DZIPHISALEMA 79 - BIVHILI KHETHWA Mafhungo Madifha

Mukosi wa mathubwa Jerusalema wó fhalala

Phisalema ya Asafu.

¹ Mudzimu, vhannḓa vho tshoṱhela shangoni ḽau, thembele yau khethwa vho i kumadza, vho phusukanya Jerusalema a sala e matumba.

² Zwitumbu zwa vhalanda vhau vho zwi ṋea maanga uri a ḽe, ṋama ya vhathu vhau vha fulufhedzeaho vho i ṋea phukha dza ḓaka;

³ vho shulula malofha avho unga maḓi, Jerusalema wa ḓala malofha; a hu na na ane a swiṱa vhafu.

⁴ Vhahura vhashu vha a ri holedza, vhe ra ṋekana navho masakha vha a ri sea vha ri goḓa.

⁵ Muṋe washu, u ḓo ri sinyutshela u swika lini? Mbiti dzau dzi ḓo duga lini na lini naa?

⁶ Mbiti dzau dzi shululele vhannḓa vha sa u luvhi, na mivhuso i sa u rabeli;

⁷ hufha vho mila Jakopo, vha phusukanya shango ḽa hawe.

Mukosi

⁸ U songo ri lifhedzela vhuvhi ha vhokhotsi ashu, ṱavhanya u ri khathutshela, mbilu dzashu dzo ṋoka.

⁹ Mudzimu Mutshidzi washu, ri farise, u tshi itela vhuhulu ha dzina ḽau; ri vhofholole, u ri hangwele vhukhakhi hashu, u tshi itela dzina ḽau.

¹⁰ U tendelani vhannḓa vha tshi ri, “Mudzimu wavho u ngafhi?” Vha sumbedze ri tshi zwi vhona uri u lifhedzela hani malofha a vhalanda vhau o shululwaho.

¹¹ Ngavhe zwigomelo zwa mathubwa zwi tshi swika ha Iwe; nga maanḓa au mahulu, lamukisa vho haṱulelwaho lufu.

¹² Muṋe wa zwoṱhe, maṱamba e vhahura vhashu vha a posa ha Iwe, vha lifhedze kaṱanu na kavhili.

¹³ Ndi hone riṋe vhathu vhau, dzone nngu dzine wa dzi lisa, ri tshi ḓo u renda lini na lini, ra u renda nga nyimbo zwi tshi ya nga mirafho na mirafho.