DZIPHISALEMA 81 - BIVHILI KHETHWA Mafhungo Madifha

Luimbo lwa vhuṱambo lu no sola tshipimbi tsha Israele Vhuṱambo

Phisalema ya Asafu ye a sikela malogwane. I pfi i imbiwe nga tshilidzo tsha Gathi.

¹ Fhululedzani Mudzimu, ndi Ene maanḓa ashu! Mudzimu wa Jakopo mu ṱavheleni mukosi!

² Simani luimbo, lidzani mirumba; imbani luimbo lu takadzaho hu tshi lila haripa na tshihwana!

³ Lidzani lufhalafhala vhuṱamboni ha Ṅwedzi muswa, ni lidze nga ḓuvha ḽa vhuṱambo hashu ṅwedzi wó tshena.

⁴ Hoyo ndi mulayo wa Israele, ndi ndaela ya Mudzimu wa Jakopo.

⁵ O u tetshela Josefa, zwiḽa a tshi yo lwa na Egipita. Henefho ndo pfa ipfi ndi sa athu ḽi pfa, ḽi tshi ri,

Khumbudzo

⁶ “Ndo vha rula muhwalo, vha si tsha hwala zwirundu.

⁷ Wo ri u khomboni wa mmbidzelela, nda u lamukisa, ndo u fhindula ndi goleni ḽa mubvumo; ndo u linga maḓini a Miriba.

⁸ “Vhathu vhanga, thetshelesani ndi ni eletshedze; ngavhe ni tshi nthetshelesa, Israele!

⁹ Ni songo vha na mudzimu usili; ni songo gwadamela mudzimu wa vhatsinda.

¹⁰ Mudzimu Muṋe waṋu ndi Nṋe; ndi Nṋe we nda ni pfulusa shangoni ḽa Egipita. Aṱamani mulomo unga fhondo, ndi ḓo sokotedza ndodo.”

U sa fulufhedzea ha Israele

¹¹ “Hone vhathu vhanga a vho ngo nthetshelesa, Vhaisraele vho nyadza zwe nda amba.

¹² Ndi zwe nda vha kumedza tshipimbi tshavho, vha ita zwine vha funa.

¹³ Ngavhe vhathu vhanga vha tshi nthetshelesa nandi, Vhaisraele vha si pambuwe nḓilani yanga,

¹⁴ ndo vha ndi sa nga lengi u laṱisa maswina avho, nda a fhedza oṱhe!

¹⁵ Vhane vha vhenga Muṋe waṋu vho vha vha tshi ḓo mu gwadamela vha sa funi, ṱhamu yavho ya vha ya lini na lini.

¹⁶ Inwi ndo vha ndi tshi ḓo ni funda nga mavhele avhuḓi, nda ni fusha nga mutoli u no bva bakoni.”