DZIPHISALEMA 86 - BIVHILI KHETHWA Mafhungo Madifha

Mulanda a fulufhedzeaho wa Mudzimu, a tshi ṱavha mukosi musi wa khombo Mukosi wa muhumbeli

Thabelo ya Dafita.

¹ Muṋe washu, mpfe u mphindule, ndi muheḓana, ndi mushai!

² Nndondole, hufha ndi tshi fulufhedzea! U Mudzimu wanga, ndi fulufhela Iwe, ntshidze!

³ Muṋe wa zwoṱhe, nkhathutshele, ḓuvha ḽoṱhe ndi vhidzelela Iwe.

⁴ Nthudze mbilu, Muṋe wa zwoṱhe, ndi livhisa mbilu yanga ha Iwe.

⁵ Muṋe wa zwoṱhe, u na vhuthu, u a hangwela, vhane vha u vhidzelela u vha sumbedza lufuno luhulu.

⁶ Muṋe washu, ipfa thabelo yanga, thetshelesa mukosi wanga.

⁷ Musi wa khombo ndi a u vhidzelela; u ḓo mphindula.

Mudzimu a fhiraho zwoṱhe

⁸ Muṋe wa zwoṱhe, kha midzimu yoṱhe a hu na a no nga Iwe; a hu na mishumo ine ya nga vhambedzwa na yau.

⁹ Wo vhumba tshakha dzoṱhe; dzi ḓo ḓa dza u luvha, dza renda dzina ḽau, Iwe Muṋe wa zwoṱhe.

¹⁰ Muhuluhulu ndi Iwe, u ita zwimangadzo, ndi Iwe Mudzimu u woṱhe.

¹¹ Muṋe washu, mpfunze u ita zwine wa zwi funa, ndi ḓo konou tshimbila ngohoni yau; mphe mbilu nthihi, ndi ofhe dzina ḽau.

¹² Muṋe wa zwoṱhe, Mudzimu wanga, ndi ḓo u renda nga mbilu yanga yoṱhe, ndi ḓo hulisa dzina ḽau lini na lini.

¹³ A u mpfuni zwone, wo nṋula fhasi-fhasi tshaloni.

Vha no nyadza Mudzimu

¹⁴ Mudzimu, vhadzia-u-ḓihudza vha khou nndevhela, vhadzia-tshiṱuhu vha khou mmbulaha; ndi vhathu vha sa u londi.

¹⁵ Hone Iwe Muṋe wa zwoṱhe u Mudzimu wa tshilidzi na khathutshelo; a u fheli mbilu, lufuno lwau a lu dzinginyei, u a fulufhedzea.

¹⁶ Ntsedze, u nkhathutshele, nṋee nungo dzau; ntshidze, hufha na mme anga o vha mulanda wau.

¹⁷ Ntsumbedze tshiga tsha vhuthu hau, maswina anga a zwi vhone, a shone. Vhukumakuma Iwe Muṋe washu wo mpfarisa wa mphumudza.