DZIPHISALEMA 78 - BIVHILI KHETHWA Mafhungo Madifha

U fulufhedzea ha Mudzimu na u sa fulufhedzea ha Vhaisraele Pfunzo ya zwifhinga zwa kale

Tshirendo tsha Asafu.

¹ Vhathu vhanga, ipfani pfunzo yanga! Thetshelesani maipfi ane nda amba.

² Ndi ḓo amba nga zwifanyiso, nda bula zwe zwa vha zwo dzumbama u bva kale,

³ zwithu zwe ra zwi pfa ra zwi ḓivha, zwe ra vhudzwa nga vhokhotsi ashu.

⁴ A ri nga zwi dzumbeli vhana vhavho, ri ḓo zwi vhudza murafho u ḓaho, mishumo ya maanḓa ya Muṋe washu i rendeaho, na zwimangadzo zwe a ita.

⁵ O vhetshela Jakopo ndaela, a tetshela Israele mulayo we a vhudza vhomakhulukuku washu uri vha vhudze vhana vhavho,

⁶ uri mirafho i ḓaho i u ḓivhe, na vhana vha sa athu bebwa, na vhone vha vhudze vhana vhavho.

⁷ Ndi hone vha tshi ḓo fulufhela Mudzimu, vha si hangwe mishumo yawe, vha vhulunge milayo yawe.

⁸ Ndi hone vha sa nga ngi vhomakhulukuku wavho, mavhanga a tshipimbi, vha mbilu dza mashandukwa vhane Mudzimu a vhona vha sa fulufhedzei.

Maḓembe o hangwiwaho

⁹ Vhana vha Efraimi naho vho vha vho fara vhura, musi wa nndwa vho shavha.

¹⁰ A vho ngo tevhedza mulanga wa Mudzimu, vho landula zwe a vha laya.

¹¹ Vho hangwa zwe a ita, zwimangadzo zwe a vha sumbedza.

¹² O ita maḓembe vhokhotsi avho vha tshi zwi vhona, shangoni ḽa Egipita, mudavhini wa Tsuani.

¹³ O fhandekanya lwanzhe a vha pfukisa, a imisa maḓi a khwaṱha unga luvhondo.

¹⁴ Masiari a vha endedza nga gole, vhusiku a vha vhonetshela nga mulilo.

¹⁵ O fhandula matombo phangani, a vha fha maḓi a si na vhukono, vha nga vha khou nwa lwanzhe;

¹⁶ a bveledza milambwana kha tombo, maḓi a ela unga mulambo.

Vhathu vha tshi gungula

¹⁷ Hone vhone vha ḓi mu khakhela, vha shandukela Waṱaḓuluṱaḓulu phangani,

¹⁸ vha linga Mudzimu nga khole, vha ri a vha ṋee zwiḽiwa zwine vha funa;

¹⁹ vha ṱunga Mudzimu vha ri, “Mudzimu a nga kona u ri ṋea zwiḽiwa phangani?

²⁰ Ndi ngoho, o ri u rwa tombo maḓi a gubunyea, milambwana ya ela. Hone na zwiḽiwa a nga kona u ri ṋea naa? Avha vhathu a nga kona u vha ṋea ṋama?”

²¹ Muṋe washu a tshi pfa vha tshi ralo a sinyuwa; a fhisa Jakopo nga mulilo, a sinyutshela Israele,

²² nge vha si fulufhele Mudzimu, vha si tende uri u na maanḓa a u vha tshidza.

²³ Naho zwo ralo Ene o amba na lutombo, a vula mahothi a ḽiṱaḓulu,

²⁴ a nisela vhathu mana uri vha ḽe, a vha ṋea thoro dzi bvaho ṱaḓulu;

²⁵ muthu wa ṋama a ḽa zwiḽiwa zwa vharuṅwa, vha ṋewa mbuvha i si na vhukono;

²⁶ a vulela muya wa vhubvaḓuvha ngei ṱaḓulu, a swoga muya wa tshipembe nga maanḓa awe;

²⁷ a vha nisela ṋama ya nga buse, zwiṋoni zwa nga muṱavha khunzikhunzini,

²⁸ a zwi wisela mitumbani yavho, zwa phapha u mona dennde dzavho;

²⁹ vha ḽa vha pfa vha si tsha funa, nge a vha ṋea zwe vha zwi lilela.

³⁰ Ho ri vha sa athu fura nga zwiḽiwa zwe vha zwi lilela, zwi tshi kha ḓi tou vha haṋwani havho,

³¹ mbiti dza Mudzimu dza vha vutshela, a vhulaha vhanna vha havho vha maanḓa, a wisa vhaṱhannga vha Israele.

³² Nangwe zwo ralo vho ḓi endela u tshinya; naho o vha itela zwimangadzo a vho ngo mu fulufhela.

³³ Ndi zwe a fhedza maḓuvha avho unga mufemo, iṱo ḽi tshi tou poi miṅwaha yavho ya vha yo fhela.

U ḓisola khole-khole

³⁴ Mudzimu a tshi vha vhulaha vha vho mu ṱoḓa; vha dovha u humela khae vha tshi tou ḓifunga;

³⁵ vha elelwa uri Mudzimu ndi Ene bako ḽavho, Waṱaḓuluṱaḓulu ndi Ene Mulamuleli wavho.

³⁶ Hone ho vha hu u mu hoya nga milomo, vha mu zwifhela nga maipfi avho.

³⁷ Mbilu dzavho dzo vha dzi siho khae; vho vha vha tshi pambuwa mulangani wawe.

³⁸ Naho zwo ralo o vha khathutshela; o vha hangwela vhuvhi havho a si tsha vha lozwa. Ndi kanzhi a tshi humisa mbiti dzawe a dzi kanda;

³⁹ a elelwa uri ndi vhathu vha ṋama, ndi muya une wa sokou vhudzula wa fhira, u si tsha vhuya.

Vhonyavhumbwa-wa-dagaila

⁴⁰ Ndi lungana vha tshi mu shandukela phangani, vha mu ṱungufhadza sogani!

⁴¹ Vha linga Mudzimu vha dovha, vha levhela Mukhethwa wa Israele.

⁴² A vho ngo tsha humbula maanḓa awe, zwiḽa a tshi vha vhofholola kha vhatambudzi,

⁴³ zwiḽa a tshi sumbedza maḓembe awe shangoni ḽa Egipita, a tshi ita zwimangadzo mudavhini wa Tsuani.

⁴⁴ Milambo ya Vhaegipita a i shandula malofha, vha si tsha nwa maḓi milongani yavho.

⁴⁵ O ruma guma ḽa thunzi dza vha ḽa, a ruma zwiḓula zwa vha konḓisela vhutshilo;

⁴⁶ mavhele avho a ḽiwa nga magerere, zwibveledzwa zwavho zwa fhedzwa nga nzietshikume.

⁴⁷ O wisa tshifhango minḓirivhe ye tshote, mihuyu yavho ya kumbiwa;

⁴⁸ kholomo dzavho a dzi ruthutha nga tshifhango, thakha yavho a i fhedza nga nḓadzi.

⁴⁹ O vha shoshela nga mbiti dzawe dzi ofhisaho, na dambudzo, na u dinalea, na zwi konḓaho – tshigwada tshoṱhe tsha vharuṅwa vha lozwaho.

⁵⁰ O vulela mbiti dzawe nḓila; ho ngo vhuya a vha litsha vha tshila, o vha kumedza bulayo.

⁵¹ O vhulaha matanzhe oṱhe a Egipita, yone mitshelo ya u thoma ya munna muṱani wa Hamu.

⁵² Vhathu vhawe vhone o vha pfulusa unga sambi ḽa nngu, a vha endedza phangani unga miṱambi.

⁵³ O vha dededza zwavhuḓi uri vha si ofhe, hone maswina avho a milwa nga lwanzhe.

U sa livhuha shango ḽe vha ṋewa

⁵⁴ A vhuya a vha swikisa mukanoni wa shango ḽawe ḽikhethwa, mivhundu ye a i wana nga maanḓa awe.

⁵⁵ O thatha dzitshakha phanḓa havho, a vha ṋea shango ḽa vha ifa ḽavho, a ṋea matsinde a Israele mahaya avho.

⁵⁶ Hone vhone vha linga Mudzimu, vha shandukela Waṱaḓuluṱaḓulu, vha si tsha tevhedza zwe a vha laya.

⁵⁷ Vho vha vha tshi ḓi nga vhokhotsi avho, vha si na vhuluvha, vha sa fulufhedzei, vha tshi nga vhura ho kombamaho, nga u sa fulufhedzea havho.

⁵⁸ Vho mu ṱunga nga u yo luvha zwikwarani hune ha luvha vhannḓa, vha vusa mbiti dzawe nga u luvha zwifanyiso.

⁵⁹ Mudzimu a ri u vha pfa a sinyuwa zwihulu, a landula Israele tshoṱhe.

⁶⁰ O ṱutshela vhudzulo hawe Shilo, dennde ye a vha o i akha vhukati ha vhathu.

⁶¹ O litsha maswina a tshi thuba mbulungelo, tshone tshiga tsha maanḓa awe na vhugala.

⁶² O vha o sinyutshela vhathu vhawe vhe a ḓinangela, a vha kumedza pfumo.

⁶³ Mulilo wa lozwa vhaṱhannga vhavho, vhasidzana vhavho vha si tsha imba dza mbingano;

⁶⁴ vhotshifhe vhavho vha ḽiwa nga pfumo, tshilikadzi dzavho dza si lile.

Mudzimu a tshi vusa lushaka

⁶⁵ Ndi hone Muṋe wa zwoṱhe a tshi vuwa khofheni, unga muhali o dzelelaho nga waini a tshi dzivhuluwa;

⁶⁶ a rwa maswina awe vha huma, vha shona lini na lini.

⁶⁷ A sala a tshi landula nnḓu ya Josefa, tsinde ḽa Efraimi a si tsha ḽi nanga;

⁶⁸ a nanga tsinde ḽa Juda, na Thavha ya Tsioni ye a i funa.

⁶⁹ Ndi hone he a fhaṱa thembele yawe, a i tea ya vha ya lini na lini, ya khwaṱha unga ḽifhasi, ya ṋanzwa makole.

⁷⁰ A nanga Dafita muḓinḓa wawe, a yo mu dzhia pfuloni;

⁷¹ a mu dzhia a tshi khou lisa nngu a ḓa nae, uri a vhe mulisa wa vhathu vhawe Jakopo, a lise Israele lushaka lwa Mudzimu.

⁷² Dafita a vha lisa o ḓikumedza, a vha endedza nga vhukoni.