DZIPHISALEMA 76 - BIVHILI KHETHWA Mafhungo Madifha

Mudzimu Mulamuleli wa Juda Mudzimu wa Salema

Phisalema, luimbo lwa Asafu lwe a sikela malogwane; i pfi i imbiwe hu tshi lidzwa haripa.

¹ Mudzimu u a ḓihwa kha ḽa Juda, dzina ḽawe ndi ḽihulu kha ḽa Israele.

² Nnḓu yawe i Salema, u dzula Tsioni.

³ Ndi he a vunḓekanya misevhe i dugaho, a konyokanya zwiṱangu na mapanga, zwone zwihali zwa nndwani.

U kundwa ha maswina

⁴ Iwe Mudzimu u na vhugala, u na lupenyo; maanḓa au a fhira thavha dzi sa sudzuluwi.

⁵ Vhahali vho ṱangulwa vho lala, a hu na na ḽiswole ḽi no kona u imisa tshanḓa.

⁶ Iwe Mudzimu wa Jakopo wó tou kaidza, bere na gariki dza nndwa zwi sokou te.

Mudzimu a tshi haṱula

⁷ A no ofhisa ndi Iwe u woṱhe; wó sinyuwa, ndi nnyi ane a nga ima phanḓa hau?

⁸ Wo haṱula u makoleni, shango ḽa ofha ḽa tou tshete,

⁹ hu tshi takuwa ha haṱula Iwe Mudzimu, uri u tshidze vhoṱhe vho kandeledzwaho.

Mavhanga a tshi luvha

¹⁰ Vhathu vha tshi halifha ndi hone thendo yau i tshi ṋaṋa; vho ponyokaho mbiti dzau u tou vha kungela sa ludede.

¹¹ Khunyeledzani zwe na anela Muṋe washu Mudzimu waṋu! Mashango a matungo oṱhe nga a ḓise nduvho, a ṋee Ene a no ofhisa.

¹² U ṱukufhadza vhavhusi vha u ḓiḓivha, u ofhiwa nga mahosi a ḽifhasi.