DZIPHISALEMA 80 - BIVHILI KHETHWA Mafhungo Madifha

“Mulisa wa Israele, ri lamukise!” Mukosi

Vhuṱanzi, phisalema ya Asafu ye a sikela malogwane; i pfi i imbiwe nga kuimbelwe kwa luimbo lu no ri “Phendephende”.

¹ Ri pfe, Iwe Mulisa wa Israele, Iwe une wa endedza Josefa unga sambi ḽa nngu, Iwe une wa dzula kha khuluṋoni vhukati ha vhakherube,

² sumbedza Efraimi na Benyamini na Manase lupenyo lwau. Vusa maanḓa au; iḓa u ri tshidze.

³ Mudzimu, dovha u ri vuse; ri penyisele tshifhaṱuwo tshau uri ri tshidzwe.

Mudzimu ó furalela vhathu vhawe

⁴ Muṋe washu Mudzimu Ramaanḓaoṱhe, mbiti dzau dzi ḓo ḓi nyenga, wa ḓi dzula u tshi sanda thabelo dza vhathu vhau u swika lini?

⁵ Wo vha fusha nga vhuswa ha miṱodzi, wa vha nwisa miṱodzi nga ndilo.

⁶ Wo litsha tshakha dzo ri tangaho dzi tshi lwela shango ḽashu; maswina ashu a a ri goḓa.

⁷ Mudzimu Mulangazwoṱhe, ri vuse; ri penyisele tshifhaṱuwo tshau uri ri tshidzwe.

Munḓirivhe wa Mudzimu wo kandekanywaho

⁸ Wo ḓisa munḓirivhe u tshi bva Egipita, wa tupula dzitshakha wa ṱavha wone;

⁹ wo u khurela fhethu hune wa ḓo tanda, wa ṱoka midzi, wa ḓadza shango;

¹⁰ murunzi wawo wa tiba dzithavha, thavhi dzawo dza tiba mikedara mihulu,

¹¹ dza adza dza guma lwanzheni, zwifhara zwawo zwa swika Yufuratha.

¹² Ndi mini wo wisa mutsheṱo wo u tangaho, uri vhafhiri vha nḓila vha fule nḓirivhe dzawo, u sale wo tou swoto?

¹³ U kandekanywa nga nguluvhe dza ḓaka, zwipuka zwa ḓaka zwi ḽa wone.

Thabelo ya u fhiledza

¹⁴ Mudzimu Mulangazwoṱhe, humela kha riṋe! Sedza u makoleni u vhone! Linda munḓirivhe hoyu,

¹⁵ ndi mudzi we wa simiwa nga tshanḓa tshau tsha maanḓa, ndi ḓadzwane ḽe wa tou ḓivusela.

¹⁶ Vho tumula munḓirivhe wau, vha u fhisa nga mulilo; vha ofhise vha lovhe!

¹⁷ Tsireledza Israele ane wa vhusa ngae, ene mubebwa-nga-muthu we wa ḓivusela.

¹⁸ Ndi hone ri si tsha ḓo u furalela; ri vuse, ri ḓo u rabela.

¹⁹ Muṋe washu, Mudzimu Ramaanḓaoṱhe, ri vuse; ri penyisele tshifhaṱuwo tshau uri ri tshidzwe.