DZIPHISALEMA 88 - BIVHILI KHETHWA Mafhungo Madifha

Thabelo ya mulaṱwa o ṱovhowaho Thabelo i sa tumuwi

Luimbo, phisalema ya vhana vha Kora ye vha sikela malogwane, Hemani wa Muesera; ndi tshirendo tshi no pfi tshi imbiwe unga tshililo.

¹ Mudzimu Muṋe washu, Iwe Mutshidzi wanga, ndi u lilela vhusiku na masiari.

² Ngavhe thabelo yanga i tshi swika ha Iwe; nḓevhe yau nga i thetshelese mukosi wanga.

O ingamelaho tshalo

³ Ndi neta nga khombo, ndo no tou ingamela tshalo;

⁴ ndi vho vhalwa na vho swiṱwaho, ndi nga munna a si tshee na nungo.

⁵ Vho no nṱovhowa, ndi vho nga mufu; ndi nga vho ḽiwaho nga pfumo, vha eḓela tshaloni, wa vha hangwa, wa si tsha vha londa.

⁶ Wo ntsukumedzela fhasi-fhasi dindini, vhudzivhani ha swiswi.

⁷ Mbiti dzau dzi a ntsikeledza; wo ntiba nga magabelo au oṱhe.

⁸ Wo nnzhiela khonani dzanga dzone-dzone, wa ita uri vha nnengwe. Ndo govhelwa, a thi koni u ponyoka.

⁹ Maṱo anga o punda nga miṱodzi. Muṋe washu, ndi u vhidzelela ḓuvha ḽiṅwe na ḽiṅwe, ndi u ṱavhela mukosi ndó imisa zwanḓa.

Hune Mudzimu a si rendwe

¹⁰ Vho faho u a vha itela zwimangadzo naa? Vhafu vha nga vuwa vha u renda naa?

¹¹ Lufuno lwau lu nga ḓivhadzwa tshaloni naa? U fulufhedzea hau hu ḓivhea ndozwoni naa?

¹² Zwimangadzo zwau zwi ḓihwa hu re na swiswi naa? Mishumo yau mivhuya i ḓihwa shangoni ḽa vho hangwiwaho naa?

Thabelo i sa fhindulwi

¹³ Muṋe washu, ndi u ṱavhela mukosi, thabelo yanga i swika ha Iwe hu tshee nga matsheloni.

¹⁴ Muṋe washu, ndi mini u tshi nndaṱa wa mpfuralela?

¹⁵ U bva hanani hanga ndo ḓi ṱungufhadzwa, nda dzula ndo ingamela tshalo; wo ḓi nnyofhisa, ndí fhano ndo kulea nungo.

¹⁶ Mbiti dzau dzo tou ntswiela, wo nṱahadza nga nyofho;

¹⁷ ḓuvha ḽoṱhe mbiti dzi ntanga unga muḓalo wa maḓi, dzo ntangela ngomu tshoṱhe.

¹⁸ Wo nnzhiela khonani dzanga, wa nnduṱanya na ṱhama dzanga, khonani yone-yone yo salaho ndi swiswi.