DZIPHISALEMA 77 - BIVHILI KHETHWA Mafhungo Madifha

Maḓembe a Mudzimu a kale a fhumudza o hanganeaho Mukosi

Phisalema ya Asafu ye a sikela malogwane, Jeduthuni.

¹ Ndi ṱavhela Mudzimu mukosi! Ndi ṱavhela Mudzimu mukosi a mpfa.

² Musi wa khombo ndi ṱoḓa Muṋe wa zwoṱhe; vhusiku hoṱhe ndi rabela ndó imisa zwanḓa, thabelo i sa tumuwi, hone nda si wane mufhumudzi.

³ Nda ri u elekanya Mudzimu nda gomela, nda humbula nda pfa ndo kulea nungo.

U humbula zwa misi ya kale

⁴ Wo ita uri ndi lale ndó donola maṱo, nda ḽa mbilu nda kundwa u amba;

⁵ nda humbula maḓuvha aḽa a kale, miṅwaha yo fhiraho.

⁶ Vhusiku nda elelwa luimbo lwanga, nda elekanya nda ḓivhudzisa nda ri,

⁷ “Muṋe wa zwoṱhe o ri laṱa tshoṱhe naa? Nṋa a nga si tsha dovha a ri takalela?

⁸ Lufuno lwawe lu sa dzinginyei lwo nyamalala tshoṱhe naa? Nṋa zwe a ri fulufhedzisa a zwi tsheeho?

⁹ Kani Mudzimu o hangwa u khathutshela? Tshilidzi tshawe tsho kundwa nga mbiti kani?”

¹⁰ Nda elekanya nda ri, “Tshi no mmbaisesa ndi uri Waṱaḓuluṱaḓulu ha tsha sumbedza maanḓa awe.”

U ṱuṱuwedzwa nga maḓembe e Mudzimu a ita kale

¹¹ Litshani ndi elekanye mishumo ya Muṋe washu. Ee, ndi ḓo elekanya maḓembe au a kale.

¹² Ndi ḓo elekanya mishumo yau yoṱhe, nda humbula mishumo yau ya maanḓa.

¹³ Mudzimu, zwine wa ita ndi zwikhethwa; ndi ufhio mudzimu a no eḓana na Mudzimu washu?

¹⁴ Iwe u Mudzimu a no ita maḓembe; u ṱanela dzitshakha maanḓa au.

¹⁵ Wo tshidza vhathu vhau nga maanḓa au, vhaḓuhulu vha Jakopo na Josefa.

Mudzimu a tshi dzinginyisa shango na lwanzhe

¹⁶ Mudzimu, maḓi o ri u u vhona, o ri u vhona uri ndi Iwe, a ofha, a tetemela, a dzinginyea u swika vhudzivhani hao,

¹⁷ makole a shulula maḓi, mubvumo wa pfala lutomboni, misevhe yau ye vhenge phanḓa na murahu,

¹⁸ milinga ya gariki yau ya nndwa ya bvuma ye ngindii, ngindii, phenyo dzau dza vhonetshela shango, ḽifhasi ḽa tetemela ḽa dzinginyea,

¹⁹ Iwe wa fhira vhukati ha lwanzhe, wa vula nḓila vhukati ha maḓi a maanḓa, nangwe vhuṱala hau vhu songo vhonala.

²⁰ Wo endedza vhathu vhau unga sambi ḽa nngu, vhó rangwa phanḓa nga Mushe na Aroni.