DZIPHISALEMA 84 - BIVHILI KHETHWA Mafhungo Madifha

U ṱulutshela nnḓu ya Mudzimu Muimbi e kule na thembele

Phisalema ya vhana vha Kora ye vha sikela malogwane uri i imbiwe hu tshi lidzwa tshilidzo tsha Gathi.

¹ Nnḓu yau i takadza hani, Iwe Muṋe washu Ramaanḓaoṱhe!

² Ndo ṱuvha miṱa ya Muṋe washu, ndi ita na u ṋoka; Mudzimu a tshilaho ndi mu fhululedza nga mbilu yanga yoṱhe.

³ Hufha na lutiitii lwo wana tshiṱaha, ṱhambamaḓi na yone yo ḓiwanela vhudzulo hune ya nga thothonya mafhondo, henefho tsini ha aḽiṱari yau, Iwe Muṋe washu Ramaanḓaoṱhe, Khosi yanga, Mudzimu wanga.

⁴ Vha na mashudu vha no dzula nḓuni yau; vha dzula vha tshi u renda.

Muimbi e nḓilani ya u ya thembeleni

⁵ Vha na mashudu vhane maanḓa avho a bva kha Iwe; a hu na tshi vha takadzaho mbilu u fhira u fara lwendo lwa u ya nḓuni yau.

⁶ Vha tshi fhira nga govhani ḽo omaho vha hu ita fhethu ha zwisima, vha welwa nga mashudu a mvula dza tseula.

⁷ Vha ḓi pfa mbilu dzo khwaṱha dzi tshi ya, vha vhuya vha swika Tsioni, maṱoni a Mudzimu.

Thabelo

⁸ Muṋe washu, Mudzimu Ramaanḓaoṱhe, ipfa thabelo yanga! Nthetshelese, Iwe Mudzimu wa Jakopo!

⁹ Mudzimu, londola khosi, ene tshiṱangu tshashu, vhavhalela ene we wa mu ta.

Muimbi e thembeleni

¹⁰ Ndi khwiṋe u ṱwa miṱani yau ḓuvha ḽithihi zwaḽo, u fhira maḓuvha a tshigidi ndi sa hu vhoni; ndi takalela u linda muṋango wa nnḓu ya Mudzimu zwanga, u fhira u dzula nḓuni dza vhavhi.

¹¹ Mudzimu Muṋe washu ndi ḓuvha ḽashu, ndi tshiṱangu, u ri itela vhuthu, a ri hulisa; vho faraho nḓila ya Muṋe washu vha sa vhuyi vha pambuwa, ha vha dzimi tshivhuya na tshithihi.

¹² Muṋe washu Ramaanḓaoṱhe, u na mashudu ane a fulufhela Iwe.