi vha nga hawe, wa mu shonisa.

Mukosi wa u humbela u lamulelwa

⁴⁶ Muṋe washu, zwi ḓo guma lini? U ḓo ḓi ri furalela naa? Mbiti dzau dzi ḓo ḓi duga unga mulilo naa?

⁴⁷ Elelwa uri vhutshilo hanga ho pfufhifhala hani. A u vhoni uri vhathu vhoṱhe vhe wa vha sika ndi mahandana fhedzi?

⁴⁸ U hone ane a nga lalama a si fe naa? Ndi nnyi ane a nga ḓitshidza a si dzhene tshaloni?

⁴⁹ Muṋe wa zwoṱhe, luḽa lufuno lwau lu sa dzinginyei lu ngafhi? Zwiḽa zwe wa anela Dafita nga u fulufhedzea hau zwi ngafhi?

⁵⁰ Muṋe wa zwoṱhe, sedza u nyadziwa ha mulanda wau, zwine mbiluni yanga nda konḓelela u seṅwa nga ditshakha,

⁵¹ ndi tshi ṱambuludzwa nga maswina au, Muṋe washu, a tshi poṋodza khosi ye wa i ta, a i nyadzisa.

Thendo ya u ṱhaphudza bugu ya vhuraru ya dziphisalema

⁵² Muṋe washu nga a rendwe lini na lini! AMEN! AMEN!