DZIPHISALEMA 83 - BIVHILI KHETHWA Mafhungo Madifha

Mukosi wa vhathu vha Mudzimu vho tangwaho nga maswina Maswina a tshi langana vhathu vha Mudzimu

Luimbo, phisalema ya Asafu.

¹ Yawee, Mudzimu, u songo sokou fhumula! U songo sokou ṱanzwa maṱo wa lavhelesa.

² Mudzimu, vhona maswina au o halifha, vha u vhengaho vho imisa dziṱhoho.

³ Vha lukela vhathu vhau vhunwa, vha langana vhavhavhalelwa vhau.

⁴ Vha ri, “Kha ri ḽe lushaka lwoṱhe nga pfumo, dzina ḽa Israele ḽi sa tsha ḓo vhidzwa.”

⁵ Vha u itela tshimbevha vho khwaṱhisa, vho vhofha mulanga wa u lwa na Iwe.

⁶ Ndi Edomo na Vhaishmaele, ndi Muaba na Vhahagara,

⁷ ndi Gebala na Amoni na Amaleke, ndi Filista na Vhatiro,

⁸ hu ḓi nga Vhaashuru, na vhone vha ngomu, vha tikedza vhana vha Loto.

Mudzimu Mulamuleli

⁹ Vha ite zwe wa ita Vhamidiani, zwe wa ita Sisera na Jabini mulamboni wa Kishoni,

¹⁰ vhe vha lozwiwa Endoro, vha vha manyoro a mavu.

¹¹ Vhahulwane vhavho vha ite zwe wa ita Orebe na Ziebe, vhakololo vhavho vhoṱhe u vha ite sa Zebakha na Tsalimunna,

¹² vhe vha ri, “Nga ri dzhie pfulo ya Mudzimu i vhe yashu.”

¹³ Yawee, Mudzimu wanga, vha ite unga mbeu ya luguli, vha nge mungu u hwalwaho nga muya,

¹⁴ vha fhise vha nge ḓaka ḽi tshi swa nga mulilo, u nge khavhu i tshi fhisa dzithavha.

¹⁵ Vha sale murahu nga ḓumbu ḽau, u vha ofhise nga tshiḓumbumukwe.

¹⁶ Yawee Muṋe washu, nga vha tou niwa nga ṱhoni, vha vhuye vha u ṱoḓe!

¹⁷ Vha shonise vha ofhe tshoṱhe, vha lovhe vho shona!

¹⁸ Ndi hone vha tshi ḓo ḓivha uri u pfi Muṋe washu, Waṱaḓuluṱaḓulu, Muṋe wa ḽifhasi ḽoṱhe, ndi Iwe u woṱhe.